親愛的，保重！

今日老婆要飛去成都，於是去送機。以為由我家去機場好近的朋友就錯了，因為班機係由深圳飛成都，唔係赤立角。都好，未去過深圳機場，一遊也不錯呢！

但係呢，過程也不簡單，真係開心死：

本來約左個會一齊飛既哥哥仔8:00係青衣車頭等，我地8:05先到，結果係：唔見人！就諗佢可能再遲少少啦…再遲少少啦…都係唔見人>..<。於是打電話去佢屋企，佢家人話佢一早出左去啦。到後來仲話佢家人叫佢唔好帶電話上四川，驚佢整唔見…即係話聯絡唔到啦！當時真係吹到「啤」一聲！無計，惟有交帶落我地既行程，然後直奔羅湖。最後終於跟佢聯絡得上(原來佢亞媽去左搵佢，好彩亞媽有手機！)，叫佢係羅湖車頭等。

點知，去到又唔見人。隨即佢電話到，仲話見唔到我地喎。下！唔好玩啦，月台車頭位置淨係得我地乍喎，無其他人呀！再問多次佢係邊度時，佢就話「我見到君X餅店喎，你見唔見到呀？」大佬呀！……我當刻真係想嘔血，見到餅店，就即係唔響車頭啦！！！於是叫佢係餅店等我地，但去到餅店，又唔見人，原來佢企係餅店對面遠遠觀望，再call佢先行過黎。比我地醒左一野「你係唔係真係想去，你真係諗清楚！想去你就要認真d！」，佢話其實8:00已經到左青衣，唔見我地就以為我地已經走左，於是去九龍塘諗住睇下見唔見到我地。佢一路解釋，我地一路醒佢，搞到佢頭dum dum，真係有d唔忍心。話晒亞哥仔已經讀到IVE二年級，以為佢有番一定人生經驗，見佢一幅宅男Look，又夠「單純」，不期然替佢四川之行擔心。

本來非常遲睡早起的一天，因為哥哥仔既原故已經豪無睡意Lu...

因為京奧仲有一日就舉行，安檢非常嚴緊，過羅湖關時，每件行李都要過機，點知到左車站搭車去機場，又要過機…去到機場，係門口又再過多次機…再到check-in，唔使講，再黎多一野。若然行李中有生物存在的話，應該已經比X光殺死左啦！

期間地勤人員於X光當中見到老婆行李有兩瓶東西，不知是何物，於是打開檢查。「這是醬油啊」我用有限的普通話表示。佢見到係來路貨，也不再追問了。

時間到了，擁抱、吻別後，目送她入閘。十分的疲倦，夾雜著有點不捨，始終係結婚後第一次小別。

幸好，回程時有寬闊冷氣大巴，20人仔，35分鐘的車程…我終於在回程的車上睡著了。