網誌分類：人物 |
1002
三十前靠打工?三十後錢搵錢
三十歲前一般人靠打工賺錢，三十歲以後應學習錢搵錢；更叻人四十歲以後搵人同你搵錢（開公司做生意）。由於現代社會環境變得競爭激烈，開公司做生意愈來愈難；反之，三十歲前靠打工賺錢，三十歲後學曉錢搵錢，仍然係至理名言。點樣錢搵錢？呢方面需要智慧，例如2000年科網股爆破後仲住TMT股唔肯止蝕，咁就多多錢都唔夠輸。去年下半年美國住宅樓價開始回落，唔避開與次按有關項目又可以怪邊個？總之，有智慧不如趁勢。
1004
白金鈀金或現大熊市
萬事得宣布利用納米科技（Nanotechnology）成功製成汽車廢氣處理裝置，令淨化器對白金及鈀金需求大幅減少。白金及鈀金最大市場就係汽車淨化器，用去每年產量70％至90％。上述消息媲美1970年代末期數碼相機面世對白銀市場影響，估計白金及鈀金將因萬事得上述發明而進入大熊市！因為新科技令汽車淨化器只需五納米（Nanometer）直徑白金，便足夠處理汽車廢氣，令汽車業對白金需求大幅減少。如白金從此進入大熊市，黃金短期亦受影響。
呢個世界有兩類投資法：第一類叫Value Investing（價值投資法），投資者努力找尋偏低股份，或熊市將完成時入市，耐心等候股價重返合理水平，或牛市將盡時獲利回吐。第二類係搵 Growth Stock即找尋增長股，搵出邊D股份未來幾年每年純利可上升25％或以上，透過企業增長而令股價大幅上升。1997年7月前香港經濟處於高增長期（1967至97年黃金三十年），股票市場內充滿增長股。1997年後香港大部分股份變成價值股（Value Stock），即利用行業盛衰產生一起一落從中獲利；反之，中國由1978年起進入黃金三十年（係咪2008年結束則木宰羊），內地股份唔少係增長股，但亦漸近尾聲。10月份邊D行業會跑贏大市？能源股、金屬股、賭場股經過8月17日至今大幅上升，宜獲利回吐，較睇好係高科技股，大家不妨高科技項目中找尋投資對象。
上周格蛇向BBC表示，過去二十多年通脹平靜期（inflation tarnquillity）已結束。呢段日子，因十三億中國人民由貧窮走向小康，中國人努力生產增加出口，同時節衣縮食去累積資本，形成大部分中國人付出多、消費少。但呢段日子已一去不返，中國經濟已踏入小康期，即中國人除努力生產增加出口外，亦同時開始消費。此一改變引發2001年起原材料漲價潮，踏入今年下半年，中國經濟更由出口導向型轉為內部消費帶動型（出口退稅大幅減少或取消）……。格蛇繼續話，二十世紀初期，阿根廷人均收入較德國高，相等於當年美國人四分三；一百年後卻出現金融危機。格蛇點解今時今日提阿根廷？係咪警告美國人唔好因為二十一世紀美國GDP全球最大而自滿，一百年後美國會否一如二十一世紀阿根廷？每六十年一個甲子，由貧窮到富裕通常需要三十年，停留高峰期大約可維持二十年，衰落期卻只需十年，然後又係另一個甲子。中國由 1978至2008年係經濟高速成長期，2008年開始係咪進入上上落落期？今時今日A股已處於偏高位置，但唔代表明天跌市便來臨。
1005
10月4日，周四。恒生指數跌505.96，收26973.98；成交1475.35多億元。10月期指跌242點，收27013點。投資者應明白股市嚴重超買下，一次技術性調整無法避免，經過兩天（加起來超過2000點）回落後，周五股市相信又再上升，因為市場資金太充沛啦，日圓弱勢代表資金大量由日本流出。 新濠（200）跌6.5％，見13.6元，大摩分析員認為澳門賭業較去年同期只升55％，而非事前估計75％，有D令人失望。大量賭場兼酒店陸續澳門落成，造成澳門賭博業及酒店業勞工不足。美國上市永利及金沙澳門投資好大，10月3日在美國股價亦回落9％。隨威尼斯人開業，令澳門賭增加供應量30％。澳門酒店及賭博事業開始面對激烈競爭。
近期四叔眼光一流，但看似容易事，背後大有學問，唔係人人可做「股神」。1973年我老曹任職投資公司，同時擁有一間證券行，公司客戶中超過二百個係活躍分子（接近每天都買賣）；到1974年12月，公司活躍客戶只餘下八個。1973至74年大熊市中，炒家死亡率高達96％。散戶投資股票由1997年7月至今十年，相信亦係損失者佔大多數、成功者只佔少數。牛市中，人人都可以成為股神，一個月賺三、四十萬元好似好容易，較返工賺得更多，但事實並非如此。投資係一半科學（事前做足資料收集）、一半藝術。事前冇一個人有十足把握，所以要分散投資及按O高低決定投入資金。我老曹經歷過 1973至74年股災、1981至82年香港主權談判、1987年10月停市、1997年7月亞洲金融風暴、2000年3月科網股……。由2003年4月至今，股市已上升四年有多，加上我老曹年紀漸大，不宜過分進取矣。何況現水平能源股、金屬股甚至內地金融股及內地房地產股股價，都已到唔係咁吸引水平；反之，半導體股漸漸見底回升，可以成為第四季尋寶遊戲對象。至於建築股，相信正進入黎明前黑暗，如「西九」上馬，一切漸漸改變，股價開始見底回升。本港建築股自1994年起回落，到今年已下沉十四年，唔少建築公司依賴將業務伸展到中國同澳門才能生存下去，一旦政府將西九重新招標，令本港建築合約大幅上升，2008年建築公司純利有機會回升。上述看法係咪正確？2008年才知道。其他項目咁貴今天，敲敲冷馬又如何?! 今天花旗推介恒地（012），目標價80.7元，並推介中華煤氣，以及推介深圳投資（604），目標價10元。
