【運滯（上）】

　　又係好耐冇打過ｂｌｏｇ．．．一睇．．．嘩！原來成兩個月！！

　　打呢篇日記既時候，已經係２００６年既１１月１號．．．我發現，就算我冇打日記呢兩個月入面（其實之前都係．．．）每日都會有人ｃｌｉｃｋ上黎睇我個ｂｌｏｇ．．．依家仲好榮幸．．．小弟個ｂｌｏｇ已經突破１０,０００人次瀏覽！！！（勁！！）至於邊（幾）個人會上黎睇下我有冇寫野既，我就心中有數啦～～

　　入正題之前，黎個回顧先～～

【以前既ｘａｎｇａ……】

Monday, November 01, 2004
　　
　　今日係萬聖節，咪又係咁過。其實佢都只係一個幾普通既節日，又或者係一個唔係咁多香港人會重視既日子，可能我地始終都係中國人掛？！……

　　……　……　……

　　好野！終於到十一月，即係話，我既新生活即將開始……記得一年前既呢個月，我係我日記話過係我生平最黑既一個月。不過原來我唔知道，最「黑」既日子反而係呢頭半年哩～

＊　＊　＊　＊　＊　＊

Sunday, November 07, 2004
　　
　　尋日終於租左間屋啦～雖然唔係好大，不過都尚算整齊企理，一個人住都差唔多架啦！不過，就有Ｄ「家徒四壁」既感覺囉～因為岩岩搬入去，乜都冇……等我下個月再出糧先買返Ｄ野佈置下個新「竇」啦！

　　……　……　……

＊　＊　＊　＊　＊　＊

Thursday, November 11, 2004
 
　　唔知點解，每年既十一月，我都會遭逢惡運……

　　事隔半年有多，終於，俾我撞返「佢」——我老豆。

　　我知道，我跟住落黎既日子唔會過得平安……

　　……　……　……

　　冇朋友又唔駛死既！何況，死有有咩大不了？橫掂都係一個人。

＊　＊　＊　＊　＊　＊

Sunday, November 06, 2005

 　　唉．．．

　　唔知做咩事，忽然之間好唔開心．．．

　　唔知係工作上既問題，定抑或．．．

　　好想好想返到以前．．．

　　無求無慾既時代，你話幾好呢？

　　Ｎｉｋｏ，對唔住呀．．．我都唔想對你忽冷忽熱咁，不過．．．

　　我自己都好矛盾．．．

　　好想放低晒所有野，頹廢一番．．．

　　我已經好累啦～～～但．．．又有邊個可以幫到我？

　　一年前既呢段日子，我同自己講過我要重新做人；到左前排我都認為我已經做得到．．．

　　由做恆河果陣開始，我既目標已經一步一步咁達到，不過點解當我咁辛苦咁到左呢一刻既時候，我偏偏又想放棄呢？

　　可能我真係好累啦．．．

　　唉．．．．．．

 ＊　＊　＊　＊　＊　＊

【ｙａｈｏｏ　ｂｌｏｇ……】

2005/11/07 07:00:34

　　尋日先見到原來ｙａｈｏｏ都有ｂｌｏｇ用，就試下啦～橫掂我都唔係好鐘意用ｘａｎｇａ，因為佢成日都攪到人地打好晒既日野變左做亂碼！！！

　　呢兩日好唔開心呀～又唔見左部電話……Ｎｉｋｏ實擔心死我啦～～唉……真係「禍不單行」……

　　好彩過多兩日佢就返黎姐～～我好好好掛住你呀！！！

　　尋晚聽返Ｅａｓｏｎ隻舊碟，聽到《綿綿》果陣，我忽然流下男兒淚！！！

　　其實同歌詞冇關，不過唔知點解會咁……

＊　＊　＊　＊　＊　＊

2005/11/27 12:46:05

　　……　……　……

　　講完Ｄ開心野，又係時候講下Ｄ唔係咁ｈａｐｐｙ既．．．呢排真係有Ｄ唔開心同覺得好黑仔呀～～～唉．．．都唔知點解每年既十一月我都係咁黑既．．．快Ｄ快Ｄ過啦～～

　　呢一刻．．．我只覺得好累．．．．．．

＊　＊　＊　＊　＊　＊

　　睇返之前既日記．．．唔係講笑，１１月的而且確對於我黎講係一個不祥既月份。或者咁睇．．．一到左１０月尾，好多野會忽然間改變．．．到左１１月就要從新適應過黎咁。好幾次既所謂「新開始」就係係１１月發生。

　　前兩年係咁，到左今年，２００６年啦！！依然係咁！！有冇搞錯？！

　　好似一時間．．．回到過去咁。建立左既野，又會忽然間冇晒、明明跑左好遠，到頭來又發現原來自己依然仲係起點！果種感覺．．．好難形容。

　　係挫敗？！定係失落？！

　　依家先至１號，我仲有３０日要撐．．．只希望１１月快Ｄ可以過去就好。

　　希望呢個只係偶然、「咁橋」，我並唔希望係一個「必然」。

　　兩個月，本身應該有好多野想講，不過，真係冇乜心情。當然，呢兩個月發生左唔少既事。或者，都係簡單咁講下啦～～

１）冇做新源昌，轉左去附近既「泰式茶餐廳」，唔係有心，真係咁橋。

２）老闆娘好好人，岩岩過左試用期（４日）就加＄５００人工，再過兩個禮拜，又加多＄３００。

３）有「貸款」（咪即係借糧）制度，唔怕冇錢係身。有幾次係老闆娘主動問我有冇錢，十二分感動。

４）好人到中秋送左盒「８星伴月」冰皮月餅俾我，最大果個仲要係燕窩月餅，感動到想喊。

５）可惜本住「人望高處」既價值觀，１０月頭決定辭職，轉左去銅鑼灣一間頗有名氣既「南亞餐廳１９６４」

６）更可惜「高處不勝寒」，果度Ｄ人諸多挑剔，好在都識到Ａｌａｎ同阿Ｍａｒｋ兩個；順帶一提：Ａｌａｎ好靚仔！！係Ｅｄｉｓｏｎ＋Ｋｅｎｎｙ既混合體！！

７）捱到１０月３０日，宣告由高處墮下。

　　以上就係呢兩個月既概括。