滄海一聲笑

話說有一次有一個雜技團去到一個村落到表演，當中最為吸引人既就係跳蚤拉車。由於所有人都認為跳蚤係用跳既方式來行路，而家用行既方式己經夠奇怪，何況仲要拉埋車，所以個個村民都睇到好開心。

表演過後，有一個小朋友由於好奇心太旺盛，走到個團長面前，苦苦懇求團長教佢訓練跳蚤拉車既秘密，團長見個小朋友咁誠懇求佢，於是乎就將個訓練方法話比個小朋友知。原來只要將個跳蚤循序漸進咁放喺一個比一個矮既空樽到，當隻跳蚤跳慣左個高度時，然後再換個矮既空樽去訓練佢唔好跳得咁高，慢慢隻跳蚤就唔識得再跳架喇！

故事講到呢到就完喇！而我之所以會諗起呢個故事係因為最近發生一啲事情，無論好同唔好都好，分別都啟動左我個成長或改變既按扭。當然進步或者係退步都係一種轉變，問題係，我應該點樣轉變法先至對我自己有用？

我唔想因為一啲原來喺生命中根本唔重要既事情而改變我既價值觀，因為我唔覺得改變左價值觀既我會好好。就正如跳蚤一樣，由跳變成行，對佢來講係咪真係一個好既轉變呢？我相信跳蚤既轉變只會令佢身邊既村民同團長有正面既效果，對佢自身而言，直頭違返左佢既生活形態！

再講，我成日都掛喺口邊：change is beautiful but change is difficult！有時人係要受到一啲事情既衝擊先至會對自己處事手法有所反思，甚至乎係改變，但呢啲衝擊對好多人而言，又未必係令人值得回味既事情。好似跳蚤咁，當佢一跳高又撞到個頭，整整下佢咪唔敢跳咁高，最後直頭變左係行路。所以每日周遭發生過既事情，到左老來諗番轉頭可能只不過係一個笑話，甚至已經被遺忘左都唔定，但當我身處其中時，我係咪有足夠既冷靜同智慧去處理好呢？再而吸取教訓或經驗，再下一城。

經一事，長一智。不過我又唔覺得真係次次都有咁既後果，如果係既，我而家都已經成為一個智者，幫特首做好個施政方案啦！最怕係撞板撞到驚，以後唔夠膽再發揮創造力、發揮自己既潛能、發揮冒險精神、發揮自信、發揮技能……而係做左一個行屍走肉，好似倒模出來既人！

船，係為左出海而建造既！