九龍酒店

前幾晚同啲朋友去咗"半島酒店"後面嘅九龍酒店到食buffet,原因係佢哋裝修過之餘,其中一個朋友有一張8折優惠卷,我唔清楚原價係幾多(好似接近$400),但8折後再加一,每位大人就要比$360~, 小童我唔知幾錢,因為好好彩大小姐唔夠7歲,所以係免費嘅~

收得人成$400/位,都要有返咁上下質素嘅野比人食先得架,佢哋都有生豪,但就係"即開生豪",我真係試過食到有兩隻豪係好勁海水味添,至於和牛粒就係派"飛"形式,每人只限一份,但我見一份都有8-10粒,佢哋話都ok,但有啲都話"un"咗啲,刺身就好似"削"咗啲咁,唔係太多款式,生文魚我食果一份我就覺得好新鮮,但大少話食過一份係唔係好得~

我哋食梗嘅時候,侍應就按人數派問卷比我哋,而每一份問卷做完之後就攞份問卷做抽獎,我哋就有兩次抽獎機會,但都係抽到8折buffet優惠卷,另一個朋友抽到兩次都係綠珠,佢就選咗一份係"飯團毛巾",另一份就係"米袋手繩",跟住我朋友見到佢哋有啲日本米係到,於是就問個帶位嘅女仔

朋友          :  你哋啲日本米係抽到咩色嘅珠先有架(因為我朋友覺得呢啲應該係大獎)

個位帶位小姐就係 無表情 + 無感情 嘅情況下"贈"咗我朋友兩個大字,就係..........裝飾

我朋友當時聽完之後幾乎 "啤" 一聲咁比佢激到吹脹, 但佢返嚟同我哋講,就笑到我哋死囉,咁樣比人幽咗一默, 哈哈哈.......

當然以下嘅食品唔只凍檸茶一個人食晒啦,有幾張相係我叫我啲朋友借我一影,如果單係我一個人,我邊食到咁多野呀,所以係到特別鳴謝我啲朋友嘅拔刀相助是也