望子成龍

2009年11月6日 晴

最近公司d三姑六婆好多都放假, 點解..!? 因為佢地d仔女要考試wor!!! 佢地好緊張架, 仲要有d仔女都唔細啦, 15歲o既都有.....我覺得好奇怪, 咁大個仔, 讀書溫習應該自動波啦! 唉......我都唔明, 係咪依家d小朋友巴閉d呢!!!

我地細果時, 老豆老母都要搵食, 讀書測驗考試做功課都係自已搞掂, 我仲慘, 因為我要幫細佬妹搞掂埋!!! 咁我地咪又係咁大, 我都無入過什麼"名校", 又無參加過什麼"課外活動", 又無拎過d什麼"獎"..... 記得小學時, 都係搵番近屋企果間, 升中一時, 自己走去考屋企附近band 1 果間, 派位又係填屋企附近果d....政府免費9年教育, 我地咪又走去拎車船津貼, 書簿津貼, 總之有津貼就走去拎!!!! 讀degree都係半工讀咁...最後咪又係 1st honor 畢業! 依家咪又係打份牛工!!

依家d小朋友真係巴閉, 讀幼稚園/play group 既費用, 已貴過我一個月既零用錢, 仲有果d所謂"課外活動" / "興趣班", 為既只係想小朋友"好似"好叻咁, 有資格去入讀一d "名校", 最荒謬係有d家長, 為左d子女去入讀"名校"而搬屋!!

我真係覺得依家既小朋友好慘, 課餘既時間仲忙過返學!! 其實呢d小朋友係咪真係咁喜歡呢d所謂既"興趣班"呢!!?? 其實當中亦培養左一種虛榮心, d家長聚埋一齊就係"弦耀"下自己d仔女有幾叻, 又識果d咩"琴棋書畫", 而d仔女, 成日俾d家長拎去表演呀比賽呀, 搞到佢地都有一種"虛榮感"....d家長成日話都係為左d仔女好, 見識多d, 可以入間好既學校wor!!!!成日都話自已d仔女好鍾意呢d"課外活動"架....其實係大人覺得有需要only!!!

呢個政府又真係幾無能, 社會分化, 貧富懸殊都係全靠佢啦!!! 簡單d講, 生於現今社會, 有錢就可以入"名校", 無錢既就排隊都唔論到你啦!!! 就算你品行有幾好, 成績有幾好, 鬼叫你父母窮呀, 無錢俾你地讀果d"興趣班", 見識又唔廣博, 你係高才生都無用呀!! 呢個世界有錢緊要過有學識呀!!

最慘既一件事就係, 有d父母根本唔入流就走去扮晒上流咁, 死慳死抵為左"望子成龍"...唉! 就算俾你d仔女入左"名校"又如何呀, 小朋友既"圈子" 都有階級觀念吧! 要佢地面對d真正上流社會, 少不勉都會有比較, 覺得"自卑"吧!! 人有佢無既時候, 做家長既又可以俾得幾多呢!!??