裁員報導

今次呢個金融海嘯真係來得好快好急，而且第一個首當其衝既仲要係大型企業，百業之母 : 銀行。裁員新聞真係日日都有，而且規模之大之廣真係前所未有。就如敝行，連2003年SARS都無裁員，而家竟然炒10%人。我諗遲d新聞報導應該加插一段「裁員報導」，就好似天氣報導咁。

............................................
「........今日既主要新聞報導完，我地而家將時間交比張小明同大家報導天氣報導同最新既裁員動向。」

張小明:「各位觀眾，今日天陰有雨，間中有陽光，氣溫18至20度。沿海地區既大企業持續被海嘯沖擊，而百年唔逢一遇由海嘯引致既地震將繼續影響內陸地區既中小企各省份。

裁員動向方面，今日"伸展銀行"公開裁員400人，由 teller 到總裁都無一幸免。"大魔鬼銀行"全球裁員9000人，未知香港受影響人數。另外"獅子銀行"原本唔認後來又認今日已裁員450人，所有被裁員工被規定3分鐘內離開，所有私人物件將由速遞送到員工屋企。現時，唔認裁員但又有員工收大信封既公司有"鍾銀"，"揸兜"，"脷風"，同埋"倒王"既"信得公司"。此外，倒閉既公司有 : 曾經好大規模既"累埋兄弟"，同埋曾經好大想頭既"合進工廠"，仲有曾經好大個鼻既"太諗電器"。估計受影響既人數係以成千上萬計。「講府」呼籲各大銀行開倉派錢，劫富濟貧。而「垃圾會」既議員亦向市民保證會繼續為爭取曝光同選票，務求全民揸兜乞食(除咗議員自己)，絕對唔會容許受苦既大眾局限於苦主咁唔公平。

今晚既報導係咁多，晚安。」