今年黃金周中國人主要去邊？答案係二線城市淘樓熱。以廣東省為例，惠州、中山、江門、肇慶、清遠、河源等二線城市，到處都係睇樓人群。隨交通網絡日漸發達，珠三角「二小時生活圈」形成，即大城市附近二小時車程地區都出現買樓熱；加上大城市內首付提高到40％，更多人向鄰近二線城市進軍。
BIG STOCK GO INTO TWO THREE STOCK
黃金周前，A股係以2008年估計純利O四十三倍交易，雖然今年A股純利平均升幅可達31％，點睇都係算貴（但貴唔係睇淡理由）。中國經濟保持高增長，利率低於CPI增長，令A股繼續上升，今年8月20日以後更刺激本港H股狂升，因中央將批准個人資金自由行。中國政府正努力為A股做冷卻措施，包括讓本港國企回歸A股市場去吸收市場內過剩資金，並以QDII（讓內地基金及金融機構投資港股），即利用本港H股去拖慢內地A股上升速度。如參考1980年代台灣股市泡沫爆破前曾出現兩次大調整，第一次調整幅度39％，第二次26％，到1990年2月指數見12495點才正式爆破。原來「狼來了」理論亦可應用於泡沫經濟！今年首季唔少專家認為A股出現泡沫，相信只係第一次狼來了；5月份加股票印花稅係第二次狼來了；至於第三次狼來了係咪2008年？冇人事先知道。如參考香港1997年樓市泡沫爆破理由，八萬五房屋政策只係藉口，真正理由係負利率時代結束。1990年2月台灣股市泡沫爆破，理由亦係負利率時代結束。有一天中國CPI增長率回落至利率水平以下，存款利率再次提供實質利率，形成資金由物業市場同股票市場重新回流銀行存款，就係A股泡沫爆破時刻。QDII令內地資金可見將來繼續流港，港股直通車雖然一再延期，最終仍會開出，令H股同A股差距進一步收窄。
1006
香港恒生指數A股化（受QDII及QDRI刺激），以七個星期上升50％後，港元亦由8月15日7.8235上升到10月2日7.75，相信已有外國資金大量流入，下周開始流入資金減少機會好大。香港CPI同外國一樣，工資及租金佔好大比重（美國佔70％），今年加薪幅度估計只有2.5％至3％，即香港CPI升幅唔大，本港出現負利率環境機會唔高；加上香港人存款一早已多元化（唔少人存澳元、加元同英鎊），因此香港再出現1990至97年負利率環境機會唔大。中國8月份CPI升幅6.5％，主因係食物價格上升18.2％（首八個月CPI平均上升3.9％，人行希望係3％），因豬同雞隻價格上升 49％、蔬菜上升22.5％。食物漲價高潮9至10月完成，明年中國CPI升幅有機會重返3％水平，因為今年7月1日起出口退稅大幅取消後，已令8月份出口增長率減慢到22.7％（7月份增長率34.2％），估計9月份進一步減慢。換言之，恒生指數28000點有如夕陽無限好，擔心8月17日開始恒生指數上升潮10月份結束！10月份投資策略應否過分進取？見仁見智。
貪念係社會進步動力
我老曹性格的確係集好友淡友於一身。唔單止咁，我老曹更加係一個絕對貪心人，過去唔開心之時，可以獨自一人吃掉十二盎斯牛扒或整個Pizza（上述係太太最唔高興地方。近年為健康理由，已戒娼@@W自吃十二盎斯牛扒或鯨吞整個Pizza習慣，學習吃七分飽）。上述性格令我老曹冇興趣賺10％到20％利潤，而集中追求100-200％利潤，投資策略目標係double，不然便止蝕。因此只有熊市將盡時才投資藍籌股，因為可提供100％利潤機會；牛市將盡時，例如家便改為70％現金，30％投資細價股，因為只有細價股才可提供100％或以上利潤機會。中國人一向對貪字有抗拒，其實貪念係推動社會進步原動力，不然太多人四十五歲便退休，就係貪念不足，四十五歲以後仍工作人，唔少人只因為貪。其實貪得其所並唔壞，只要唔係貪得無厭便可。例如對學問追求係另一種貪，對藝術品擁有欲係另一種貪。人類如太早知足，社會係唔會進步
1008
內地客成樓市股市新力量
過去我老曹曾指出，美元弱勢對港股有利，上述因素已令恒生指數由8月17日至10月2日上升接近50%，但股價最終由企業純利及純利增長率（PEG）決定。基於2008年美國經濟增長放緩，代表企業明年純利升幅將放緩，信貸市場日漸收緊。目前恒生指數平均O二十一點七四倍，過去O二十二倍以上便進入極為偏高期，即恒指28000點以上開始出現阻力。
八十年末期，台灣指數由946點升上12424點，三年多指數上升十二點一三倍，然後泡沫爆破。恒生指數由1971年10月270點上升到 1973年3月1774點，一年半時間內恒指上升五點三倍，然後泡沫爆破。滬深A股由2005年6月6日807點上升到今年9月28日5590點，升幅五點九二倍。如以香港1971－73年標準睇已差唔多，如以台灣標準睇仍然有排升。泡沫有幾大及維持幾耐？冇人可事前知道。1988年如投資50萬元新台幣在台灣股市，在1990年2月離開，可以變成1億元新台幣；如留守到當年10月台灣指數2560點，即八個月可失去80%市值（1973－74年港股在二十三個月內失去93%市值）。滬深A股泡沫幾時見頂？今年1月唔少人認為A股係泡沫而叫人立即離開，係唔了解泡沫發展歷史。