給菲姐點中了

給菲姐點中了，怎也要答，就當給大家了解一下我吧。看招：

寫出填寫日期：2007/9/3

1.如果嫁不出（娶不到）你會怎樣？
日子點都要過，一切如常啦，唔通出去蒲嚟識人咩，呢個唔係我。

2.如果有機會可以讓你重回一個時間，你會選擇回到那個時間？
大學時代，仲要不停Repeat

3.你希望在別人眼中是怎樣的人？
平易近人，值得人信任，能幹

4. 如果唔駛返學／返工你會點呢？
鐘意做乜都得，有錢咪去旅行，去外國生活吓，無錢乜喺屋企HEA吓，總之就會駛用腦去諗咁多嘢就得啦

5.如果中500萬獎金，你會怎麼花？
買一間夠我屋企人一齊住嘅屋，要一人一間房，不過唔駛係豪宅，例如一幢三層高有天台或花園嘅村屋都得；如果仲有錢剩，就買藍籌股，收股息嚟養老；如果仲有少少錢剩，我真係好想學Flute，自中學時嘅夢想。

諗落500萬唔多夠，淨係買間村屋都用晒，條題目可唔可改為1000萬。

6.你最怕的事情？
最怕人鬧交，一聽到人鬧交、辯論、有人被人質問，甚至係睇城市論壇都怕，你話我點做律師呀，我連記者都做唔到，我係和平主義者。

7.你覺得邊件事係令你最難忘既？
一家人去桂林旅行（目前為止唯一一次）
亞洲哥哥結婚（全家都好開心）
唔開心嘅唔講啦，抹走佢！

8.這輩子最想去的地方？
歐洲，尤其古色古香嗰啲地方

9.你能放下現在的生活，去鄉村或其他城市重新開始嗎？
其他城市還可以，鄉村就唔係好得

10. 最愛的食物：
哈密瓜（啱啱食完）

11. 最愛的顏色︰
有人喜歡「藍」，鐘意佢嘅舒服

12.最愛的休閒：
秋天時，在四點零五點，太陽未落山時，一個人坐喺裝修到清雅嘅Cafe，嘆杯凍飲，手上拎住本書又唔係睇，而係睇吓周遭啲人行來行去，乜都唔駛諗。

又或者拎住個相機周圍去影吓相。

如果係講去旅行時呢，就係喺一個靚景前面，坐响到用畫筆畫低呢個靚景（雖然我唔識畫畫）。

13.最想知道的事：
1) 我老闆幾時唔做，或者
2) 下期六合彩嘅號碼，我中咗頭奬就則即刻劈砲唔撈，去埋十一月嗰旅行先再搵工，咁我就唔需要知我老闆幾時唔做啦。

14.最愛的人：
唔駛問，一定係屋企人

15.最愛的口頭蟬：
都幾好攪笑

16.　最愛的小動作：
好少留意喎，有無人知呀？

17.　最愛的季節：
秋天，秋高氣爽，做乜活動都好舒服

18.如果可以同任何人交換身份，你會選擇何人?
呢條最難答，我想揀吳彥祖，佢又靚仔，又FIT，又高大，有學識（人家是讀我夢寐以求的建築系），又識多國語言，又有個名模女友，工作成績都算唔錯，起碼有大量女Fans，我諗佢家底都唔差，仲要識工夫。做到佢都算夫復何求啦。

缺點係要我變性先做到佢，聽聞佢都好專一，咁做佢女友都好喎（留意，係做佢女友，唔係做Lisa S.）。真係發夢都無咁早。

19.　最了解我的人：
一定係我阿媽，因為佢係唯一一個可以一矢中的咁篤中我個死穴，而令我無聲出。

20.　假如有一個願望~會想做咩?
認真嘅答案：醫好所有人（包括地球），令全世界身體健康，無病無痛，無晒污染
瘋狂嘅答案：俾我有錢過拉登，有大把時間，俾我做我鐘意做嘅嘢（例如買起拉登個塔尼班，等大家搭飛機唔駛再有咁多安全措施，搵人攪掂布殊等等）

21.　最想見的人:
好耐好耐無見，又失去聯絡的舊同學，尤其係Y君，因為我同所有小學同學都失晒聯絡

22.　愛的定義：
當對方開心時，自己會開心；佢傷心時，自己會傷心；為了佢，可以忘記自己的事，最緊要佢幸福。呢樣嘢Apply落任何我愛的人。

23.　心中的目標：
工作順利，份工有人工加，Keep到通脹，可以養到自己和阿爸阿媽到老，有餘錢就讀吓書

24.　愛我的人︰
依家嘅話咪係屋企人同朋友囉，希望遲啲會多一個啦

25.　最喜歡的地方：
屋企

26.你介唔介意人地點睇你:
介意，唔介意嘅話係答唔到第三題嘅

就此打住，答完都差不多暴斃。實在不喜歡這類連鎖Message，我不會點其他人的！