女人心(10)

張德明黎到餐廳門口將姚芷君接走，潘家俊既目光一直無離開過姚芷君，無論佢有幾唔甘心，除佐眼白白睇住姚芷君離開之外，又有咩辦法呢？

係車上面既姚芷君，望住倒後鏡入面既潘家俊變得越黎越細，但係潘家俊既影子並無隨住影像消失而離開。見到面容憔悴，白髮蒼蒼既潘家俊，姚芷君覺得自己要負上部份既責任。如果今日見返既係一個容光煥發既潘家俊，姚芷君既心可能會好過d，但係潘家俊落魄繼既樣子，令姚芷君心入面不斷地問假切性既問題。

假如自己比多次機會潘家俊，可能佢會立定決心，我地就會一齊，佢就唔會受咁大打擊，佢亦唔會同蔣慧怡結婚，結果再受一次打擊，令到一個原本好好地既潘家俊，變得咁憔悴。

一連串既後果，似乎都係由自己決定嫁比張德明開始，自己既一個決定，就摧萎佐潘家俊既一生。

姚芷君越想就越覺得自己對唔住潘家俊。

車外面既景物變得朦朧，四週既燈光融化埋一齊，組成一幅色彩繽紛既圖畫。姚芷君依然坐係司機既旁邊，但係身邊既人變成年輕既潘家俊。原本豪華既房車亦變成一架細小既出租小房車，潘家俊駕駛住小房車，係街上面穿梭，駕駛技術並不十分熟練，雙手緊握住方向盤既潘家俊，面上流露出又興奮，又緊張既樣子。姚芷君從檔風玻璃望出車外，車外面既景物，好似有d熟識，但係一時間有講唔出係咩地方。

汽車轉出橫街，景色突然括然開朗，潘家俊一面將汽車駛上大橋，一面對姚芷君講：＂過佐呢條橋，就係氹仔。＂

姚芷君突然意識原來自己返到讀大學既時候，當時潘家俊剛剛考到車牌，就相約姚芷君去澳門玩，仲租車遊車河，環繞澳門行佐一圈。正當姚芷君沉醉係往日同潘家俊一齊既甜蜜時刻既時候，張德明忽然出現係大橋中央，汽車越駛越近張德明，潘家俊好似完全睇唔到張德明一樣，將汽車一直撞向張德明，而張德明亦完全無避開既意思，只係一直企係路中間。

姚芷君仲未黎得切驚叫既時候，汽車已經將張德明撞到飛上半空，張德明飛起既一刻剛好經過姚芷君既面前，係車入面既姚芷君清楚見到滿面鮮血既張德明，就係眼前飛過。姚芷君回頭一望，張德明已經攤係地上，一架剛好經過既大貨車，係張德明既身上駛過，將張德明分成兩截。

姚芷君大叫：＂停車！！停車！！＂但係潘家俊好似完全聽唔到一樣，汽車既速度反而不斷加快。潘家俊突然將方向盤一扭，汽車就撞向橋邊既欄杆，欄杆被衝開，連人帶車就一直跌落大海。

就係汽車要撞入大海既一刻，姚芷君張開雙眼，眼前既景像突然改變。

四週一片沉寂，只有張德明沉穩既呼吸聲，剛才生死懸於一線既景像，變成熟識既睡房，姚芷君雖然全身冷汗，但係依然安穩地訓係寬大既睡床上面，旁邊既張德明亦都安然無恙，正在熟睡中。

但係頭先個惡夢就令姚芷君既心忐忑不安，雖然只係發夢，但係夢境入面自己曾經喜歡既人殺死自己既丈夫，令姚芷君既心充滿佐罪惡感。姚芷君緊緊地抱住睡夢中既張德明，好似要向全世界顯示，張德明係佢既丈夫，佢曾經承諾做張德明既太太，呢個承諾佢係會一直堅守，絕對唔會動搖。

望住睡夢中既張德明面上依然帶住微笑，似乎正在發緊一個美夢，姚芷君就對自己更有信心。

張德明一轉身，將手搭向姚芷君，口中發出喃喃夢話，姚芷君細心聽清楚，聽到張德明講：＂雅文。。。雅文。。。＂

聽到丈夫夢中反複呼叫令一個女性既名字，而呢個夢中人亦非他人，就係自己最信任既朋友，令姚芷君全身既血好似一下子被抽乾一樣，全身一片冰冷。雖然明明訓係床上面，姚芷君依然感到身體向一個無底既深洞不斷下沉。

尋日姚芷君仲覺得自己係一個幸福既人，自己可能係一個小女人，亦可能係一個師奶，但係無論如何，自己依然係一個幸福既人，有一個愛自己既丈夫，仲有一個關心自己既朋友。

但係一夜之間，姚芷君就好似被人放佐上過山車一樣，心情不斷起伏。

再次返潘家俊，姚芷君由對潘家俊既憐雯開始，而令佢懷疑自己既決定，但係又同時因為懷疑自己曾經作出過既承諾，而產生背叛丈夫既罪惡感，正當自己要重新肯定對丈夫既忠誠時，又發現丈夫可能對自己不忠，更令姚芷君難過既係，呢個第三者，可能係自己最信任既朋友。

原本熟識既人，突然變得陌生，姚芷君感到自己完全被孤立，想唔到有任何人可以幫到自己。

過山車跌到落最低點後，又慢慢向上爬。

姚芷君感覺到一股力量正慢慢將佢由谷底往上拉，潘家俊既樣子，又出現係姚芷君既腦海入面。