泡沫由形成到吹脹需時短則一年半（例如香港1971年10月至73年3月），長則三年（例如台灣）。內地A股由2005年6月6日至今已超過兩年，理論上在2008年上半年或以前爆破，即未來八個月內任何一天都可能係A股泡沫爆破日子，至於係哪一天？只有做事後孔明。泡沫經濟有如龍捲風，可以將周遭東西一齊吹上半天。今年第三季起中央政府停止A股新基金發行，存量基金紛紛暫停申購；反之，QDII基金成為在理財市場走俏產品，中央政府態度令A股基金發行接二連三掛出免戰牌（唔批），QDII基金卻放行。刺激之下，本港國企指數今年第三季大大跑贏內地A股指數。以中銀穩健增長基金為例，由8月20日99.48仙到9月25日 1.245元，上升25.19%；建行（939）首款股票QDII（海盈一號）9月20日市價1.0148元。其餘仲有工行（1398）、東亞銀行（023）等QDII今年第三季亦獲利不菲。南方QDII基金發行首天吸引資金500億元人民幣，華夏QDII基金同樣受到熱捧，海富通、嘉實基金、上投摩根QDII產品也在緊急備戰中。據悉，針對美國、歐洲股市場QDII亦在籌備中。短期內來自內地QDII資金繼續支持本港股市進一步上升。
係時候提高警覺
本港H股及紅籌股甚至大笨象控，在龍捲風威力下都變成小飛象。今年上半年我老曹曾鼓勵大家沖個泡泡浴，今天人人被眼前短期利潤吸引而忘記危險，雖然短期後市仍向上，但係時候提高警覺矣。10月底美國第二次減息前後係咪出貨訊號？請記住，群眾情緒好易走向極端，例如8月17日跌穿250天移動平均時極端恐懼，到近日漸進入極端樂觀狀態。唔好相信大學教授對經濟預測：1929年10月16日哈佛大學經濟系教授Iwing Fisher認為美國股市冇問題，今天大家都知道他只是一個書呆子。講到預測，請記住your opinion is as good as mine，即你的意見同我的意見一樣（都係垃圾），因為人係冇預測能力。A股泡沫有幾大、幾時會爆破？你唔知、我唔知，只有天知地知，甚至格蛇都唔知。不過，千變萬變最後離不開真實，就係O八到十二倍係偏低、十二倍到十八倍合理、十八倍到二十二倍偏高，一旦超過二十二倍，便必須企業純利保持高增長（例如連續幾年每年純利上升30％或以上），而上述情況通常唔能夠維持超過三年，亦係泡沫由形成到爆破好少超過三年理由。音樂教授Roger Penrose 二十年前曾講過：任何好聽旋律都由「三高一低」組成，即一個高潮後係另一個高潮，然後更高潮，接便是低潮。內地A股2005年6月起動，至於哪一天係最高潮則木宰羊。
1009
點樣保持青春？
一、少吃經處理過食物，例如罐頭或醃菜、鹹魚、火腿等，呢類食物唔係鹽太多就係糖太多。
二、每天吃五至十種蔬果及唔好飲果汁（因糖分太高），最好每天吃D洋。
三、唔好吃Omega-6油類（例如薯片、焗蛋糕、人造牛油或任何經高溫處理油），改吃Omega-3油（通常存於魚、雞蛋及橄欖油之中），其中又以第一次橄欖油（extra-virgin olive oil）最好。雞蛋每天唔好吃太多，亦唔好唔吃，每天一隻就最好。
四、盡量少吃糖及代糖。糖不但無益，而且加速腦衰退；養成無糖生活習性（除蜜糖），尤其係代糖更加無益。
五、吃優質碳水化合物，因為三脂甘油酸飽和量低，例如椰菜花、萵苣、洋、紅蘿蔔等。最好以上述植物代替每天其中一餐（例如早餐），同時減少吃麵包及米飯。
六、喝未經發酵茶，每天最少兩杯（可以係綠茶，但飲中國茶證明更好），例如香片、龍井、玫瑰茶等。經發酵紅茶一樣有效，因為含較低氟化物，功效差D。大部分長命百歲中國老人都有天天飲茶習慣。
七、唔好用銀粉補牙，改用磁粉，因為銀粉含水銀，會傷害你神經及腦細胞。
八、唔好長期處於壓力下，每天必須八小時睡眠。睡眠充足係另一防止衰老良方，如無法避免壓力，段日子多D吸收魚肝油（例如食魚油丸對抗精神壓力）。
九、唔好讓自己陷入情緒低潮，凡事向好一面睇，如諗唔通便唔去諗。阿媽教落，天大事每晚十二點之前要想通，如果晚上十二時前仲諗唔通便唔再去想，以免影響睡眠（留番明天才諗）。
十、每星期讓自己少吃一餐。好多宗教都有齋戒儀式，原來對身體十分好。最佳建議係每星期少吃一餐午餐，咁做身體會動用貯藏下來養分去修補器官上微損傷；如每星期有一天讓身體自己去修補器官上微損傷，自然活得更好。
上述十大健康要訣，要做到並唔難。我老曹希望所有讀者八十歲時仍身體健康。
中藥難以風行世界有因
中醫理論好好，但無法透過實驗室去證明藥品療效，形成中藥難以進入世界市場。無法提供充分證據證明藥品具有其所聲稱療效，係中藥不能風行世界理由。近年中醫藥已被國際醫學界認識同接受，卻無法全世界普遍使用，就係因為冇合法地位，理由係標準化唔夠。例如一個複方丹參製劑由七百家藥廠生產，每家藥廠一個標準，結果同樣係丹參製劑，標準卻唔同，人家被搞糊塗了，唯有唔用。中醫藥走向世界已叫幾十年，結果仍係走唔出華人社區，就係標準化不足，同時冇充分證據證明其藥效。
滬深A股由2005年6月6日807點升至今天5653點，今年純利O已超過六十倍，但每天仍有二十幾萬新投資者開戶加入市場。《金融時報》認為，內地兩個A股市場兩年前唔過3萬億元人民幣，到今年9月底已達25萬億元，估計年底可達30萬億元，已超過中國GDP總和（2006年21.087萬億元）。美國股市總值係GDP 130％，日本、韓國、印度約100％，中國今年底股市總值一下子達到GDP 140％……。
