【我唔係屬狗架！】

　　尋晚個ｆｄ又返左大陸．．．搞到我又「流離失所」。之前又唔知做咩部電話ｓｈｏｔ左，開機ｈａｎｇ左係度（之前都試過，唔知係唔係換ｓｉｍ卡換得多得滯．．．），搵唔到ｎｉｋｏ，我知佢可能去左打牌．．．不過我又冇地方去，咪去左網吧，順便睇下佢有冇上網囉～～

　　卒之．．．等左一晚，佢都冇ｏｎｌｉｎｅ．．．直到朝早佢ｈｉ我，話我知尋晚又去左開檯，我都估到，因為佢之前都有講過。之但係，原來有Ｄ野我唔係咁想聽到囉．．．唉．．．算啦．．．唔知點解，經過上一次之後，好似收左Ｄ火咁．．．定係，我已經學識去接受「現實」呢？！有時諗，唔發生都發生左，嬲同鬧都冇用啦．．．都改變唔到個事實，無謂晒時間係問題上兜圈啦～～

　　只不過，好奇怪既係，尋晚我成晚都見阿ｌｉｎｇ　ｏｎ　ｌｉｎｅ．．．．．．

　　講返今朝，同ｎｉｋｏ傾完之後就出左去見工，兩份都同一個時間係１１點見，唯有揀一份好Ｄ既見先（其實另外一份我知道係邊，不過一陣先講）。第一份係天后既「新釗記」，尋日打電話過去見搞ｇａｇ，我聽到個女人問我：「你係咪屬狗？」我即刻Ｏ左咀，心諗：個老細唔係咁信邪下話？生肖都要夾過先請？於是我答佢唔係啦，跟住佢話：「我地呢度請屬狗架喎！」之後我話：「下？點解呀？」佢話：「冇做過我地唔考慮架～」哦～～～真是終於大白，唔知係佢講得衰定我耳仔有問題，原來佢問我係咪「熟手」．．．真係爆咀。

　　今日去到，見到個女人，一本正經咁同我講啦，話其實依家樓面侍應已經請夠人，不過仲有個副店長，問我考唔考慮。我其實覺得自己唔係做唔黎，不過新釗記入面做果Ｄ個個都係阿伯阿姐，人地做左幾廿年，忽然有個靚仔入去一做就係副店長真係有Ｄ怪，我怕既係我真係管唔到佢地，講真，人地「食盬多過我食米」啦，雖然話「有能者居之」姐．．．於是我同果個女人都覺得我真係太細個（比起果班伙記），都應該係由低做起先好Ｄ，等熟左手，佢再睇下升唔升返做副店長，我都覺得合理既，如果一入去就ｐｏｓｔ大過人但年紀細人一大截又的確幾難令人信服。跟住佢話再同大家姐相量下先，今晚再覆我喎．．．其實都請既，佢話冇問題就星期一返工，咁即係等通知啦～～

　　見完呢份即刻趕去見第二份，果陣已經１１點半，心諗死火。唔緊要，好彩我知係邊同埋我已經諗好左遲到既藉口，就係：「下？唔好意思呀！乜唔係約左１２點咩？」哈哈哈．．．

　　至於點解我一早知道果間野係邊，係因為我之前原來見過！尋日打去佢一講個地址我已經知係邊！上次見完之後其實佢都叫左我第二日返工，只不過之後見左泰式所以冇做佢果份之嘛！！今次再去見，我都怕佢認得出我上次黎過，仲放左佢飛機，不過都隔左咁耐，我唯有搏一鋪搏佢唔記得啦！！

　　去到已經１１點９，坐左陣，果然又係上次果個男人，佢一走埋黎第一句已經話：「咦？你咁熟面口既？之前見過架？」我支撐話冇，佢都吹我唔漲。講左一陣，搞掂，聽日返得工。呢Ｄ先係見工、呢Ｄ先係請人架嘛！爽夾快。之前ｗａｌｋ－ｉｎ果Ｄ根本貼紙話請人根本都冇果回事既，求其叫你寫低個電話就算。

　　至於第一份．．．有佢啦～～人工又差唔多，而且果度個個都係阿叔阿姐，我真係怕有代溝呀！！

　　不過呢度返早，朝７至晚５，忽然覺得好ｏｆｆｉｃｅ呀～～好似好耐未返過呢Ｄ咁正常既更既工，通常唔係返１０就１１架啦，係之前係味之道返過６點囉，不過果陣ＯＴ都Ｏ都傻，差唔多晚晚９點先收工。講開味之道，原來佢收左皮執左啦！！果陣做我地都覺得佢頂唔得幾耐，果然一年都冇就ｇａｍｅ　ｏｖｅｒ。

　　好啦．．．聽日又返工啦，唔知自己知唔知醒呢．．．應該會掛？！

　　離２５歲只係得返個零月．．．人生就好似踏入另一個階段咁，我相信呢個生日將會係我第一個唔希望咁快到既生日．．．

Ｐ.Ｓ.忽然好想去沙田，只係因為想去Ｉｔａｌｉａｎ　Ｔｏｍａｔｏ食芝士波．．．不過唔知佢又執左未呢？？