趕 ...

12 月 15 日 （六） 晴     今日本來諗住請假唔返小童軍的 ， 唔駛咁趕o麻 ~~~ 點知前兩日打去俾其他領袖 ， 佢地都話唔返喎 ~~~ 放大假o既放大假 ， 學業要緊o既學業要緊 …  o尋日晏晝同 吳姑娘 傾o下集會做 d 咩 ， 佢會負責兩個 Games ，  而我就負責教佢地整聖誕樹 ， o尋日晏晝開始預備做勞作o既材料 ， 夜晚響 幼稚園學生 屋企食完飯 ， 佢都要幫手剪聖誕樹 ， 真係唔該晒 ！  

今日準時 1：00 p.m. 放工 ， 跟住撘火車到沙田 ， 去 G2000 幫 幼稚園學生 買條呔 ， 佢話買紫色 ， 所以就向紫色呔著手 ， 左揀右揀之下 ， 揀o左條紫色大斜間 ， 行去俾 $ 時見到另一條紫色細斜間都唔錯 ， 於是就揀o左果條 … 等緊 Sales 拎呔期間 ， 見到好多人買恤衫 & 呔都係揀紫色 ， 紫色都真係近年冬天最興o既顏色 … 我自己都有兩條紫色連身裙呢 ~~~  攞到條呔就去俾＄嚕 ， 排我前面個女人突然問我可唔可以借張 VIP 咭俾佢 ， 可能佢見我拎住 ， VIP 咭有九折 ， 我話張咭唔係我而婉拒o左佢 …  

買完呔之後 ， 我就撘巴士過顯徑 ， 上到去都已經 2：35 p.m. 了 ， 吳姑娘 響入面睇住班小朋友 ， 我就出去開櫃拎埋 d 物資 ， 點完名就出外面做快樂傘o勒 ~~~ 好趕呢 ~~~  因為唔夠領袖關係 ， Mother 都早 d 過o黎幫手 ， 玩完快樂傘返入去就開始今日o既活動 … 首先由 吳姑娘 帶兩個 Games ， 第一個叫 「花貓喵喵叫」 ， 大家圍個圓圈坐好 ， 有一位冇位坐o既小朋友企響中間 ， 走埋其中一位小朋友度問 ：「你叫咩名呀 ？」 A ：「我叫 XXX 。」 再問 ：「貓貓想坐呀 ~~~ 」 A ：「問隔離啦 …」 跟住中間位小朋友就要問過另一位小朋友 ，  如是者 … 要問最少兩位小朋友 ， 第三位小朋友先可以選擇嗌 「喵 ！」 或者 繼續叫 「問隔離啦 …」 如果嗌 「喵 ！」 的話 ， 所有小朋友就要即刻起身搵過另一個位 ， 冇位坐o既小朋友就要企響中間問人 ， 如此類推 … 後尾我都玩埋一份呢 ~~~ haha ~~~  玩玩o下 Jenet 都返到o黎嚕 ！  

3：10 p.m. 左右 ， 我地就開始玩另一個遊戲 - 「整沙律」 （類似 「開飯啦」） ， 小朋友圍個圓圈坐好 ， 每位小朋友揀一款水果代表自己 ， 有位小朋友做廚師 ， 一路響圈外面行 ， 一路叫 d 水果名 ， 聽到自己款水果o既小朋友就要起身跟住廚師行 ， 揀晒水果之後 ， 廚師就開始講一輪整沙律o既步驟 ， d 小朋友都好緊張要搵位坐 ， 廚師成日講到好似就完咁 ， 大家每次都急不及待坐低 ， 我地就話 ：「未整完喎 ~~~」 跟住佢地又起番身繼續行 ， 睇到佢地就好好笑 ，  haha ！ 玩到 3：20 p.m. 左右 ， 我地就開始做勞作 …  

每人派三張聖誕樹紙樣 & 1/3 舊廁紙筒 ， d 廁紙筒我已經 「界」 o左三個接口 … 首先叫佢地將三張聖誕樹紙樣油顏色 ， 油完之後就將三張聖誕樹紙樣對摺 ， 再用漿糊黏住背面 ， 造成三面立體聖誕樹 ， 跟住就響上面貼圖案 ， 再將聖誕樹三邊分別插落廁紙筒o既三個接口 ， 棵聖誕樹就完成o勒 ~~~ 整完執埋 d o野都夠鐘散會 lu …