妹妹。一路好走

趕到返屋企, 妹妹岩岩沖完涼

可能好多blog友都唔知道, 妹妹係我阿姨隻狗, 但係同我地同住, 仲已經養左好多年, 係一個老婆婆

其實妹妹呢幾日既情況突然間好差, 成日响度喊, 又起唔到身, 因為後腳已經冇晒力, 又試過行行下成個頭 "中" 落地下

因為起唔到身既緣故, 佢試過賴到自己成身都係, d poo poo仲次次都係軟既
更加冇可能行去食野, 所以呢幾日佢食野同飲水既兜都擺响佢隔離

佢成日都想爬起身, 但係根本冇力, 响地下度4隻腳爬下爬下, 又不停嗌同喊, 我試過扶佢起身, 不過一起身佢又撻返低
我地都知佢好辛苦
媽咪同阿姨商量過後決定, 今日送佢走

我唔知咁樣算唔算對佢好, 我個心好矛盾, 一方面唔想佢辛苦, 但又見佢好似好努力咁撐緊
但妹妹已經十幾歲, 呢一日始終都要來臨

我地4點10去到診所, 我簽好晒d 野後, 妹妹就入左去.....5:00pm妹妹正式離開左我地
我同自己講, 咁樣對妹妹黎講係一個解脫, 我應該要釋懷, 唔可以畀佢見到我唔開心咁送佢走

"寵物浩園" 派左架車黎接我地去火化場, 响網上見得果d pk善終服務太多, 所以我全程都 "目及" 實果條友
後尾知道佢係做老實生意既, touchwood 有需要既可以放心選擇用呢間

佢問我地有冇妹妹既相, 我個電話入面有, 呢張係妹妹幾年前仲精神個樣, 雖然像素好低, 但佢笑得好開心, 係我最中意妹妹既一張相
baba負責執靚張相, 係佢對妹妹既最後一番心意!

親眼睇住佢變成骨, 再變成灰.....果種感覺真係好難過好難過
一個鐘頭之後, 我地帶左妹妹返屋企
我地有整DNA頭鏈, 大約一個月之後就會有得攞

我出呢篇blog已經係個幾禮拜之後, 但我一路打個心一路好痛, d 眼淚真係忍唔住!!

妹妹陪左我地一家人咁多年 (我阿姨養妹妹時佢大約1-2歲, 我表弟果陣只係8歲, 而家佢已經21歲, 即係妹妹起碼有15歲!!!)
anyway, 妹妹終於可以擺脫病魔, 唔駛再受苦喇

P.S. 早幾日聽個朋友講, 話如果屋企仲有小動物既, 係唔適宜將已逝世既小動物骨灰擺响屋企, 火化後一個月就應該灑左去
佢叫我搵日打畀佢佢詳細d 講畀我聽, 但我冇打到
我唔明呢d 係咩理論, 不過就算明都冇可能會接受到, 因為根本就冇可能忍心將佢既骨灰灑左去!!
妹妹永遠都要陪住我地一家人, 仲會守護住豆叮噹ga!!