自從 10 月份開始, 結婚 d 嘢, 我已經放係一邊. 因為現時對我來講, 功課係重要過結婚, 所以我放多咗時間讀書. 但日子一日一日咁過, 話咁快到 11 月尾. 距離結婚仲有 3 個多月, 差唔多係時候要排期註冊. 但老實講, 成個 11 月, 我忙到連上網 8 既時間都冇, 何況去入境處個 web site 練習入資料, 所以呢個任務, 交咗比雞亦.
因為屋企只係得一部電腦, 但我地冇出現爭電腦既情況, 可能雞亦練習既時間係係我返學既時候. 今朝見雞亦成 7:45 都唔出門口, 仲諗住問佢今日係唔係唔洗返工. 點知佢話今日係上網排期, 所以要搞掂先返工. 既然佢今朝有重要事要做, 我冇理佢, 我繼續我既梳洗, 佢有佢既預備. 佢搶到籌後, 就衝出門口趕返工.
返工公司, 見到雞亦 send 比我註冊處既資料. 當然唔係搶到既 1 or 2 號籌, 但對我來講都好前, 而且大會堂又有兩個禮堂. 我估應該可以揀到心水時間. 幾時可以知道最終時間 ? 12 月中就會知道.
