你今日諗左未？

成日聽人話每日起碼要做三十分鐘運動，跑步、游水、行路乜都好；但係從來冇人提倡每日起碼思考半小時，做下Brain Gym。其實此事值得政府、NGO、大眾傳媒推廣普及，絕對老幼咸宜也。

首先定義何謂我所指嘅思考：並唔包括打機、玩數獨、猜燈謎同答IQ題，呢啲行為當然可能要推敲、歸納、證證、運用邏輯，但始終都係受遊戲程式、問題、situation擺佈而去反應；為工作而思考都唔算，好似我輩廣告人咁，成日為客戶度橋，其實都係被動式思考，只係為解決問題而功利地籌謀計算。

我所指嘅主動思考，其實係喺無需任何道具之下，任由腦袋自說自話，自問自答。思考的主題及內容，全屬自由決定：可以極度無聊，可以超有意義。你可以思考人生的意義，亦可以思考藏獒與波斯貓之間不為人所知的關係。前者，可稱為有關自身的思考，其實對了解自己極有幫助，例如反思自己是否真的喜歡現時在做的工作，便可明白自己真正的工作取向；又例如監察每日的情緒變化，哪些時候會出現負面情緒，便可明白自己的弱點加以改善。後者，可稱為創意思考，將本無關係的事物拉埋一齊講，或從新角度講述一耳熟能詳之事物，從中make fun，亦都好開心。

那為什麼要鼓勵思考呢？因為這樣做，每個人將會活得更有意義。現在做人真的太忙，讀物隨手可摘，iPod音樂隨耳可聽，但是有關自身的事業、人際關係及整個世界，大家又可有認真、深入思考？若然噩噩渾渾，純粹靠運氣、靠一時衝動來決定命運轉向，到後悔已來不及了。

其實，我以前也想太少了，所以在選擇大學科目、工作等事情上，都太過輕率，像沒經大腦似的…有腦唔用，其實好嘥！真係應該要用多啲呀！