可憐小孩，為食爸媽！

兩老唔係人，成日自己出街食嘢，獨留幼兒在家。

話說有６０年歷史嘅龍門大酒樓今個月尾結業，於是佢地走去趁吓熱鬧，食吓懷舊點心，影相留念。

爸爸話咁大個仔，都係第二次嚟食嘢，記得當年有個同學嘅細佬滿月，係度擺滿月酒，嚟飲過一次。媽咪就未嚟過。

嚟呢度第一個目標就係必吃嘅懷舊點心－龍門大包。

似唔似海星呀？好足料架。

當日個個都係一心等著Ｄ龍門大包出籠，阿哥一拎出嚟（出點心係樓上），未行到落樓下，成班 fans 就蜂擁而上，賣咗一半；佢仲話唔駛心急，留番Ｄ俾我拎落樓下賣呀，勁搞笑。爸爸要等第二輪出包先攞到。

另一馳名炭燒叉燒飯，一小碗盛惠２４元。就算瘦Ｄ，食落又真係比其他叉燒更軟，更香。

生炒糯米飯一細碗，都要２０元。不過，都幾好味，好香，足料又唔係得個膩字。

生炒糯米飯係媽咪至愛之一，但係好多食肆都炒得唔好食，一係唔足料，或者得個膩字。媽咪唯獨愛吃嫲嫲嘅正宗生炒糯米飯，不過，整呢款傳統食品真係幾辛苦架，所以，媽咪都唔敢麻煩嫲嫲呀。

（肥占：我諗菲媽炒嘅糯米飯，都應該好yummy）。

仲有好多好珍貴又有歷史價值嘅物品：

第一代收銀機（應該會捐俾博物館）。

門口嘅雕像。

梯間有「三英戰呂布」木雕壁畫同對聯。

仲有各式懷舊傳統嘅裝飾。

呢位阿姐有乜咁特別？佢呀，勁呀！

話說同檯搭檯嘅一對男女，問阿姐Ｄ點心點樣叫，阿姐話要自己出去攞架，對男女話：＂乜要自己出去攞架？＂

阿姐話：＂係呀，你諗過先呀，要自己攞架。＂阿姐果然係阿姐。

當日，有好多人影相留念。仲咁啱見到呢位TVB哥哥拍緊嘢，好熱鬧呀。

肥占：＂爸爸究竟係影緊前面三位靚女，定係影ＴＶＢ哥哥呢？＂

肥占：＂可惜呀，唔俾狗狗入，兩老吃點心，今次又冇我份。不過，我都唔執輸，雖然甲甲未好番，我都落狗玩地行吓，唔玩波，齋食。哈哈哈！＂