恐鬼怖

繼上回小魔怪去廁所開完大，响廁所大呼麻麻幫佢抺pat pat 之後，今日又另一個經典，睇到我即時 O咀。

話說今晚媽咪叫我食飯，我一開房門就見到我大嫂响度用較剪响度剪啲雞翼，拆肉不特止，仲剪成絲。我當時都呆咗一呆，咁大個仔應該用牙咬啦。唔駛用較剪剪吓，FINE ！拆肉都算，唔駛剪成絲吓…

其實小魔怪都幾聰明，可惜同時亦都係一個低能兒。聰明，唔代表有智慧。識駁咀駁舌，唔代表冇缺陷，剩係識食殘廢餐，同廢人有咩分別？一啲生活常識、生活智慧都冇，自理能力咁差，最慘佢又唔勤力讀書，起碼第時都叫做有機會做下高層，搵多幾個錢，請多幾個工人服侍佢吖。又窮，又要自理能力咁差，等時點養妻活兒？

其實，呢個唔單止係小魔怪既問題，眼見時下好多細路都自細比人縱大，比我嗰代仲溫室過溫室，連食都廢事動手，但係索K技巧就一流。我地啲做大人既，係咪應該反省一下，呢班飯來將口既未來主人翁，將來會點樣對我地呢班老人家？點樣做社會棟樑？