1010
服務中產行業陷不景氣
1997年3月到2007年3月，香港人月入5萬元以上家庭數目由25.35 萬個增至57.46萬個，升幅達126.6％；同期月入8000元或以下家庭由22.82萬個增至46.17萬個，升幅102.32％；月入8000元以上、5萬元以下家庭由14.267萬個下降至12.011萬個，減少16.52％。
過去十年本港家庭數目增加3.29萬個或17％。過去十年本港月入5 萬元以上中上層家庭數目大增超過一倍，代表有三十多萬中產家庭移向中上層；月入8000元以下家庭亦上升一倍，即同時有唔少家庭跌落貧窮階級。社會上最大多數（月入8000至5萬元）家庭數目卻減少。香港家庭平均收入由1997年21425元一個月，上升到2007年23500元一個月，升幅只有 9.6％，升幅極之有限。獲較大加薪幅度反而係月薪50000元或以上高薪人士，而非一般中層職員。上述變化令名牌市場十分興旺（因消費者人數上升一倍以上），同時服務低收入行業亦興旺起來（因人口亦增加一倍以上），但服務中產行業卻面對人口減少17％而陷入不景氣。
家一百方米或以上樓面住宅只有八萬一千三百萬個，可見豪宅供應量幾咁不足；其中五萬七千五百個係一百方米以上、一百六十方米以下；真正算得上係豪宅（一百六十方米以上）供應量更只有二萬三千七百萬個，嚴重供不應求，令2003年至今豪宅售價狂升，依家已超過1997年水平。七十方米以下住宅單位供應量達八十八萬九千五百個；七十方米以上一百方米以下達十二萬六千七百個，呢個市場家庭人數過去十年減少而非增加，因此一百平方米或以下住宅樓無法重見1997 年高價。低收入家庭人口大幅上升一倍，形成對公屋需求回升，政府或者有需要多建公屋（唔係居屋，居屋市場需求在下降中）。過去十年香港高收入家庭與低收入家庭數目同時增加，中產家庭卻在減少，上述情況早1980年西方發生，1997年亦香港發生，近年亦中國出現。至於點樣處理，至今冇乜良方。
中國市場對外資日益重要
今年8月中國A股市場股票市值首次超過全國GDP總值，投資者賬戶數超過一億一千八百萬戶，代表最少四千萬股民。中國人收入來源有三：一、資本；二、土地；三、勞動力、生產資料與知識技術。城市內，絕大多數居民冇土地，過去主要收入來源係勞動力、生產資料及知識技術為主。經過二十八年改革開放後，資本累積達到一定程度，部分市民通過將部分儲蓄轉化為投資而進入以資本去賺取收入期，成為另一收入來源。上述情況三百年前英國發生，戰後日本發生，近年才中國出現。其實，中國早1872年晚清政府時代已出現第一家股份企業上海輪船招商局；到中華民國時，中國證券市場發展已十分蓬勃，可惜戰禍連年，加上中華人民共和國成立後走共產主義制度，令中國股票市場唔再存在，直至改革開放後才再形成。家中國股民最少四千萬，可以講股市已深入民間，持有超過22萬億元市值股票，令大量國企漸轉為公私合營（最大股東係政府，但股票市場上交易）。未來股市升降對社會經濟影響力好大，股市與中國經濟已進入互動時代，不但成為中國市民另一收入來源（透過資本去賺取利潤），同時亦代表中國經濟走向「公開、公平、公正」原則運作。而利用資本逐利，亦漸成為中國市民另一重大收益來源。
1015
太理性坐失良機
理性投資者因為擔心犯錯，投資成績往往唔及非理性投資者（如佢能嚴守止蝕唔止賺話）。非理性投資者經常因頭腦發熱而入市，事後可能令佢富有（如你肯買錯便止蝕離場）；反之，理性投資者往往坐失良機，因為佢地太擔心做錯。人人皆知擲銀幣最後結果一定係50％公、50％字。非理性投資者可以不斷擲銀仔，加上嚴守止蝕唔止賺，令贏面提升至75％；反之，理性投資者因擔心輸而唔擲，最後忍唔住手才擲，輸機會同樣係50％。
唔少條件唔差男士最終搵唔到老婆，理由就係唔肯去追女仔；而部分條件較差男士卻有唔少女朋友，因為佢肯放下身段去追女仔。部分讀者話，睇本欄五年十年，仍然賺唔到錢，理由係佢地怕犯錯，根本唔肯去投資！老曹介紹廣船（317），佢諗一年未有行動；我老曹推介一拖，佢諗六個月；去年推介南方航空（1055），佢認為該公司高層貪污；今年我老曹介紹建築股，佢話紮鐵工人罷工……太理性分析，因而忘記世上冇十拿九穩投資。
1987年10月20日香港聯交所曾宣布停市四個交易天；復市日恒生指數急瀉50％，令唔少投資者損失慘重。匆匆二十年過去，今天恒生指數較1987年10月股災前（接近4000點）上升接近七倍，較股災後（低於2000點）上升接近十四倍！內地A股過去兩年升幅超過400％，係咪極高？答案肯定。但有一點亦好肯定，就係十年或二十年後回望，可能一如2007年10月投資者回望1987年10月股災前港股，只係短期內極高，而中國經濟長期向上，長遠而言並唔算高。
1015
