酷愛電影

我以前只係鐘意睇電影,但係隨著我係9年前讀過史sir o既電影課程就真係愛上了舊電影,比起宜家花巧o既電影,舊電影真係好有戲味

萍水相逢明天可能你會忘記呢個blog了

A Christmas Carol

網誌分類：電影 |

圖片
網誌日期：2009-11-25 01:50

有時睇得多講d大道理同比較有"內涵"o既電影,都要搵一d純粹娛樂o既娛樂片去調劑一下生活。呢一套《A Christmas Carol》就真係岩晒口味,首先3D同Imax被已經係一種非常之好o既視覺享受,擺到明用黎娛樂,我就唔會用分析電影又或者平時睇電影個一種眼光去睇。呢樣野講就真係好容易,對於我黎講亦都係某程度上可以做到,但係好多人係睇一套戲o既時候會落錯方法,用同一套睇戲o既心態去對待唔同o既戲,最慣常o既就係會以娛樂性o既取態去對待,若然一套戲係無咩高潮起伏,就會覺得套戲唔好睇,其實電影作為一種藝術,唔係淨係得娛樂咁簡單o既,我諗係電影學院所教o既一定唔係咁簡單。

另一種更難搞o既就係凡事彈o既哥仔,佢地好鍾意同你講邏輯,若然你真係講邏輯咁就唔好去睇戲喇,坐係度起碼個半鐘都係嘥緊你o既時間,因為電影之中自有一套邏輯,如果你硬要用現實世界個一套邏輯去批判電影中個一個世界就真係sorry喇,咁就等如你同一隻蟻講人類o既邏輯一樣,係雞同鴨講。咁有時作為一電影又唔可以話太過離譜o既,出現前後矛盾o既東西,如果你醒目地轉移左視線令到觀眾唔察覺係ok,但係衰到連細路仔都揭得穿你o既就真係不如番屋企再度一下先喇。如果講邏輯o既,有幾種片種係要特別留意就真o既,偵探片就一定係當中最嚴謹o既一類,其他o既可以放低少少,但係有時一d電影表面係偵探片,但內裡又係另一類,就好似《神.探》咁,就係其中一個例子。但係呢一d野都係靠經驗o既累積,急不來,慢慢就會發現睇電影o既樂趣。

咁我覺得呢一套電影點?咁作為一套娛樂片,極盡視聽之娛,又可以知道荷里活個種電腦技術去到邊一個境界,令到我過左一個好愉快o既晚上,另一方面,女朋友又對呢一套電影欣賞至極,真係一舉兩得,哈哈。

P.S.原來有人睇完呢一套電影都唔知道佢所講o既真人演繹係演員做一次,做左motion capture之後再用電腦畫番出黎。d人又問咁做咩要搞咁多野咁麻煩?係角色方面就梗係好似做多左野啦,但係背景服飾同化妝方面都可以省番嘛(用電腦畫梗係平過搭景好多),當然拍攝方面都慳左唔少啦,你估拍Imax 3D個d機好平咩,打燈都貴好多啦,宜家係電腦之上摸擬一下就搞掂.幾鬼方便呀。

引用(0)

知多一點：

共0個回應

新增回應