伴奏這份工作

剛看到一篇　請尊重伴奏這份工作 --上 (Marcato)　的部落格文章，也令我有所感想。

伴奏是一份相比教琴為較為不著眼的工作，但其實責任同是非常重大，以前的我很怕伴奏，經常怕累人家踏沉船，且又要練琴，自已Sight Reading 又不太好，一首五級考試歌伴奏都要練上好幾天，一首八級伴奏曲目更要一星期以上。倍考試比賽更要花半天或一天（如果比賽中場有break），車程早午餐都差不多一百，以校際唱歌為例，香港區比賽例牌地點筲箕灣教會或尖沙咀非近地鐵站教會、新界西例牌屯門紅橋、新界東例牌近沙田第一城方向的富豪酒店，全部都是舞雷公咁遠，總知女王一定要轉車．．．．

而家ｄ外來家長學生．．．唉你開價收佢一千幾百，佢便會嘩嘩嘩，通常我都不多情願接這一些沒有禮貌及唔知價的客仔。

其實好多時我都真係當為興趣，而不收取自己本身私人琴學生，另外非鋼琴樂器比賽或考試伴奏費用。不過，部份我唔收佢，佢又會唔怕唔好意思成日叫你幫佢ｄ仔女夾，其實公價伴奏好多時都係夾一兩次，連陪考試場地係一個 Package；事實上，要你成日夾嗰ｄ，通常都係本身上堂暈暈哋（雲遊四海）嗰隻，其實一個專業負責演奏者，一定是把準備要考試或比賽曲目預備好後，再找一個專業伴奏，夾一兩次便可表演或考試。

伴奏職責是伴奏，職責不是搶你老師飯碗，更不是助教、補習或陪練！其實好怕要幫演奏者要每小節執佢ｄ節奏、音準，有時仲要執層次風格，大佬！你有無耳仔，一句聽唔到、不知道、好驚等回應，便是解釋 懶 及 聾 的萬能藉口，我沒有Pitch，又不是主修弦樂、銅管樂或木管樂，都聽得出你彈錯，聽完又聽，您都係走音。

有時幫佢地夾，我都唔知係老師問題定學生問題，當然其實係學生問題居多．．．譜上指示details 完全唔 details，佢地一味話唔知，老師無講，但份譜又見老師用鉛筆圈出，跟住家長便會推說老師不嚴謹。

不過倒試過幫一個二級小提琴伴，她的年青小提琴老師，叫她把所有重覆符號重奏一次、又見過一個人哋學生的Scale書上，寫上 Bartok Period、又試過一個人哋三四級學生，把樂曲複雜節奏省了演奏，令小節無端端少了一拍．．．

女王伴奏亦見到很多家長學生好 mean 的個案，試過有家長學生要求夾一兩次，但又要你錄音錄唱，其實坊間有些琴行要個 Package是夾十至十二堂，夾一兩次跟本不會接，事實上伴奏花在練習時間及精神，遠於一般獨奏教學。

你求其找個八級無經驗小朋友伴奏，佢仲表現衰過演奏者，如果演奏者本身技術一般，海軍鬥水兵，你又沒要求，倒沒所謂。不過，如果本身想在考試及比賽取佳成績，是應該不要吝嗇伴奏費用，咁你當初應該選擇獨奏，終身孤寒孤獨。

不過，女王倒喜歡伴奏工作，雖然大部份沒有薪酬，因亦可從演奏者身上，學習其樂器本身獨有演奏技巧及音色，增加自身對樂曲演繹想像，亦可了解作曲家在不同樂器其相同及不同作曲手及特質。

但今年會有象徵性收費，自今年開始，其實希望減少很多義務性工作，一來身體心理狀況已經不大如前，其次目的是，真不想學生再依賴我這個沒無薪伴奏，真正專業演奏者，是要自己用耳，而不是用伴奏的耳去幫你聽你的音色細節。