十張結婚相有八張都核突, 點解先

你有無留意而家既報紙多左一d婚紗相,
我估係一d酒樓既package黎既。
係果格3R size 既相下面,
就會講埋今日阿邊個同阿邊個會結婚,
恭喜恭喜。

之但係你有無發覺,
你人生入面都睇過唔少結婚相,
但係真係影得靚既呢,
又唔係好多。

個妝永遠都太厚,
個表情永遠都太生硬,
個動作永遠都好樹械, 唔知點解要飛圖 karaoke 咁既 pose
d 光又永遠都打得太光, 太平面。

有時個取景都好奇怪。

好似我上個 weekend,
我見到有兩對新人影結婚相,
一對就係中環港內線碼頭對出果條行人天橋影,
影住後面就係填緊海既工程。
另一對就係立法會對出果度影。

我唔識佢地啦, 但係我又真係好想知,
你地兩個同立法會呀, 填海既地有乜關係呢?
點解要揀係呢度影呢?

我諗,
一個人結婚既時候,
未必係兩個人最愛對方既時候。
因為佢地既愛會好容易俾好多其他野掩蓋左。

就好似一張結婚相,
其實呢張相要表達d乜野呢?
就係你地兩個之間既感情流露丫嘛。

但係你地兩個果 d 細微情感,
好容易就會俾果 d 濃妝, 跨張既 pose, 繽紛既場景遮住晒,
到最後, 我就只見到兩個生硬既 model, 毫無交流咁影左張相,
咁就一世架喇張相。

感覺, 係流露出黎既,
唔係形造出黎既。
我地唔係專業演員, 專業model
唔可以隨時就流d感情出黎。
更加唔可以係一堆化妝師攝影師打光師面前毫無 camera shy 咁談情說愛。

所以突然有一日, 你要影結婚相,
你就好易 fall into cliches,
太過刻意地去凝造一個開心樣, 一個好愛對方既樣,
一d都唔自然既樣,
即係chok樣。
所以就唔靚喇。

我自己見過一張結婚相係有會心微笑既,
相入面呢兩夫婦係輕輕錫緊既
但係我一睇就知道,
呢個kiss唔係攝影師落既order,
即係果d "係! 錫佢啦! 投入d! 塊面擰過d!"

我肯定無人會係咁大壓力之下可以由心咁鍚對方。

我問果對新人張相係點黎既,
佢地話, 張相係當日影相既時候,
個老公見到個老婆面上面有條眼睫毛,
就幫佢整走條毛,
之後, 兩個人近距離對望,
就有個衝動要鍚落去,
咁個攝影師就咁岩捕捉左呢個時刻。

呢個自然發生既時刻,
就係感情流露既時刻,
就好似當日佢地兩個相遇既時候,
自然地互相吸引既時刻。