打左五場英超,一場歐聯,本人認為係時候做一個短暫既曼聯今季簡評(集中講曼聯防守既漏洞)
一,新兵來投
在這不談曼聯既買人方針等等,事實上內部營運有太多野我地呢d球迷係唔知,可能佢有佢既難處,所以,談來也無謂…
今季簽了兩位猛將,一位係卡域克,我想大家都知道佢係一個中場中而唔係防守中場,曼聯現時最大既問題係中場中失利,第一,欠缺一個防守中場,第二,有球在腳時無人hold波,史高斯不是一個控球在腳型既球員,費查表現飄忽,交波時好時壞,我地仲有邊個中場中? 哦,是奧沙,佢既表現,等我o係下面再講. 所以, 卡域克既來臨,是可以增加曼聯中路既創造性,最記得曼聯開始由高峰跌落黎,都係每場波偶有一個中路one-two或一腳直線而贏波的, 卡域克但防守方面,大家亦明白不能依賴卡域克,卡域克既出現只能為曼聯增加創造力和掌握比賽節奏….
而古斯錫既來投,本人十分不滿,不滿既唔係佢既實力,而係需要性. 古斯鍚上季o係西布朗打出身價,多次上身,雖然臨世界波前失了一球世紀大膠波,但佢既質素係有既,但最大問題係,我地有侯活,有科士打,點解要外借兩位,而再借古斯鍚番黎呢?(雖然而家只係借,但其實大家都知好大機會借一年後再收歸旗下吧)
轉會市場結束後的防守陣容
龍門: 雲達沙 古斯錫 希頓
後防: 加利仔 布朗 里奧 維迪 斯維斯達 軒斯 艾華
中場: 費查 奧沙
二,曼聯防守漏洞
防守上既問題,或者以今場大戰黎做評論既基礎會較好,起碼呢場波多人睇,曼聯今季既毛病亦大部分o係呢場度出現….
曼聯對阿仙奴出場陣容:
門將:古斯錫
後防:加利仔, 里奧, 布朗, 斯維斯達
中場:費查, 史高斯, 奧沙, c朗拿度
前鋒: 沙夏, 朗尼
對今場陣容既看法:
1. 雲達沙胃痛,週中格硬踢,倒不如真係比佢休息下好過
2. 出斯維斯達而唔出艾華真係有點意外
3. 四個中場同我估既差唔多,或者卡域克傷癒就連踢幾場,體力不足,o係今場要搶中場黎講真係唔太適合先發,所以出奧沙亦無可口非
4. 前鋒好正路,雖然朗尼無態,但蘇斯克查打後備會好一點
其實,賽前我有講過下,阿仙奴今場唔係真係咁易輸,因為阿仙奴贏唔到,或多或少都係因為對方塞死中場,以佢地既踢法真係猜唔到入去,反而對曼聯,空位一定較多,阿仙奴恐怖既反擊亦較有威脅,而事實證明了一切….
二．一 奧沙的控訴
或者場場波我都狂插奧沙,仲改埋佢花名,但無拎出真憑實據去插佢,似乎有點欠缺說服力,而家,就來一個對奧沙的控訴!!
身高腳長,形容既球員有三:
1. 韋拉
2. 斯素高
3. 奧沙
前兩者憑體格上既優勢,再加上勇悍既打法,波到人到,nice tackle連綿不絕,為球隊既中路取得壓到性既優勢,亦減輕了後防既負擔,但奧沙,卻不善用上天給你既一切,打法上唔係波到人到,如果前兩者係主動型防中,佢就係被動型防中,主要既打法係捕位為主,但企位實在太深,大家有踢開波既都知道中場推順左個波係好難去搶佢個波,亦容易被扭過,但奧沙卻沒有汲取教訓,往往對方中路控球,佢既企位就係禁區頂對出五碼,以捕位而言,亦不見得佢能捉到對方既傳球路線,成功截球,結果便形成了防守不足,成了隱士. 佢所謂既打法,攪到場場隱哂形,亦令曼聯未能搶得中場, 每每在網上看到有網友稱讚佢有表現, 係純防中時本人立即反駁, 亦只因以上既理據.
二．二 為費查平反
而以費查及奧沙相比,本人係比較認為費查較適合打防中的.為何?雖然大部分網友一直認為費查身體質素差,傳波差,係一個普通料,但佢亦有佢既好處,就係體能好,夠勤力. 如果一位球員會企定定係防守,而另一位球員四圍走係搶波既時候,大家會選擇邊一位做正選呢? 可能後者未必真係可以有五成以上既成功tackle率,起碼球賽觀感上,佢既勤力係值得被稱讚的. 再者,費查被插既另一原因,係因為被編於右中場,過人技術低,斬波亦非獨到,但本人認為,曼聯球迷只係睇得太多碧咸了,standard未免set得太高,而且,如果有關心曼聯預備組既網友便會知道費查曾堪稱為曼聯近代最有創造力既青訓,而佢o係預備組既位置,正正係中場中,要一個中場中材料係打右中場,亦因此被多加批評,會不會對他不公呢?被批評既應該係無奈既費查還是將他擺在右路既所謂契爸---費格遜呢? 請各位消除對他的誤解!!!
二．三 中場佈防之問題
講番場波,普爾既誤判,令曼聯先失一球十二碼,好在古斯錫將功補過,力保不失. 正當曼聯球迷以為大難不死,必有後福時, 曼聯既毛病又再次發生. 四強之中,以阿仙奴既用波能力最佳,但曼聯竟然將佈防位置設於禁區頂, 兩位中場中企位處於禁區頂對出, 希比,法比阿斯以及路斯基可以o係中場任猜,似乎老費既戰術運用,已經將曼聯推向斷頭台, 如非多哥希望既質素所限, 最終比數會是零比一嗎? 承對奧沙之控訴一段, 曼聯球員今場一有機會便作出飛剷,多次瓦解對方既攻勢,但奧沙卻萬綠叢中一點紅,當隊友搏命飛剷時,佢仍然十分有性格地捕位,捕位and捕位,我想大家今場亦可發現,奧沙亦再一次在球場上消失…..
vin_mu 2006-09-18 23:23
奧沙打閘好過防中
而對於前場既擺位
希望閣下有空再欣賞小弟既曼聯簡評---進攻篇
金三珣K.T. 2006-09-18 20:34