講得好!

http://www5.discuss.com.hk/viewthread.php?tid=5012660&extra=page%3D2

大家好...我平時好少向呢個區發言...但係成日都會睇呢個區d post
我係一個女仔, 今年20歲啦...
自問我都係貪靚之人
無可否認向而家瘦身風氣之下
個個女仔都好想自己瘦, 包括我~
但係可惜, 我見倒而家時下好多女仔, 同埋上呢個forum大部分既女仔...個腦真係被瘦身風氣搞到好有問題

我真係唔明點解有時見倒d post咁搞笑
有d女仔食左一件稍為高卡路里既野
就即刻上黎開post問: xxx高唔高卡路里架?我今日食左呀, 點算呀
再唔係就: 我今日食左好多野...即刻肥返...
其實你地點解要咁在意果一件、兩件稍為高卡路里既野?
而且你地一定要明白肥胖唔係一朝一夕既事
唔係你食左一個蛋糕, 第二日就手臂粗1吋,大脾粗幾吋,隔夜就變肥婆
通常你只聽倒人地都會話: 冇見一排, 外型唔同左
你唔會聽倒有人話: 冇見一日, 外型唔同左
所以點解要咁執著果一件、兩件高卡路里既野????
減肥係要注意卡路里, 但唔係每一日,每分鐘, 每一秒個腦都計到咁清楚
難過你地咁樣唔辛苦架咩?
乜都計咁盡, 處處抑壓自己只會令自己唔開心
見倒d朋友有得食, 自己為左減肥只能夠望梅止渴, 成個月入面半啖高卡而好味既野都迫自己唔准食
咁樣既生活, 開心咩?
卡路里的確要計, 但唔係好似個精算師咁下下計咁盡
間唔中俾自己食肥少少既野, 放鬆一下自己個人先會開心d

同樣道理, 瘦都唔係一朝一夕既事
唔係你唔食野一日就可以成身冇哂肉, 個身減左幾多吋咁
做運動亦唔係一兩日即刻見效, 而係經過長時間既恆久堅持
減肥唔係速成，欲速係則不達
果d急功既方法一係work, 但負上非常大既代價(身體、錢)
一係就完全唔work
坊間減肥藥好多都有副作用或者一d用都冇
食左可能壞身子兼冇瘦過, 仲哂埋幾百蚊, even 幾千蚊
以為即刻見效, 到頭來賠了夫人又折兵
你覺得為乜呢?

仲有, 你地有時開post問乜野跑步會唔會變粗, 變乜野肌肉咁
變肌肉都唔係一朝一夕既事
如果跑幾下就變肌肉, 咁呢個世界唔會有健身丸
你地因為減肥而做運動, 但係做運動既concept完全一d都唔了解
睇完你地大部分人d post,我可以概括你地大部分人既思想，就係："食小小零食會即刻肥, 食一粒減肥藥會即刻瘦, 做一下運動會即刻粗"

我覺得減肥就好似儲錢咁
你想富貴一定冇可能一夕一朝既事
而係經過一段長時間既累積
大洗豪花錢既人就一定冇可能富貴(屋企有錢另計)
大吃大喝既人就一定冇可能瘦倒(天生食極唔肥另計)
永恆既財富係屬於知慳識儉既人
永恆既瘦身型係屬於肯做運動&食少d既人

果d想一夜富貴既人咪走去賭錢囉
就好似果d想即刻瘦既人, 走去行埋d捷徑(減肥藥, 纖體中心)
到頭來果d賭錢既人, 錢又唔見左, 情緒又差左
而果d賭命想即刻瘦既人就好似果d賭錢既人咁, 錢又唔見左,情緒又差左, 仲要身子都唔好
相反肯慢慢儲錢既人
佢地慢慢洗少d, 儲多d, 偶然又大洗少少買d名牌俾自己,唔會完全抑壓自己唔買名牌, 佢地最后愈黎愈多錢, 儲既過程又開開心心
同樣道理套用返入減肥既人
佢地慢慢食少d, 做多d運動, 偶然又食少少零食同雪糕獎勵下自己, 唔會完全抑壓自己唔食肥少少既野, 佢地最后愈減愈成功, 減既過程又開開心心
相信呢個儲錢呢個道理大家已經明白, 唔需要我再講

仲有, 你地要搞清楚減肥目的
有d人係想著衫好睇d, 有自信, 之後人都開心d
有d人係為左健康
我覺得為左健康去減去非常好
因為如果太肥既話, 對身體的確有長遠影響, 可能係心臟病, 膽固醇過高等

至於為左貪靚而減肥既心態
我個人覺得係女仔天生都有呢種心理, 我係女仔, 我理解
不過問題係, 你地人生既價值觀唔應該完全建立向呢方面
有d人為左減肥, 真係完全成日淨係識得計卡路里, 淨係識得諗點樣減肥
將自己既快樂完全建立於人地有冇讚你瘦左, 有冇讚你靚左
呢樣野已經係有冇自信既問題, 而唔係有冇需要減肥既問題了

一個女仔如果有自信, 無論佢行出黎外型係點, 一樣好吸引
如果瘦係等於成功既話, 點解有d 二、三線明星咁瘦都唔可以上倒位?
你見倒張柏芝好瘦果時, 你有咩感覺? 覺得好迷人定好嘔心?
楊千華而家夠有d baby fat啦, 你會唔會因為咁覺得佢好難睇? 反而楊千華笑容繼續, 自信繼續, 不知令人幾buy

俾人讚靚係女仔好開心既一件事
所以減肥成功俾人讚固然好開心
不過如果為左人地一句: "你瘦左" 所帶來的快樂, 而付出一個長時間沈重而不快樂, 甚至不健康的過程, 值唔值得?

眼見時下咁多女仔為瘦而不釋一切, 賠上健康, 快樂, 金錢, 精神, 同埋家人的關係...真係令人覺得可惜
健康, 快樂, 金錢, 精神 同埋家人的關係本來係令生命快樂既泉源
偏偏一個"瘦"字, 令呢d泉源失去
難道"瘦"既快樂可以cover倒而上咁多泉源俾你既快樂嗎?

各位sis...想減肥既同時, 請了解你自己為左乜野去減, 同埋用咩方法去減, 仲有你既個人價值觀
我重申完全唔反對大家為左靚去減, 但係應該有個正確既價值層面, 到底靚係唔係代表你成功?
仲有, 我真係真心希望各位唔好為左減肥失去心靈甚至身體上既健康
身子壞左, 就手尾長... 身體好似大自然咁, 有一套自然定律, 你冇可能用科學方法違反, 因為身體一定有feedback
減肥應該用正確既心態同埋正確既方法
食減肥藥果d只係過眼云煙既瘦身成功
永恆不變之瘦身定律, 就係:
均衡飲食，多做運動

癲后: 真係講得好好呀!! 我真係要好好反省下!!