日本戰後1946年出生者，今年已六十一歲。1946至64年出生日本人叫「新世代」，佢地接受良好教育，並艱苦歲月成長，願為理想而放棄假期。呢群新世代一個接一個進入退休年齡，即未來十八年肯努力實幹日本人愈來愈少；反之，老人問題愈來愈嚴重……。1964年以後出生第二代日本人，佢地打高爾夫球最醒，大部分希望四十五歲便退休去享受人生。呢批日本人無論到世界乜地方，都可以見到佢地遊蹤；佢地叫做「無子女一代」（DINKS）即 Double Income No Kids。至於1980年代才出生日本人，面對1990年代開始日本經濟不景氣，決定成為單身貴族（即住父母家中，自己收入用買奢侈品）。整個日本最好一代（新世代）已步入退休期；至於享受型無子女一代，亦計劃提早退休，由對前途不存希望單身貴族接上，能否得起未來日本經濟？反觀中國， 1978年起進入飢餓一代（經過1960年代及1970年代文革洗禮，唔少人連吃飯都成問題）；加上教育水平低，只有死做爛做捱苦工。1997年起中國人進入改革開放後新世代，即接受良好教育成長一代，情況有如1960年代日本……。睇日本同中國此消彼長趨勢仍然會繼續落去。
品牌來自科技創新而非購買
踏入第四季，香港細價股紛紛跑贏老牌藍籌股（細價股早第三季冒起）。隨美元價一直弱落去，人民幣雖然兌美元升值，但兌歐羅卻貶值。相信明年係內地高科技股重振雄風日子，情況有如1960－70年代日本經濟逐漸放棄紡織業、玩具業，轉向當時被視為高科技電子業，其後日本電子產品雄霸天下。中國產品已達到國際水平，但缺乏自己技術同品牌，因此只能賺取整個產業鏈中溫巴仙到吐巴仙利潤，大部分利潤歸於技術擁有公司及品牌擁有公司。中國未來必須踏出呢一步──即擁有自己知識產權及品牌。我老曹反對收購別人品牌，例如過去TCL多媒體（1070）收購湯姆遜、聯想（992）利用IBM，都已證明失敗。品牌必須由自己公司創造，例如李寧運動鞋引入「弓型」理論，令運動鞋更輕巧、令李寧成為運動鞋另一品牌。品牌來自科技創新，而非來自非購買別國公司品牌。科技創新來自公司研究及國家對知識產權保護，只有將產品研製數碼化、生產控制智能化、訊息共享網絡化、商務營運電子化、企業管理精細化，才能將中國產品推向世界先進水平，將中國品牌變成精優產品代名詞。唔可能？請睇睇今天南韓平面電視上技術已超越日本，韓國人得，中國人點解唔得？去年起中國正進入製造業訊息化時代，透過引入CAD、CAPP、CAM、DNC、PDM、MPM等軟件，令產品由設計開始到製造模具、生產管理方面全面訊息化，逐步擺脫貼外國label命運，達到科技自主、品牌自己創造年代。
1017
寬鬆貨幣係泡沫根源
唔好同趨勢作對
恒生指數平均O二十二倍以上，早已進入極高水平，但唔好同趨勢作對（Don't fight the trend），冇人事前知道邊個水平才係群眾極度樂觀，通常樂觀比率達70％，方向才出現改變（上周五美國係66％，代表後市仍有上升空間）。從前美元由低潮回升如1973、87、93年，都對股市造成傷害。呢次美元2002年年初開始回落，何時見底？無法事先估計，唔排除今年第四季尋底。價值投資者可能失去ride this cycle機會而被left behind！8月17日至今資源股及中字派股份，上升到最後一期都有瘋狂現象出現，1997年紅籌股熱潮係咁，2000年科網股係咁，依家資源股同中字派股份亦係咁。當最後閒人都衝入市場去吸納高風險資產時，呢段日子先至係最易賺錢日子。至於點樣別人頭腦發熱時自己保持冷靜？講就易，做到卻難。圖表或可提供一定幫助。
中國經濟自2001年起進入小康局面至今，中國應該仲有十二年以上經濟繁榮期。中東則隨油價急升而進入高收入期，大量外盈餘到處搵出路。反而日本步入老年期，美國經濟高峰期亦過去（低儲蓄率影響力漸浮現）。由於中國有外管制，中國人每年只可購入5萬美元外幣，上述外幣相信大部分用作炒賣香港股票之用，支持住今年恒生指數表現。1982年開始美國經濟繁榮期，令美國家庭居住面積大量由1100呎轉為2500呎，美國人細屋換大屋潮到去年8月才結束。香港2003年4月起亦進入細屋換大屋期（由500呎以下換1000呎左右）。本港2003年至今細面積單位樓價升幅好細，大面積單位樓價升幅卻好大，可維持幾耐則木宰羊。
1017
貨幣學派佛利民曾講過，貨幣政策局限性就係固定價下，無法固定利率及控制失業率（呢方面香港政府已證明上述理論正確。1983年11月至今聯制度下，將港元同美元價固定，結果卻令港元利率及失業率大幅波動）。1971年9月美國放棄固定利率後，加強政府對利率及失業率影響力，但最終卻引發信用泛濫，演變成今年次按危機，令房地產價格回落及經濟受到拖累。房屋及金融服務佔美國GDP增長40％，呢方面影響漸漸浮現。流動性（Liquidity）並非代表一大堆資金，而係代表投資者心態。如投資者願承擔較大風險及銀行願意提供寬鬆借貸政策，便可產生流動性；即使大量資金存在，亦唔會產生流動性。換言之，流動性出現係經濟上一種行為或心態，例如1990年香港政府負利率政策下（利率低於CPI增長率），引發香港流動性。而內地股改到2005年下半年，亦引發流動性，情況有如堆滿積雪雪山可以長期靜止，一旦引發雪崩又有如萬馬奔騰，而每次引發雪崩理由唔同，出現雪崩與否又同積雪多少無關。
資產價格形成趨勢難阻止
凱恩斯亦有描述呢個現象。1936年出版The General Theory指出：資產價格（尤其係股票）一旦形成趨勢便不易阻止，例如出現向上趨勢而同時出現信貸寬鬆政策，便可產生流動性；股票價格一再向上，便產生股價重估，為投機者提供炒賣機會。
