極力子泵打柴(94300km)

起初以為耐冇操棍仔，所以先會有死火，數波牙，轉波唔暢順等徵狀，後來有一次玩窄路掉頭入完後波之後入唔到1波，枝8棍好似隙住咗响中排果度，要番幾腳極力子先勉強入到波;跟住有幾次2上3，4拖3，又係隙住枝棍，要用腳尖大力“咪”住隻極力子先轉到波，就知唔對路，自己估還以為極力子總承或啤令打柴，於是拿拿林落車房一問，佢地反而話係極力子泵拍死，入面漏導致即使全踩腳掌，但油壓不足以完全推開極力子，變相等於只採一半極力子不能轉波！

110停牌費之前都冇事冇幹生生猛猛，反而停一季牌費就出現故障，車房都話車就係咁，日日行冇問題，一停得耐D膠圈油封硬化，到一行車就壞！停得耐嘅車，每隔幾日唔單子著下車Run吓副偈，最好直頭行下車轉吓波極力子扭吓軚，等D引擎以外嘅機件活動吓，聽落好老土，但係我好可能係做得唔足而出現故障！

停一季牌費慳番$1400，呢次修理費共$1200，唉！不過算係賺咗，因為整車之前本來冇乜期望，只係當係普通故障維修，點知當攞車試車第一腳，極力子彈腳咗好多，相信係由於新泵新油關係，大大改善咗踏腳感！而試車時作出激進嘅轉波動作都非常暢順，未有出現隙住或掃波牙等現象，轉波仲非常之暢順！

老實講，13歲嘅110行咗其實從來都冇換過極力子油，基本上D舊油係黑墨墨，又咁講，我覺得一般駕駛情況下，踩極力子嘅次數（唔係時間）一定多過踩迫力油門，因為不論加速或減速都要轉波，所以行咗18萬Km先打柴都算係非常長壽！唔計比我改壞果D，呢次算係我部110好少有嘅故障！