8號風波

2008年6月25日 (星期三)

今日上晝8號風球, 唔使返工返學, 唸住都幾好啦, 可以休息半日~

11點改掛3號風, 只聽到電視新聞話 "社會福利署轄下機構會於兩小時內開放",  但就冇講到 "幼兒中心會開放比有需要人仕, 不過社會福利署勸喻家長...",

媽咪同爸爸都驚緊, 心樂學校會唔會開呢???

都知道學校冇咁快有人聽電話, 所以等到12點半, 一定要出門口前, 媽咪先打電話去學校問, 點知都係冇人聽...

爸爸媽咪要返工, 唸住幼兒中心係社會福利署轄下機構, 就算冒住雨都要帶心樂返去睇下先, 但就已經打定輸數, 如果學校真係冇開, 就唯有要爸爸搭車送心樂去婆婆家喇~

1 點返到學校門口, 見有開門, 好開心啦... 呀..... 點知入到去, 老師話唔收生~

老師話: 因為電視冇講到果句 "幼兒中心會開放比有需要人仕, 不過社會福利署勸喻家長...", 如果佢地收左學生, 萬一有咩事, 保險係會冇得陪...

咁啱呢個時候, 老板打電話黎叫我做野, 我果時真係冇時間跟老師拗, 而且我明白呢個係校長嘅主意, 同老師拗都冇用, 咁就唯有辛苦爸爸揍心樂去婆婆家...

雖然剛好係星期三, 都係返婆婆家食晚飯嘅日子, 但就辛苦左爸爸, 一日入沙田兩次...

BK有個呢間學校嘅topic, 樂媽媽耐唔耐都會上去睇下, 今朝上到去見到, 有個家長提到尋日嘅事, 原來佢都係一樣, 帶小朋友返到學校而遭拒收, 而佢就遲我地少少返到~

佢又講到, 今朝向學校投訴時, 先知原來之後都有收生, 而學校之所以之前唔收生, 係因為返得早, 未有 qualify 嘅老師係度...

樂媽媽睇到後, 真係覺得好嬲呀~~~

媽咪要兩小時內返到公司, 都冇時間搵校長理論, 依家知道之後有人返到, 真係好激氣呀~~~

其實尋日都想堅持架, 但又趕住返工, 同埋又唔想d 老師難做, 因為都唔係佢地話事既~~~

呢個校長真係藉口多多, 返到去時, 明明已有幾位老師,  仲有兩位姐姐係度... 唔通呢d 老師都唔 qualify 咩???