TCHK 攀爬一族 --- 隨便通訊 之 23 - 7 - 2008 號

攀爬一族          隨便通訊  之 23 - 7 - 2008號

各位親愛的族人：

本族一向獨立創新，而家又發明左個‘隨便通訊’，為的只係要去適應環境，奈何？

點解會咁？因為兩位副族長都忙到無時間食飯，而本族長今晚六點半又要坐飛机去新加坡出席佢地誠意邀請果個SGF Expo展覽會，各位都會想到係點架喇。

講起依次果個星州大展，人地出到局長級的人馬到港親自拉夫，當反應唔理想果陣，重親自打電話去到D政府部門度落足咀頭，所謂‘精誠所至、金石為開’，有兩個政府部門搞到要派出D中層人員出離應酬下，依D就係所謂的 G to G，以免日後大家見面時唔好意思掛。

本族長其實已經去過新加坡50次以上，係果度重做過工程，又俾過講學，當然去此地就架輕就熟喇。依次去的兩大任務，第一就係要大力宣傳我地攀爬一族同埋我地果D訓練計畫，一於推銷香港去俾新加坡。第二就要係要搵出佢地果班本地爬手，向佢地立下戰書，係今年九月中佢地果個‘亞洲區首屆攀樹比賽’裡便同佢地晒冷。聽講話依次比賽係9月13號至14號舉行，到時本族希望能夠組織一個龐大代表團過去踐場，本族的大、中、細號人馬全部到齊，係佢地果班班黑猛猛的爬手們面前一於爬反佢地，希望掃晒D獎杯返香港開記者招待會，咁你地話到時會幾好呢！

拿，發夢就早左D喇，先準備好依次行程至係實際，本族長而家連底衫衭都未執好，唔通真係‘一件背心走天涯’咩。各位未來幾日如果有族事，可以去搵李國文副族長 (6182 0075)傾下，其他的就勞煩各位等下本族長係7月28號返離再傾喇！

就此請請！

攀爬一族   族長

歐永森    謹啟