酷愛電影

我以前只係鐘意睇電影,但係隨著我係9年前讀過史sir o既電影課程就真係愛上了舊電影,比起宜家花巧o既電影,舊電影真係好有戲味

萍水相逢明天可能你會忘記呢個blog了

Je vous salue, Marie

網誌分類：電影 |

網誌日期：2009-09-16 22:52

聖經之中,童貞女誕下神o既兒子為世人贖罪o既故事我諗大家都耳熟能詳,就算唔係教徒都會聽過呢個前無古人,後無來者o既故事,當呢一個故事擺係高達手中又會變成一樣甚麼o既事情?佢當然唔會咁順攤,只係作出搬字過紙o既舉動,而係變法出一套面目全非o既故事,當中並唔係單單由宗教o既角度出發,轉而用上多角度o既approach去解構呢一件事。

呢一套電影最破格o既就係將時代背景擺左係現今社會,貞節究竟仲值幾多錢?係呢一個貞節已經唔值得再留守o既時候講一個關於貞潔純愛o既關係都真係幾過時同守舊。不過高達就偏偏揀用呢一個背景,去令觀眾去反思一下宗教,貞節同時代之間o既矛盾。高達更係故事中加插左另一段親於一個出軌教授o既故事,正正同童貞女o既故事打個對台,達至一個極之大o既反差o既狀況。

呢兩個相對o既故事係發展之上都係剛剛好係一個對,首先講講主線o既故事,呢一位咁"幸連"o既女子係一位中學生Marie,佢閒時係老豆所開設o既油站度會幫下手。有一日,一位神秘人Uncle Gabriel出現,上左Marie o既一位男友Joseph o既的士,走去Marie老豆o既油站話比佢聽佢即將會懷有身孕。呢一個係極之驚天動地o既事,因為Marie仲係處女,根本無可能會懷有身孕,呢個亦都令到Joseph對Marie出現了一點疑心。不過亦都係因為呢一種懷疑,吸引到Joseph對佢o既痴心一片,就好似一塊電磁石通了電般,將Joseph拉得更緊,遠離對佢黎講已經屬於過去同缺乏新鮮感o既Juliette。個一位神秘人Uncle Gabriel除左好似先知咁提示左Marie之外,更會神出鬼沒係Joseph o既身邊,更用掌摑去喚醒Joseph,令到佢Marie示之以誠。同時間,Marie亦都開始同天主透過冥想去接近上主o既所想,超脫身體o既規限,唔再拘泥於驅殼之中。亦因為神伸手去賜左佢o既私生子比,禁止Joseph去觸摸自己,將二人o既愛提升至柏拉圖式,超然於天地之間。呢一個故事其實都比較難去理解,當中高達引用左大量o既哲學式同文學式o既字語去交代Marie同Joseph o既關係,太過意識流同埋缺乏一個故事o既進程,兼且有大量o既jump shot,莓就算係高達o既fans都未必會頂得順。Marie同上主o既交流,當中更加插左大量日出,草地,雲彩,月亮,花朵同流水o既畫面,見證住呢一段立於天地之間o既愛情故事。呢一段關係就以一個平庸o既戀愛故事開始,再慢慢變成一段超脫於一般o既關係,容納於宇宙萬物之中,仲帶住一個larger than life o既任務。

至於另一段關係就係之前所講o既平庸得很o既男人出軌故事,一位教授同一同女學生搭上,同佢過左一個假期之後就o趙完鬆。除左呢一段係關於一個以愛傷人o既故仔,係現代愛情o既寫照,難度仲講咩忠誠同信用咩,又唔食得又唔好玩,呢d就係現今愛情觀。而同Marie做到一個對o既理由除左呢樣野,就係二人o既開始係講一d關於宇宙,銀河系同生物誕生等等極之艱深同宏大,之不過呢一個只不過係開頭,呢一段關係慢慢跌回地面,腐爛起來,到最後更化為污有,以一個極之醜陋o既面目結束。

睇到呢度為止,高達好似幾崇尚同歌頌Marie個一種對愛情o既價值觀,不過佢又鬼意留下左一氣尾巴出黎,Marie係生左Jesus之後,執起唇膏將佢個片薄薄咀唇搽得紅紅,彷彿開始抬回成熟之後個一種sexuality,落入番凡間個一套對身體o既理解,脫離左之前佢同神溝通之後達到個一種身神(spiritual)合一o既境界。我覺得高達呢一個延伸又幾合理,聖經中o既一切o既角色都寫得太完美無暇同神化,缺乏左人性o既存在,高達去用呢個切入點去挑戰宗教又真係合情合理。當大部份宗教人士只係批評片中Marie o既裸露場面根本就係缺乏智慧同多鬼餘o既表現,若果唔係各位大爺心斜,呢d裸露場面又有咩問題?呢d傻人竟然斟酌係細節之上而忽略左被人挑戰o既大原則,究竟係眼光狹窄定係扮傻,就真係不得而知了。

引用(0)

知多一點：

共1個回應

檢舉
叮噹 2009-09-16 22:57

總是喜歡來您這尋寶～賞好文︿︿
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

檢舉
拉素2009-09-16 23:04

邊度有好文?劣文就大把。