新房客....

近排屋企多咗個新房客... 仔仔... 因為佢個friend Bingo要做眼仔手術, 驚做完手術易整親, 所以仔仔就要暫寄响我屋企... 所以今次我可以過吓養狗仔癮啦...

仔仔係端午節嚟到我屋企, 正藉假期, 我屋企特別多人, 佢第一二日已經差不多見晒我屋企所有人啦...好似仲爭大哥一家人未見過...

家人都好歡喜仔仔, 因為佢第一日嚟就表現十分規矩, 無亂吠, 無週圍大小解, 仲唔入房添! 好乖仔咁喎...係夜晚我地要出街食飯, 留低佢一個响屋企, 閂門之後, 聽倒佢吠咗兩聲...噢...原來仔仔真係會吠... 我見佢咁多次都係第一次聽倒佢吠咋! 食飯時家姐同d小朋友知道屋企有隻狗仔, 即刻話食完飯要上嚟玩, 所以我地8點半就食完飯番屋企啦... 番到屋企, 我仲諗仔仔唔知會唔會發皮四唔知响邊度大小便發爛渣呢?  哎呀... 又無喎... 算你啦!!  d小朋友, 一入到屋都未停過, 不停咁叫住.."仔仔, 仔仔仔仔仔仔..." 仔到人都癲...成日跟住佢, 想抱佢, 追來追去...成間屋熱鬧晒... 唔知仔仔又有無覺得...嘩咁多人嘅? 好嘈好煩呀...咁呢?   好彩係佢唔吠...如果唔係就好危險...因為我屋企係唔准養狗, 如果捉倒就要扣分, 而仔仔亦要搬走啦...所以好在佢身形細細, 又唔多出聲... 所以都尚算順利... 就係咁仔仔响屋企過咗第一晚啦....

第二朝, 媽咪話仔仔夜晚潛咗入房, 瞓左响佢隔離...原來仔仔都痴人瞓, 阿媽又唔鍾意閂房門瞓, 無計, 咁仔仔一定會潛入去啦...因為大家無理由睇實佢唔瞓嘛... 不過第二晚, 我都盡力睇吓可唔可以阻嚇佢, 要佢瞓番自己個籃仔...佢好唔滿意, 好明顯好唔想, 但又好無奈咁...坐咗入去... 開頭一坐入去就即刻走番出嚟, 比我"NO!" 佢, 佢就好無奈, 坐番低, 睇倒我影佢相...

開始轉開.....

死唔望鏡頭....

死都唔再穌我..... 個樣幾串?!

就係咁同佢搏鬥到12點... 我真係頂唔順...瞓咗... 矇矓中, 聽到佢D腳仔, "達達達達達....又入咗去媽咪度..." 唉... 無計...我放棄啦....

之後假期完咗, 一切都回復正常, 不過發現仔仔夜晚開飯時唔食佢D狗糧... 一D都唔食! WHY? 細問之下, 原來媽咪阿嫂見佢夜晚唔食狗糧驚餓親佢, 所以有嘢食時就比少少佢食... 少少少少...咁即係食咗唔少啦...  仲比生果佢食... 咁好味! 梗係唔肯食狗糧啦!!

同屋企人拉扯咗兩三日...激死我!!  佢地覺得我虐待仔仔, 一日比一餐佢食咁少, 而佢又唔食嗰度死... (梗係啦! 你地成日响我番咗工就比D什糧佢食! 比我都唔食狗糧啦!)  仲話仔仔個肚腩都無咗喎... 又死唔聽我講, 狗仔係唔洗食生果, 話生果有益喎... 激到我响公司嘔... 我無諗過, 原本我以為養狗會係好快樂, 點知, 我會同屋企人冷戰... 最後, 我唯有向家姐求救, 等佢同媽咪傾,  ...最後媽咪話唔知我唔開心, 佢話, 既然咁, 佢會同我合作... 呢一場小風波, 終於都告一段落 THANK GOD!!!  因為如果再咁落去, 我會癲之外, 仔仔亦都唔知會有咩問題... 我仲要比佢平安回家嘛... 好彩好彩!!

星期日,  屋企只有我, 媽咪, 爸爸同呢位狗兄.... 睇佢瞓得幾LUM? 叫佢都唔醒....

喂喂...仔仔!!

仔仔!!

喂喂!!

嘩... 瞓到伸晒脷... 夜晚做夜更咩你?!

哈哈... 呢幅相... 應該係屋企依家經常出現嘅畫面... 好好...

真係服咗你地囉....

依家仔仔日日都有吠...每當我地由外面番屋企, 仔仔就會高興得吠起嚟... 好彩佢都係吠兩吓就停, 而且唔係好大聲, 如果唔係, 真係有D擔心比人捉...斷正就弊....

依家仔仔都已經識用佢個廁所大小解, 亦乖乖地正經食佢自己嗰餐狗糧啦...放心晒!!