Mother's Day

10 & 11-5-2008

今日係母親節，星期五晚已經收到亞Ｂ親手製作既手指畫！

雖然佢仲未識寫字，未識表達ｄ咩心意，但佢用行動黎表示左了！

事源o係我開電視諗住睇新聞既時候，佢又要我開碟比佢睇，

咁岩電視又講緊母親節其他小朋友點同媽咪慶祝！

我就同佢講，今日係母親節喎．．．你唔好激媽咪喇，

你睇～小朋友送禮物比媽咪喎，你有咩送比我呀？哈哈～佢指住自己！

見到電視裡面個小朋友錫媽咪佢又走過黎錫左我一啖！

再講左句 " 媽咪，母親節快樂！"冧晒！

近排亞Ｂ望住我既時候,佢見我唔笑就會問? " 做咩唔笑呀媽咪？ "

我就會話 " 媽咪好攰呀！"

佢就會叫我伏o係佢度訓覺或者抖下，真係好可愛！亞Ｂ～你真係好識氹人！

第時大個仔一定冧死女！

至於我～就提早左一日同媽咪過母親節！

慶祝就冇特別慶祝，屋企實在好難等齊人！

老公星期六例牌要返學，我就帶住亞Ｂ搭車入去先！佢放學先過黎！

媽咪話叫ＰＩＺＺＡ食！等左成粒鐘先送到！

最搞笑係我細佬......通常送外賣o個d人都係比左野食先收錢架嘛！

我細佬攞完就即刻想閂門，完全唔記得左要俾錢呢回事！

亞Ｂ去到婆婆屋企就四圍摷野玩，比佢摷到舅父仔部遊戲機！

對佢黎講好新奇，因為平時我地係唔會比呢d野佢玩！

至於老公．．．打機打到唔捨得走，催左佢幾次先肯郁，仲想留低過夜添！

結果送車尾！

之後亞Ｂ上左車唔夠十分鐘已經伏左o係我度訓左！

返到屋企成十二點幾，

自己都攰到訓左！訓到半夜五點先彈起身洗白白！