Hifi女聲

聽音樂, 原本係為咗陶冶性情, 鬆弛返工返學嘅壓力. 近幾年本地流行曲製作千篇一律,  歌詞圍繞情情塔塔堆砌, 歌星唱功欠奉. 樂迷用錯雙眼聽歌; 製作人埋怨非法下載嚴重, 實情係聽者文化質素下降, 作者交行貨過骨, 成惡性循環.

只要係好嘢, 自然會俾錢買. 今個月買咗兩隻碟: (1) Hifi天碟 陳潔麗香港演唱會 (2) 譚校長 愛情陷阱 (復黑王版).

陳潔麗(Lily)生於順德(我都係佢同鄉喎)只二十出頭, 已被音響發燒友譽為新一代Hifi天碟天后. 聲線清新, 字正腔圓, 夜晚較暗燈光, 用一部低階音響細聽亦覺享受.

本碟收錄2007年尾在香港舉行的演唱會, 同時演繹廣東歌及一些經典老歌. <膽小鬼>、<上弦月>、<野孩子>幾首歌向香港年輕歌星示範何謂唱功、何謂咬字、何謂運氣. 舊歌如<被遺忘的時光>、<偶遇>、<堆積情感>、<似水流年>等令人陶醉.

聽完呢隻碟更令人覺得本地姐仔歌星欠實力. 幾嚿水去睇靚衫聽咪咀? 你聽埋我份. 嗰個同鄧麗君差一個字嘅, 差之毫氂,繆之千里. 聲色藝全缺, 懶cute懶靚有叉用咩, 乜鬼see through演唱會, 挑, 不如睇吉沢明步. 學吓人地蔡琴真材實料咁, 幾十歲實力依然呀.

好似黑膠碟咁, 用薄膠套唔用膠盒. 碟面亦加上凹凸圓環裝飾.