雪中郊遊

尋日我地接到一個任務，就係去松江區，之前聽聞係近郊既地方，D同事已經同我哋講，話要搭地鐵，轉好多次，好遠架，之前仲叫我哋唔好去！但我哋都無放係心上，諗住打的！點知尋晚返黎睇完地圖，嘩！原來真係好鬼遠架，近朱家角嗰邊囉，如果我哋真係打的，我哋諗要$150-$200囉！點頂呀？

最終，為免Out budget，我哋決定寧願遲到，都唔打的。由一號線，轉三號線，再坐轉乘公交（原來佢哋有D地鐵站話就話係轉換站，但原來係要再搭一程佢提供嘅公交到另一個站，需時約15分鐘，真係聞所未聞，見所未見），跟住再轉乘九號線，十個站後，終於都到松江嗰邊，當時已用了差不多一個半小時，但係目的地唔係地鐵附近，本應要打的嘅，但係環顧四周，不論有人冇人嘅的都無一架！我地唯有問人，佢哋話呢邊係好少的架，叫我哋搭公車去附近嘅市中心，先會有的士搭！咁我哋只好去問司機叔叔啦，佢建議我哋搭三號公交線。一路上，惡女嘅手機不斷響起，但由於天氣惡劣，地面濕滑，顧得前又顧唔得後，極度論盡，惟有同人講遲d覆佢哋囉！

去到市中心落公交車，再轉咗程的士先到，我哋總共用咗兩個幾鐘先到，打破哂紀錄！後尾，佢哋同我哋講，原來搭車，走高架係會快好多，一個鐘就到，不過好可惜，高架因天氣惡劣，收哂工！

食完飯，做完嘢，見佢哋門口有兩隻歡歡同迎迎，佢話叫我哋去映吓相，咁我哋咪老實不客氣，映咗幾張，但勁低B囉，好多隻眼望住……你睇吓佢地幾大隻！？

最後，佢哋竟然主動話送D禮物俾我哋，就係電話繩啦，一套五款，勁得意呀！聽佢哋講，好多奧運紀念品都係松江呢邊做架！

最後，我哋覺得，雖然去嘅時候歷盡艱辛，但係佢哋對於我哋咁辛苦都堅持要去感到十分欣賞，對我們十分十分的好，好多謝佢地！