酷愛電影

我以前只係鐘意睇電影,但係隨著我係9年前讀過史sir o既電影課程就真係愛上了舊電影,比起宜家花巧o既電影,舊電影真係好有戲味

萍水相逢明天可能你會忘記呢個blog了

留言

Whatever Works

網誌分類：電影 |

網誌日期：2009-10-19 21:36

Woody Allen環遊完歐洲番去紐約呢個紮根地之首作,以一位老鬼Boris作為電影o既重心,呢一位老鬼說話尖酸刻薄,厭世,看似睇透整個世界似的,佢係一位曾經係一位好出色o既物理學家,但係人到左佢呢一個年紀,並唔再追求愛情,金錢,但求日日同d朋友吹下水,食下野,玩下樂器等等,可以話係同生活緊o既城市紐約格格不入,所以經歷過段段感情挫折之下唯有選擇孤獨終老吧了。

就連上一次佢o既婚姻係不明不白o既原因之下以跳樓為終結,佢得到o既只係一隻一拐一拐o既腳。就係呢一個萬念俱灰,沒有生氣o既Boris生命中,突如其來了一個來自密西西比州o既女子Melodie,出生於一個保守o既基督教家庭之中,令到Melodie完全地吃不消。為左逃出呢一個有如雀籠o既家庭,佢孤身上路,遇上同樣孤獨o既Boris,係半推半就之下Boris又唔捨得將呢位柔弱o既Melodie拒諸門外,唯有收留佢啦。

二人年紀相差成40歲,Boris極其量都只可以擔當Melodie o既父親,再加上Boris個一種凡事看透同成日將大道理掛係口中o既性格,同天真無邪o既Melodie簡直係南轅北轍(求其搵個男人屋企就住係個度你都咪話唔危險)。不過好多時男同女o既關係就伙建基於呢一種不同,初生之犢o既Melodie對Boris不知何時開始產生愛意,仲不時讚佢係一位genius。話晒女士係鍾意選擇一d比佢地成熟o既男人,大佢咁多o既Boris絕對係合晒佢意,加上係屋企成日撞口撞面,對佢o既欣賞好容易與日俱增。另一個好主要o既原因就係同Boris相處之下,Melodie可以學到好多野,尤其係建立人生觀之上,Boris可以話係良師益友。係另一方面,Boris又係Melodie身上得到某程度上o既活力同重生,只係佢身體之上力有不逮。

縱使Boris起初接受不了Melodie o既愛,但係當Melodie初次約會其他男性o既時候,Boris o既心又忐忑不安,佢又墜入情網之,呵呵。二人終於閃電式結婚,二人o既相處可以話係架輕就熟,當中無咩大問題。但係當Melodie o既媽咪Marietta出現之後對呢一位女婿諸多不滿,仲暗中為Melodie搵左一位同Melodie年紀相約又浪漫o既James想佢取代個一位年紀大,又成日句句針對住佢o既Boris。同一時間之中,Marietta結識到Boris o既朋友Kelvin,就係咁Marietta o既生活作出左翻天覆地o既改變,簡直係眼界大看,本來係一位村姑,係屋企相父教子o既佢,搖身一變成為一個artist,同兩位男士同居,衣著亦都變得不再從前,紐約o既影響力可真不少。之後再到佢老公John殺到,佢本來黎到係想搵番Marietta同Melodie組織番一個傳統o既家庭,至於呢一個家庭o既瓦解就正正係因為John o既出軌。到頭來因為另一段開係失敗左之後又想倒番轉行,不過呢個世界冇咁著數o既,John望見如此o既場面根本唔知點算好,唯有去酒吧借酒銷愁。不過世界上係充滿住希望,比佢係酒吧遇上Howard,一位剛離婚o既同性戀者,之後發生d咩就唔駛講到明喇,哈哈。Boris同Melodie呢一段婚姻除左表面係脆弱,實情連內裡都一樣脆弱,只要係Melodie身邊出現左一位有如白馬王子o既James,Boris個一種沉著同智慧根本無法同佢鬥,講到最後,Melodie都只不過係一位年青少女,好需要呢一種浪漫愛情o既沖擊。再一次婚姻失敗o既佢又再一次跳樓,不過今次跳樓撞到一位路過o既女人Helena,又係一段愛情係誤打誤撞之中誕生了。

最後片中各人都有得到其所愛,並非有如之前個一種生活的dry,尤其係個一個密西西比o既家庭,本來被一遍保守同沉悶o既風氣所濃罩,呢種種o既拘謹只係黎到紐約就輕輕打破,究竟Woody Allen係想諷刺紐約定係南部個一種保守?就真係睇下你由咩方向去睇喇。不過片中個一位Boris就好明顯係Woody Allen o既化身,無論係講野o既pacing同佢o既思維同想法,同佢係片中有如神o既地位,淨係佢有智慧去認知佢係做緊一套戲,仲識得同觀眾開一個玩笑,自嘲之餘又嘲笑埋觀眾。呢一種黑色幽默簡直係Woody Allen o既簽名式,自此一家,鍾意佢o既人永遠都會鍾意佢,比錢入場睇佢o既戲,其他唔鍾意佢o既人佢根本不屑一顧,呢一批鍾意佢o既觀眾就係佢o既基本盤,佢地會比到幾多票房係有所得計,而Woody Allen拍電影o既時候又好懂得去節省成本,拍每一部電影都係用上千五萬美金,而個d基本盤只要高過千五萬就已經有錢賺,就係因循住咁o既流程拍落去再加上Woody Allen o既talent,一定係長拍長有,而我地作為觀眾o既亦都可以定期入場欣賞令人會心微笑o既電影,真係好一個fair bargain。唔知佢幾時黎亞洲行一個大運拍下片,香港呢個城市都應該可以為佢帶來創作上o既刺激。

引用(0)

知多一點：

共2個回應

檢舉
Loo 2009-10-26 01:07

幽默得來是给大人的打氣片，世界點殘酷都好，只要能找到令自己快樂的方法就得，whatever works！

Happy birthday to you, happy birthday to you, happy birthday to Boris, happy birthday to you! Happy birthday to you, happy birthday to you, happy birthday to Boris, happy birthday to you!

檢舉
拉素2009-10-26 23:05

Woody Allen成日係電影中都講到人類冇得救,呢個世界係好現實同好黑暗,但係又暗暗加d希望比大家,就好似最後上天賜比佢o既女朋友,天始終係無絕人之路。
檢舉
Loo 2009-10-26 01:06

很鐘意這部片