後記

今次為咗遷就媽咪爸爸，唔好令佢哋咁辛苦，專登將啲行程安排到好鬆動，每日只係得一個景點。雖然係咁，但唔知點解個人反而冇咁relax，仲比上次攰好多，可能今次要做導遊，負責晒所有嘢，因為佢哋兩個又唔識日文又唔係好識字，要睇實佢哋，所以好似返緊工咁，精神好緊張，唔似得上次咁，自己一個人自由自在，想去邊就去邊，唔駛好似今次咁，skip晒啲我想去嘅地方。不過可以帶佢哋去佢哋從未去過嘅日本，食下嘢、體驗下咁，都算值得。

下次如果再去日本，都係同差唔多年紀嘅人去會好玩啲，又或者可以一齊睇旅遊書，上討論區，一齊plan下行程，唔駛自己一個人負責晒，分担下工作咁，會relax啲。

下次去日本，想去輕井澤渡假，去神戶有馬溫泉，抽全日去台場玩盡佢，同埋喺東京捐窿捐罅shopping探險咁～

日本，等我吖！！