聽聽你真正需要的是甚麼

呢排做返運動,
我開始留意多左自己身體,
我先發覺原來我地成日都忽略自己既身體。

我唔係話做BODY CHECK呀,
又或者自我檢查呀,
又或者照多幾下鏡。

而係, 原來我地既身體成日都同我地講野,
但係我地就一路都唔理佢。

每次你痕, 你痛, 你酸, 你痺,
其實都係你身體同你講野。

少少痛, 少少痕, 無野啦,
當你習慣左呢少少痕, 少少痛,
你就會好似無痛過, 無痕過一樣。

你既身體拍下你, 叫下你, 你唔應,
於是佢有一日, 忍無可忍, 就大叫一聲。
當你今次聽到既時候,
可能已經太遲,
你既身體可能已經千瘡百孔,
穿左個窿呀, 又或者生左個瘤呀咁,
怕未。

我而家學緊聽由最基本既方法去聽下自己個身體講既野,
有兩樣野係我地身體日日都會同我地講,
但係我地會用我地既意志去令自己聽唔到。

一就係幾時餓, 幾時飽。
之前已經有一個研究,
話我地今時今日食野既 DISH SIZE 已經大左好多,
換句話講, 就係我地食多左野,
但係食多左唔係我地身體需要多左能量,
只係食肆俾多左你, 等你覺得抵D,
而你見到咁大個DISH SIZE, 你又會唔爭在, 食晒佢,
久而久之, 你又會覺得咁大既DISH SIZE先係合理,
一個惡性循環又開始。

其實, 我地食以前既DISH SIZE都夠,
但係我地而家唔知飽。

你諗下, 我地好多時食完個好大既晚餐之後,
又會去食個甜品,
之後返屋企又食個宵夜。

你見到有咁多野食, 我地就貪, 又想食。
我地身體有話俾我地知我地飽,
但係我地又會用意志去死質自己個胃,
食到現晒胃腩, 食到已經唔覺得D食物有味道, 食到想嘔咁先會停。

而家好多人話要減肥,
其實你聽下你身體講野, 食岩岩好既份量,
就自然唔會肥。

第二, 就係我學緊聽我身體話我知我幾時累。

打喊露, 就係我地身體同我地講佢要抖喇。
但係我地有幾可會為意自己打個喊露呢?
好少。

尤其夜晚, 我地打好多喊露之後,
再等到對眼現晒紅筋, 標晒眼水,
都唔捨得訓。

點解呢? 又係貪,
睇埋套劇先, 上多陣網先,
真係頂唔順WOR,
不如整杯濃茶, 飲杯咖啡, 提下神先。
總之, 挨得幾耐就幾耐啦,
係喇, 我地已經用個 "挨" 字,
挨我地既私人時間, 不如訓覺好既仲實際。

有兩樣野令我地生命延續,
一樣係 DESIRES 渴望,
一樣係 NEEDS 需求。

兩樣野我地都要滿足。
渴望, 係滿足我地既心。
需求, 係滿足我地既身。

淨係滿足我地既 NEEDS, 我地係會原地踏步,
就好似體重咁, 我地需要幾多, 就吸收幾多。
咁就唔會點肥, 唔會點瘦。

至於 DESIRES 就好似頭先講果 D 上網呀, 甜品呀, 電視節目咁,
可以話係我地生活基本需求以外既野,
當然, 如果我地只係理會我地既 NEEDS, 而無 DESIRES,
世界就梗係天下太平, 但係社會又未必會進步。

因為我地既DESIRES 係想得到更多, 所以我地會有進步,
例如我地會搵更勁既提神飲品等我地唔覺得眼訓,
我地會搵更刺激既節目去唧多D精神再挨夜D。

但係一旦渴望同需求既平衡破壞左,
我地只係失控咁俾渴望拉住走,
我地最終就會俾自己既渴望摧毀。
因為渴望, 唔想訓, 我地精神日漸萎靡, 黑眼圈越黎越大,
因為渴望, 飽都仲要食, 我地身體儲埋更多剩餘物資, 血管越黎越窄,

到有一日, 果D奇怪病痛就會慢慢滋養出黎,
反咬我地一啖。

DESIRES 同 NEEDS 既失衡,
放係我地身上體會到,
放係我地既社會一樣體會到,
罪案, 戰爭, 就係咁樣慢慢反咬緊我地。