TCHK 攀爬一族 --- 隨便通訊 之 10 - 10 - 2008 號

            攀爬一族          隨便通訊  之 10 - 10 - 2008號

各位親愛嘅族人：

依幾期D通訊斷斷續續，真係唔好意思。睇返轉頭，本族長已經三十幾日無休過息，連病住都要做証人代表上法庭爭辨，好多人以為做个樹藝師就只係摸下棵樹，但係做到 ‘執業樹藝師’ (IPA) 就好唔同，飛天遁地你都要識，早上可能係做樹木檢查，下晝就可能係法庭做辨護，而晚上就可能係教樹藝課程，而聽朝就又會帶埋把鏈鋸爬到六層樓咁高去鋸大樹。所以你地話，樹藝生涯係唔係多姿多采，絕無冷場丫！

講番上庭果便，以往本族長打過咁多場官司，死係佢手上嘅大狀亦不下數人，可謂從未驚過。但係依次就十分唔同，因為對家重金禮聘左個鬼佬 ‘英皇御前大律師’ Queen’s Counsel (QC)，實行以錢壓人，盡地一鋪。依個白頭QC果然名不虛傳，本族長係第一堂果陣由於唔做功課兼夾輕敵，結果成個晏晝俾佢砌到豬頭咁大，差D重全軍覆沒添。

痛定思痛之後，本族長係第二堂之前果晚成晚唔瞓，將成三層樓咁高嘅 ‘快勞’抽絲剝繭，逐張紙睇晒佢重做定notes，到第二堂果陣，精神抖素咁着番起件釘滿晒ISA襟章嘅 ‘戰衣’，實行同白頭QC離一鋪有佢無我。

大家一開火果陣，唇槍舌劍到全場雅雀無聲，佢有佢引經用典去踐到盡，本族長一於死雞撑蓋奉陪到底，大家你一言，我九頂，殺到星月無光，遍地屍橫，而個鬼佬官都似乎未睇過咁精彩嘅華洋辯論，全程重唔使翻譯而齋用英文進行添。

殺到食飯果陣，睇離白頭QC都已經光郎才盡，幾十条問題都無一条俾佢食中，都可謂 ‘將遇良才、棋逢敵手’嗱掛，佢点都估唔到D本地IPA原來咁犀利，同班乜師物師原來係兩回事，睇離對本族長勝算無望，不如收皮去鋤下一个証人重好喇。

本族長係庭上至今都係長勝將軍，可謂一為神功、二為弟子，如果我地嘅IPA一砲就俾人打沈左，咁樹藝行業又点可以係神州大地持續發展？

好喇，頭頂有一則ISA係IPM嘅國內報導，請大家細心欣賞喇。依次時間又到，有問題嘅敬請來电來郵！

攀爬一族   族長

歐永森    謹啟

本族口號：‘攀爬一族，非凡脫俗。能人不能，樹上貴族。’