衝去急症室照 x-ray

2008年3月4日 (星期二)

媽咪見心樂已升 N1, 同埋食飯時已可以食大舊d 既餸, 所以尋晚開始, 餵完佢食飯後, 就比佢跟我地同枱坐下, 比d 餸佢食下先~

我地用厚 cussion 墊高張椅, 等佢食得舒服d~

點知今晚佢坐唔定, 成日跪係張椅度, 可能佢唸住獃落椅背, 但就獃左去側面, 側面冇扶手, 佢就倒樹盅咁由大人椅跌落地, 即刻喊到咩咁  ..... 初頭媽咪以為佢只係撞到頭頂, 攬住佢不停咁望佢個頭, 問佢個頭痛唔痛, 點知佢係咁遞隻手黎, 先知佢屈親手指尾, 我望一望, 即刻嚇左一跳 , 成隻手指尾黑晒, 仲好似拗左去後面咁, 問佢郁唔郁到, 佢又話唔郁到, 仲好痛添, 我同爸爸驚佢d 骨有斷或裂, 飯都唔食住, 拿拿臨換衫, 搭的士同佢去睇急症~

去到登記完, 分流定佢為中等急証, 但姑娘話因為剛剛突然有好多人黎, 所以要等成個幾鐘..... 唉..... 心樂就喊下停下咁, 眼淚汪汪咁係度等, 媽咪心都痛埋 ..... 爸爸就抱住佢周圍行, 同佢睇呢度講果度咁, 分散佢d 注意力.....

終於輪到心樂見醫生, 醫生細心幫佢睇下手指, 又郁下手腕同膊頭, 問心樂痛唔痛, 但心樂只係識舉高手, 不停喊住咁講 : "好痛呀..... 好痛呀..... ", 於是媽咪又幫口, 問佢手腕同膊頭痛唔痛, 可能因為係媽咪問, 佢先肯答 : "唔痛呀..... ", 醫生話先同佢照手指及手腕既 x-ray, 而膊頭因為佢都可以郁動, 所以返去觀察下, 看看如有需要先再睇~

跟住去照 x-ray..... 辛苦囉 ..... 唔知點解佢照親 x-ray 就驚, 之前試過一次又係咁, 唔肯放隻手上去照, 係咁喊, 要媽咪抱住佢, 夾梗擺佢隻手上枱面度..... 幾經辛苦先幫佢照完.....

之後, 經醫生睇過 x-ray 片, 知道手指骨無斷無裂, 爸媽先放心下來.....

唉..... 返到屋企時已11點幾, 又要幫佢沖涼瞓覺, 仲要..... 成枱未食完既飯餸.....