早上10時或11時出售後，下午又考慮重新返回市場……。股票迅速轉手，漸漸股價同公司業績資產無關，只受流動性所推動，直至去到一個極端。上述情況出現，心理因素大於真實價格預期，再唔受O、息率等掣肘，因為投機者只重一天、一星期最多一個月內利潤，而唔會理會該公司中長線因素，令傳統評估方法失效。個別投機者受當時意見、主張所引導，再由樂觀情緒或悲觀情緒所主宰，直到有一天泡沫爆破為止。
凱恩斯忠告係：寬鬆貨幣政策係引發泡沫根源，泡沫最後結果往往係崩潰收場。描述十分精彩！
1018
偷橋係成功之道
幽默大師Tom Lehrer被問及點樣成功，佢話係「偷橋」。其實，投資成功嘅道理亦一樣，就係向成功投資者「偷橋」，本港大部分成功投資者便是响房地產趨勢漸明顯時加入（例如1967至74年），然後一直追隨趨勢。可惜呢個大趨勢1997年結束，2003年起嘅趨勢係細屋換大屋（即大單位住宅升幅才會大）。
2003年4月起另一趨勢漸明顯，就係四叔教大家唔好再炒樓，改行去炒股，而且係炒同中國概念有關嘅股份！過去五年四叔來自投資中國概念股嘅利潤早已跑贏房地產。四叔亦唔自私，將呢條橋公開，歡迎大家「偷橋」！
英雄，時勢。好多時只係時勢造英雄，例如响上升行業中（1984至97年本港房地產）獲利；只有响行業不景氣時，真英雄才浮現（例如1997至 2003年房地產仍能獲利嘅地產公司）。換言之，既要挑選行業，更要挑選管理良好嘅公司去投資。响行業向上周期，係咪龍頭股並唔重要（因為 everything goes）；但响行業不景氣時，優質股同低質股分別可以好大。換言之，投資者先要學睇勢（即行業盛衰）而非睇市（後市點樣）；學曉睇勢後，應學習揀股（stock-picking）。至於學走勢，我老曹1970年已開始學，至今年已三十七年，可能資質問題，至今仍無法掌握走勢。以波浪理論為例，我老曹 1978年已開始學，至今仍唔了解。不過，連波浪大師Prechter响九十年代亦睇錯市（認為道指3600點見頂），咁我地做徒弟嘅，又點可以睇啱市?!我老曹早喺九十年代已放棄繼續研究波浪理論，自己花咗十二年時間仍未能掌握，唯有棄，而不用；反之，趨勢卻容易好多(例如一浪高於一浪，寧買當頭起，莫買當頭跌），只要該股每一低點仍較前低點高，即趨勢仍未改變。油價最近見88美元，打破去年高位，即大方向仍向上；至於油價能否見100美元一桶？木宰羊（如果見嘅話亦非好事）。近日油價上升理由係擔心土耳其入侵伊拉克產油區，而政治因素從來無法分析。
追求健康已成為現代人生活嘅一部分。科學家响實驗室利用白老鼠所做實驗得出答案：人類平均壽命應該係一百六十歲，而非八十歲！換言之，今天人類大部分係「中年早逝」，而非「死於老年」，只因生活中有幾大要訣冇遵守：A、三少一多（少油、少鹽、少糖、多做運動，例如每天三十分鐘或步行一小時），最好由三十歲開始。B、Less is more。例如只吃七分飽及每星期少吃一餐，原來短期飢餓可引發身體自我修補器官輕微嘅損傷能力令自己更強壯。C、身體嘅鈣去錯咗地方。年輕時人體正常吸收鈣去建立強健嘅骨格；三十歲後身體响處理鈣方面唔再如以前般有效率，結果令鈣响血管壁內沉澱，令微絲血管唔再似三十歲前咁暢通（中醫叫氣血運行得唔好），許多毛病由此開始，例如腦部由於無法獲得充足養分供應，記憶力開始走下坡（人類腦活動能力由三十歲開始逐步減慢），視力漸走下坡由四十歲開始（眼睛因無法獲充足養分而走下坡），骨骼因不獲充足養分而失去吸收鈣能力；五十歲開始出現骨質疏鬆現象。如呢段日子仍拚命飲奶，不但無助骨骼吸收，反而令更多鈣去咗唔應該去嘅地方，例如加速血管壁硬化而引發高血壓。過去為咗研究夜盲症，响溫哥華嘅Peter Pang醫生利用中藥理論，向夜盲症病人提供西藏蟲草及從魚油中抽取Omega 3畀病人服用，結果發現夜盲症病人响十天至三十天內情況大大改善。上述引起其他醫藥集團注意而進一步深入研究，結果發現四種草本植物有呢方面功效： fenugreek（印度人用嘅調味劑）；gymnema sylvestre；Konjac mannan（魔芋甘露，主要產自中東一帶）；nopal cactus（胭脂仙人掌，生長喺南美洲一帶）。如將四種草本混合畀血糖偏高嘅人士服用，兩星期或以上可見到血糖明顯下降30％、54％甚至84％（因人而異）；如服用六個月，不但血糖下降，連高血壓、膽固醇、三脂甘油酸亦漸恢復正常；如服用超過六個月，連骨格亦漸漸強壯起來，甚至記憶力改善。到底呢四種植物內會有乜嘢成分，令人體可恢復處理鈣嘅能力，令鈣唔再停留响血管壁而被骨骼吸收掉？依家芝加哥大學正進行深入研究。相信不久將來，將可為人類搵到如何活到一百三十歲而擁有六十歲左右嘅健康狀況。家吓已證實西藏蟲草加魚油中嘅Omega 3長期服用可令血管壁軟化同時強壯骨骼（係咪延年益壽則有待進一步研究）。上述消息令近年西藏蟲草售價狂升十倍，引發全球蟲草熱。
1019
