歷歷在目

其實這篇網誌是由2008年7月22日打的，想起便打，眨眼已差不多又一年了！

去年軒軒人生首個生日會後，我突然好想將生產過程在這裡分享一下…

2007年7月4日

凌晨四點幾肚痛肚醒左，去左大便幾次添！

前一晚(7月3日)同老公o係荃灣標記食粥，我以為食左唔乾淨o既野。

痾完仲可以上床繼續訓，不過唔洗半個鐘又想痾…

第二次痾完我話俾老公聽，因為真係從未試過急醒去大便嘛！

點知老公俾我叫醒左後佢都肚痛喎！咪真係以為食錯野囉！

去左幾次後就開始有陣痛o既感覺(冇經驗唔知係唔係)，但仲係可以再痾喎，

所以都仲以為係食錯野！因為醫生話過我預產期(7月4日)都未生得住，

所以冇諗過要生囉！

第四次去廁所o個陣發現見紅，我心諗要去醫院喇！

但慘啦，見紅即係有排痛有排都未生得！

跟住十分鐘左右陣痛一次，每次痛三十秒左右，

原來真係好急大便而冇得去o個種感覺，o個股氣好厲害。

老公都叫我唔洗急，急住入去都冇乜用，都係訓o係度痛，

入院之前先去沖涼，過程好痛苦，沖下又陣痛下。

本來想食野，但痛到唔想食。(其實好彩冇食)

等緊生o個陣，姑娘問我有冇食野，我話冇，佢仲話我醒目！

原來入院生之前食野係唔o岩架！

因為聞左所謂"笑氣"o既止痛氧氣(其實冇用)，孕婦好大機會會嘔，

呢個情況孕婦好易出現併發症，例如肺炎，好危險架！

但好多孕婦都唔知，大多數都食到飽先入院。

記得老公車我入院，停燈位o個陣佢左手好大力咁捉住我隻手，

不停幫鼓勵同安慰我，佢個樣好擔心，佢驚我生得好辛苦！

到去醫院，我仲記得老公去泊車(其實應該坐的士啦)。

朝早八點去到醫院，由入院痛到生！最痛係臨生前兩、三個鐘。

老公同屋企人黎探我o個陣，我叫佢返去先，因為都唔想見到佢唔安樂o既樣！

見到佢個樣眼濕濕咁，不過我最記得佢見我痛到咁，

問我 "仲生唔生多個呀？"(因為我佗住軒軒時，已經話想生多個嘛！)

我有到典床典蓆擰頭話 "唔生喇！"   哈哈…

佢見我咁辛苦，又再同我講 "見你咁辛苦，好啦！生完買個gucci袋俾你啦！"

我即時雙眼發光咁話" 係咪真架？"

雖然痛到死，但依然好清醒！(當時個心仲諗佢點會咁順攤) 

夜晚9點幾先生得出，但我就超時，生左成個鐘。 

姑娘話我都算係咁，o係呢十幾個鐘裡面，我係冇嗌過，冇鬼殺咁嘈。

緊係啦，我好記得私家診所個姑娘教我要留番d氣生bb架嘛！

聽到隔離好多都好嘈，有d係咁話唔生，仲有d講粗口添架！好誇張！

不過瑪嘉烈真係唔錯，比我預期好，d助產士好ok，

安慰我o個個主任好好人，不停幫我抹汗同我傾計分散我注意力，

問我諗住將來點樣教育bb…

等生同生bb 係同一間房，自己一個一間房，環境都好好！

聞o個d氣把鬼，其實已經有朋友話冇用，

但我唔理得咁多，大大力咁索…

都只係為分散自己注意力搵d野做下咁囉！哈哈… 

聯針時我係覺得痛，但都覺得可以接受，可能我生得耐，又痛得太耐啦！

好記得幫我聯針o個位助產士or姑娘，佢真係好好手勢囉，聯得好慢好慢…

我心諗「大佬呀！快d啦，慢慢咁穿慢慢咁拉！」 哈哈…

咁樣搞法仲痛呀，佢慢到聯左成半個鐘呀！

我仲同佢講笑「姑娘呀！你繡花呀？咁耐o既？」 

佢仲同我講「你咁得意o既？咁痛仲識講笑！」 

講下笑分散注意力嘛！