【愛是懷疑】

　　前日Ｎｉｋｏ返左黎．．．發生左一件我覺得都幾令我「Ｏ咀」既事．．．先唔講呢件事係咩，講左呢兩日發生左Ｄ咩事先。

　　星期四晚佢１０點已經返到，之後我地去左Ｔｉｍｅｓ搵黃寶瑩，跟住去左食飯。之後我地諗住去Ｇｒｅｅｎ　Ｂｏｘ唱Ｋ，因為Ｎｉｋｏ有張免人頭費既ｃｏｕｐｏｎ（先前入會果陣送既），點知原來黃寶瑩第二日咁岩又放假，所以就３條友一齊去。好正呀～終於有側田Ｄ新歌唱。唱到３點零鐘黃寶瑩頂唔蒲係梳化訓覺，得我同Ｎｉｋｏ繼續唱，之後連佢都訓埋，得返我一丁友戇九九咁係度唱．．．歌與歌之間都會彈左去有線６１台，所以都會知道果晚日本對巴西場波既結果係咩。終於「捱」到差唔多６點佢地醒左，之後一齊過左天后果邊食個唔豐富又唔好食又唔抵食既早餐，不過我地係果度吹水都吹左粒幾鐘，都叫做抵返～跟住仲未捨得返歸，黃寶塋仲提議話返西灣河打機．．．打到９點幾終於上左黃寶瑩屋企訓。

　　我都係第一次上一個唔係自己女朋友既女仔屋企訓覺．．．不過最搞笑係我同Ｎｉｋｏ都係訓係佢同佢細佬間房既地板上面！又開左冷氣，不過冇被冚，好鬼凍，好彩係木地板，如果係磁磚一早凍死左。不過我同Ｎｉｋｏ都訓唔著，係度傾計，傾左好多野．．．之後黃寶瑩細佬要起身返工，Ｎｉｋｏ一個唔客氣就跳左上人地張床度訓，不過我就真係好唔慣，可能本身我同佢細佬根本就唔熟。之後我地都仲傾緊計，直到２點先真係訓．．．恰左一陣，４點幾又起身，Ｎｉｋｏ返返屋企擺低Ｄ行李我地又出過去尖咀搵黃寶瑩。

　　去到尖咀，佢地去左利時搵佢個ｆｒｉｅｎｄ，之後我地係街見到Ｄｏｎａｌｄ，本來真係想嗌佢，點知佢好快又唔知行左去邊。之後送左黃寶瑩去地鐵站，我同Ｎｉｋｏ就行落油麻地，因為佢話想去玩塔羅占卜。我不嬲對呢Ｄ野都係半信半疑，因為我覺得其實果Ｄ人講既野有時都幾矛盾，不過，「信則有、不信則無」囉～

　　搵到果檔野，等左好耐，因為真係幾好生意。我計過，佢一條問題收＄６０，我當佢一晚做３０至４０個客，咁即係佢一晚可以搵到成兩叉野！唔好多，一個月開廿日工，咁即係一個月搵成兩萬幾銀！分分鐘佢只係ｐａｒｔ－ｔｉｍｅ幫人玩，如果佢本身係有正職既咪發過豬頭？

　　不過我就覺得佢講Ｄ野唔係好準囉．．．

　　等緊既時候我地一路搵腳諗住打牌，點知又係三缺一，有冇搞錯！！

　　玩完之後去左食人和。一路行一路傾計，Ｎｉｋｏ終於亦「忍唔到口」爆左件事既真相出黎！果陣我個感覺好複雜．．．雖然係一早估到，不過我一直都希望其實我係估錯左．．．點知．．．都唔知話我自己醒好定係佢做件事做得唔夠完美．．．仲話其實係專登俾我估到咁話．．．唉～

　　食完我忽然急屎，之後去左花園街果個公廁。我搞掂之後係公園傾左陣，差Ｄ又嗌大交．．．我真係有Ｄ覺得自己被人出賣左咁，唔明點解佢要咁做．．．問題係應該有好多方法去解決，就算我真係俾唔到信心同安全感出黎，都唔應該咁樣試我！

　　分手．．．我一早都諗過，雖則我都覺得１１個月既感情就咁冇左係會好可惜，不過真係「長痛不如短痛」．．．我唔明既係．．．做情侶最基本既「信任」都冇左既時候，一齊黎仲有咩意思？

　　我今次冇好嬲佢，因為我明白佢既出發點係乜，不過佢一直都用錯方法．．．真係唔知幾時佢先會明白．．．不過，心入面多左條刺就梗架啦～～忽然之間好驚，點解我身邊既人會係咁．．．好彩我一直都好識得保護自己，如果唔係，真係怕死左都唔知咩事。

　　經過呢一件事之後，我相信我會更加保護我自己。

　　其實我都估到Ｄ．．．不過就未肯定。真係唔知話我聰明好定話佢傻好．．．唉．．．

　　傾完計之後，我地去左ａｐｍ睇波，估唔到３點都仲有咁多人睇。睇到Ｎｉｋｏ訓著咁滯，佢又要死撐．．．之後搭返ｖａｎ仔返天后，去左點心皇食左個好豐富既早餐之後，就各先返歸。

　　１６強今晚開波！依家正密謀緊星期日去邊度睇英格蘭對厄瓜多爾！！

＊　＊　＊　＊　＊　＊　＊　＊

若能表白　我心中的依賴
你我當初也不必那麼哀
若能敞開　把真相說出來
這一段故事不會太精采

種種意外　若能夠明白
那生存意義又何在
若能推猜　這一切的未來
我乾脆辭掉工作買大彩

Because 愛是妒忌　愛是懷疑
愛是種近乎幻想的真理
Because 愛是遊戲　愛能叛逆
So! 別把這遊戲看得太仔細　No! No!

＊　＊　＊　＊　＊　＊　＊　＊