酷愛電影

我以前只係鐘意睇電影,但係隨著我係9年前讀過史sir o既電影課程就真係愛上了舊電影,比起宜家花巧o既電影,舊電影真係好有戲味

萍水相逢明天可能你會忘記呢個blog了

Laberinto de pasiones

網誌分類：電影 |

網誌日期：2009-10-10 20:36

艾慕度華係"奇情"片之中可以當中o既先鋒,呢一樣野係無容置疑,呢個都同佢係西班牙出生有關,操西班牙語同葡語系o既人都比到其他人一種熱情奔放o既感覺,性o既活動就有如一種禮儀般,唔知呢個係我對佢地o既錯覺定係真相如此都好,你一睇完艾慕度華o既電影都會有呢一種感覺。觀賞過佢比較近期o既電影同《Law Of Desire》之後,都對呢一位導演處理性,愛,欲o既手法真係令本人極之讚嘆,劇情異常地複雜,起初追o既時候會有所困難,但係你慢慢睇落去又會漸漸地融入到電影中o既世界。但係我覺得呢一套更出色o既原因就係當中夾離往o既搞笑原質,幾近瘋狂o既程度,用係呢一類故事縱橫交錯,直頭係有一種如虎添翼o既感覺。

當中o既故事就係講一位中東同性戀王子Riza落難到馬德里,係呢一個新o既國度搵野食,仲係一次偶遇之中交上了一位穆斯林恐怖份子,好彩呢一次擦身而過,Riza o既身份並未有揭露,如果唔係早就比佢地捉左去做人質,威脅番該中東國o既王帝。片中另一位主角就係Sexilia,聽佢個名就知道佢呢位女子係如何地熱衷於性愛之中o既band友,最搞笑就係佢老豆係一位性冷感o既男人,所以致力於佢o既醫學研究,人工受孕,係無性愛之下成就下一代,二人雖然係同一血脈,但係二人對性愛態度o既迥異又真係幾過癮,當你以為呢一個設定已經係最頂癮o既時候,你就錯晒喇,去到片尾o既時候有一個更爆o既結局。

係馬德里呢個咁大o既城市之中都比呢兩位人兄遇上,就係一拍即合,不過二人只係停留於柏拉圖式o既愛情之中,呢件事簡直係匪夷所思。但好事就成之際,多磨事就會係呢個時候爆發,中東國因為無所出o既前王后係呢度再一次遇上Riza,被遺棄o既感覺又再一次湧上心頭,冇個大o既都食住個細o既先啦,呢一件事令到Sexilia極之懊惱,就係呢一個腦海之中極之混亂o既時候,比佢記番起二人細過曾經相遇過,個陣時o既情況同宜家情況相若,又係二人兩情相悅o既時候,王后佔據不了王上o既心就退而求其次,就係呢一個誤會之下Sexilia變得縱欲,同時Riza就中途轉基。當真相大白o既時候,Sexilla當然最想同Riza遠走高飛,又咁岩係之前比佢識到一位一直仰慕Sexillia o既歌迷,呢一位歌迷係屋企受到父親o既侵犯,Sexilia就為佢提供左一個出口。首先做一個整容手術,同自己o既樣貌一樣,呢一位歌迷既可逃離家庭,融入去佢一直趨之若鶩o既生活之中,同時Sexilia又有一個替身幫佢脫離過去,同Riza遠走高飛,一舉兩得。

之後我話最爆o既就係呢一位歌迷最後竟然以Sexilia o既樣貌同佢對他人個一種關懷取悅到Sexilia個位性冷感老豆,黎一個"不倫"之戀。所以之前佢被父親侵犯都唔出聲又唔夠膽反抗係有佢o既理由,佢根本就係喜歡比佢年紀大o既男性,但係父親就係一個錯誤o既投射,去到Sexilia o既屋企就比佢搵到一個適當o既位置。成套戲就係出現不同o既錯摸同誤會令到好事多磨,但係呢d多磨都係人生o既歷練其中o既一種,人生缺少左呢一d歷練又唔會完滿。

經歷過呢一d瘋狂o既過程之後,個一班穆斯林激進份子連帶個位前王后又再出動,令到Sexilia同Riza唔走唔得,展開一段最後o既狂奔,Sexilia同Riza快人一步上左機,剩下o既就只有個一班穆斯林份子同王后,呢一班"狂徒"執唔到個橙都執留個桔升數啦,皆大歡喜,黎個大團圓結局,平時o既電影同電視劇我就好抗拒呢一種結局,但係若果係喜劇就冇咩所謂,無理由係最後尾摧個淚咁掃慶嫁,你話係唔係?

引用(0)

知多一點：

共1個回應

檢舉
BiBi 2009-10-14 00:44

This movie is crazy but I like it! In the beginning of the movie, the shot of the lower part of male and then the appearance of Sexilia. They are very "Almodovar"!