滬深A股平均O達五、六十倍，住宅售價係每戶家庭年均收入十五到二十倍。好多人將中國情況同1989年日本或1997年香港相提並論，謝國忠認為並唔正確，因為中國政府有能耐把泡沫狂亂後殘餘撿起來再重新炒作，因為中國有蚊年咁做。佢認為，中國資產價格泡沫可能下周或明年破裂，但對中國經濟衝擊唔會好大，如把中國股市市值腰折，中國家庭財富降幅約20％，情況同美股下跌30％對經濟所造成衝擊接近。如中國房地產價格回落30％，只有富人抱怨，仲有銀行為呆賬所苦，但大多數中國人將很開懷。
中國都市住宅價格及中國股票市值加起只係中國GDP 三點五倍，日本同香港泡沫破裂前達GDP 十倍。中國資產市場唔係冇泡沫，家上海、深圳、香港上市國企，市值係35至40萬億元人民幣，相等於中國GDP 146至167％，但三分二以上股票由政府所有，市場上流通股票市值只有9萬億元人民幣，佔GDP 38％，情況同2000年納指一樣，股票自由流量微不足道，令網絡公司價值好嚇人。
中國房價同人均收入比較好嚇人，係因為中國人收入存在一些灰色收入（工資以外收入）。雖然係咁，中國住房價值係GDP 一點七倍（1989年日本係四點五倍、1997年香港係七點五倍）。
1020
福利制度拖垮德國經濟
2005年德國政府被迫修改法例：任何人失業一年以上不獲上述福利保障。上述福利制度原先目的係令所有德國人都可舒適地生活，唔使被迫從事自己唔喜歡工作，結果卻是拖垮整個德國經濟。地獄之路往往由良好意願鋪出來，例子數不勝數（例如1997年7月特區政府八萬五房屋政策）！
資本主義制度在發展初期係百花齊放，在呢個階段人人愛上資本主義制度；但發展到中期係汰弱留強，大企業由於資本雄厚，自然獲較優秀員工，銀行貸款甚多，甚至可上市集資，結果市場佔有率自然不斷上升，侵吞中小企生存空間，例如超市淘汰士多、連鎖飲食集團淘汰茶餐廳……。大企業繼續欣欣向榮，即資本主義制度到中期，而中小企業生存空間不斷減小，例如1990年後日本、1997年後香港。最後資本主義制度進入寡頭壟斷，即一個行業由少數大企業所佔據，別人無法入侵此行業。發展至此，便進入醜陋資本主義制度時代，如1920年代美國。美國政府通過立法去阻止寡頭壟斷出現（例如石油公司曾被拆開為七間公司、電話公司被拆為三間，美國銀行不能跨州經營等），以及開放市場引入外資企業去競爭。
以報業為例，1973年《信報》可以用40萬元起家，1987年《經濟日報》需要4000萬元資本開始。今天要經營一份報紙，要幾多資本開始？以施永青《am730》為例，以1 億元資本開始，聽講最近才收支平衡，但冇幾多人有1億元資本去創業？辦報已非資本密集型行業，更何況其他行業例如房地產，早已出現寡頭壟斷。能夠小本經營而獲利不菲者，只有靠天才（talent），例如歌星、明星、運動員等，其餘得個做字。
1025
小投資者常犯錯誤：
一、睇市唔睇股。8月17日至今恒生指數已上升50％，主因係8月20日中央宣布批准港股直通車，令中字派股份價格上升100％。呢段日子，唔少股份卻毫無升幅可言（甚至回落）；我老曹講十年以上炒股唔睇市，但仍然有咁多人犯錯。
二、唔理會宏觀經濟。例如1984年中英聯合聲明「草簽」中講明限制香港政府每年賣地五十公頃到1997年6月30日止。呢段日子，本港地價、樓價大升，但好多人卻唔曉投資房地產；到1997年7月1日「八萬五」政策出台，更加多人唔識避。2003年9月「孫九招」面世，好多人仍然問後市樓價點睇？ 2007年開始，美國有七千七百萬人按年進入六十五歲退休期，佔總人口25％，好多人仍然唔信美股2007年見頂（一如1990年唔信日股見頂一樣）。
三、泡沫形成初期散戶怕得要死，泡沫維持一段日子後，散戶卻忘記風險。大部分泡沫由形成到爆破通常歷時三年（例如1998年科網股，到2000年3月爆破）。內地A股由2005年年中開始上升，2007年下半年亦踏入第三年，即係已進入令人擔心時刻。我老曹亦曾犯過呢D錯誤，例如1973年1月恒指見 1200點已睇淡，結果三個月內恒指升上1700點，即再升50％。1974年7月恒指見450點便睇好，但大市再跌多半年，1974年12月跌至150 點才改變方向。太早睇淡或太早睇好都係死罪，Timing is everything。
四、不分行業全面睇好或睇淡。例如能源、金融、製造業、地產、航運業、原材料、資訊科技業，唔同行業有本身盛衰循環周期，不應一概而論。2003年至今地產、金融、能源、航運等行業表現不俗，但製造業卻在叫救命！2007年7月1日前後，中央政府取消大量產品出口退稅，鋼鐵股、鋁業股等應受打擊。
五、人云亦云，欠缺獨立思考能力，忘記20╱80定律（社會上只有20％人口成功）。如果你睇法獲得唔少朋友支持，請放棄。因為贏家永遠係少數。例如2003年4月有幾多人睇好港股？2003年9月有幾多人睇好本港房地產？到2007年第四季有邊個睇淡港股同本港房地產？經濟同政治唔同，政治係大多數一邊贏，經濟卻相反。摩根士丹尼首席分析員羅奇（Stephen Roach）提出五個肥年之後，全球經濟將面對困難。佢認為，八十年代開始經濟全球化已帶來不平衡，未來（2008年）隨美國消費者消費力下降，各種有形無形貿易障礙將出現，令1980年起全球出口雙位數增長時代結束；其中最受影響係亞洲區國家。中國GDP增長將由連續五年雙位數（2007年首九個月 11.5％）下降至未來五年8％，令依家過熱中國經濟進入冷卻期。Victor Niederhoffer最近《紐約時報》批評中國藝術品天價，令人想起1989年日本人用天價競投梵高《向日葵》油畫及1979年原材料高價時澳洲財團奔達出高價購畫事件。今年中國藝術品以天價出售，係咪出貨訊號？
