網誌分類：未分類 |
圖片
網誌日期：2008-02-19 17:44
攀爬一族 鳳溪中學鏈鋸安全講座及示範
各位親愛嘅族人：
本族首先恭祝各位鼠年行大運，心想事成，萬事勝意！
本族係2008年2月16日果日，得到上水鳳溪中學嘅誠意合作，舉辦左一个「鏈鋸安全講座及示範班」。係依个班D訊息一出街果陣，唔使3日就20个名額全部爆滿，以事實去証明左香港地幾咁缺乏依方面嘅訓練。而家睇番果D乜乜物物嘅所謂 ‘園藝安全訓練班’、 ‘安全監督培訓班’ 等等，往往對鏈鋸依種殺人於無形嘅頭號凶器隻字不提，咁依D所謂嘅「安全講座」，又究竟係唔係夠晒全面、夠晒安全呢？
个講座一開始，個導師就馬上拎出D血肉模糊，心驚胆跳嘅鏈鋸意外圖片黎幫D聽眾提下神，之後就介紹使用鏈鋸需要D乜野安全裝備，點樣檢查把鋸，起動同埋使用等等。
講完理論，就梗係要去實地响下鋸，切下木頭嚟顯示一下鏈鋸嘅威力喇。鏈鋸可能係所有切割機器中其中一種轉數最高嘅機器，閒閒地每分鐘都轉番一萬幾千轉，你話如果切落D手指、大脾或者塊面度，後果會點就係人都古到喇，所以你話有人會胆粗粗去搏番鋪嘅話，咁就真係日本郵船 ---「遲早丸」吧。
依次依個免費講座俾左本族一个啟示，就係香港其實非常缺乏達到國際水平嘅樹藝知識訓練，而鏈鋸只不過係其中一種。所謂講就好多人都識去講喇，但係真係有能力去教去做又有幾多个丫？
本族現正計劃好2008年度嘅訓練計劃同埋考試大綱，依家只係等緊鳳溪中學審批啫，請各位密切留意電郵同埋網上公佈，多謝各位！