樓價可升可跌，主要睇人口增長率及經濟增長率而定。例如日本人口近年增長率接近零，GDP增長率似有若無，便唔住過去十七年日本樓價。香港面對 1997年7月亞洲金融風暴兼「八萬五」房屋政策，樓價亦唔住；2003年7月中央批准內地人來港自由行；加上2003年9月「孫九招」，本港樓價又再欣欣向榮。美國2007年起進入退休高峰期；加上GDP增長率進入放緩期，美國樓價後市又點睇？
1029
畢非德成為全球第二（或第三）首富，方法係令財富每年上升22％。過去五年相信本港唔少人財富每年升幅大於上述巴仙；不過，畢非德格言係唔好輸錢，恐怕記得人漸少。1997年神童輝亦曾賺幾十億元，但忘記畢非德格言，最後一敗塗地。中國人智慧「創業容易守業難」；我老曹投資智慧係「賺錢容易保本難」！「九次好彩唔夠一次失敗」（用1萬元本金，每次賺100％利潤，九次好彩後變成512萬元，但只要一次失敗已可令你一無所有）。
高位買北控有機望鄉
股市狂躁症耐唔耐便發生，1997年紅籌熱下北控（392），1997年8月29日市價係64.75元，十年後今天仍未重返家鄉。北控所犯錯誤係周身刀冇張利，從事行業太多但冇一行做得較別人出色（多元化而非專業化），直到董事長衣錫群上任後，才糾正北控過去多元化發展，集中向能源及基建手。今年4月兼併北京燃氣後，9月傳出併購首創集團。首創以水務、房地產及金融為主，2004年曾提出回歸A股卻唔獲批准，近年發展唔錯，自然唔希望併入北控旗下。最終兩間國企會否合而為一？由政府決定。近期北控股價已因此而大升，1997年8月高價入貨者可能有望鄉一天。上周畢非德叫投資者中國企業股投資上小心，佢自己亦賣出所持中石油（857），理由係短期升幅太大（夏季至今升值一倍），依家市值已達4400億美元，漸漸接近艾克森石油（市值5080億美元）；艾克森O只有十三倍，其餘十間西方石油公司O十倍，而中石油O二十倍，即最少偏高50％。上海寶鋼市值420億美元，較美國鋼鐵公司市值大三倍，但產能卻一樣。國壽（2628）市值2450億美元，係Metlife市值五倍。
1030
1989年全世界都為日本鼓掌，並認為中國六四事件後冇希望，十八年後回望，結果卻相反，上述故事對大家唔知有冇啟發性？今天要介紹美國青年，佢剛剛大學畢業，年薪1.4萬美元，最近獲貸款72萬美元去買樓……。美國分析員今年一再指中國股市出現泡沫經濟。各位諗，上海女孩雖然年薪2萬美元，但一年開支只需5000美元，佢買樓（30萬美元）首期只係畀10萬美元，以佢地（連丈夫）未來收入計，完全可負擔20萬美元貸款；反之，美國青年年薪1.4萬美元但冇儲蓄，今天卻可以借到72萬美元去買樓。究竟邊個國家經濟存在泡沫?! 新加坡人均收入超港有因
1975至95年前，香港人均收入增長率同新加坡接近，其後漸漸拉闊。據《經濟學人》資料，2006年新加坡人均收入24840美元、香港22960美元。新加坡人均收入較港人高出8.2％，點解十年前人均收入低於香港新加坡可以反超前？呢點同兩地人口政策唔同有關。新加坡一如倫敦，只歡迎全球高收入、高學歷人士移民新加坡，人口中約三分一係來自各國移居，俱屬高學歷、高收入一族，自然令新加坡人均收入上升，佢地消費亦令一般新加坡人薪金可保持年率9％速度上升，香港「二八現象」並冇新加坡出現。反觀香港1997年後，外國人港數目就算未見減少，起碼亦冇上升（外籍華人唔計），每年來自中國三萬六千多人口，大部分係低收入、低學歷者，結果扯低本港人均收入（低收入人口大增，令低收入職位薪金無法提升）。新加坡計劃未來五十年人口由四百七十萬增加到六百五十萬，並向印度及中國招手，但移民必須係高學歷及高收入群；香港則繼續每天吸納一百五十個內地人配額（大部分係本港低收入者，到內地結婚後申請來港人士），形成香港低收入、低學歷者佔壓倒性優勢，香港經濟自然漸漸走向「二元社會」（即20％高收入階級及80％中低收入階級）。
1031
不要吹噓成功買賣
Johnathan Davis响《金融時報》撰文，認為所有投機者喺失敗前，都有令人不可容忍嘅傲慢態度，其次係失去自制能力，例如失去本金25％後往往方寸大亂。佢注意到索羅斯過去十年响別人面前從來冇提及自己一次成功嘅買賣。如果唔知索羅斯是誰，你可能以為索羅斯係金融市場嘅輸家；反之，Johnathan Davis曾訪問嗰D金融市場輸家，經常掛喺口邊嘅係嗰D成功嘅買賣。Davis認為，金融市場中嘅贏家係唔會忘記自己蝕本經驗者，輸家係嗰D只記住贏錢日子者。例如美國大投機家Jesse Livermore，佢一生人最少破產三次，佢不但有情緒問題，而且結婚數次，最後响大酒店自殺。因此Davis認為，即使你係投機界天才，都唔好為自己往績而吹噓，因為金融市場專收叻仔！我老曹响度轉載Johnathan Davis嘅分析係想告訴大家：一項成功嘅買賣，事後不但唔好吹噓（吹噓只係顯示你缺乏安全感）；而且要盡快忘記佢；反之，自己曾犯上嘅錯誤，便一世都唔好忘記，以免重蹈覆轍。犯錯一次可以原諒，如重複犯錯，咁就神仙難救。
