第一擊 interview

11月14號 - 第一擊 interview

"聖公會聖馬提亞堂肖珍幼稚園"

經過之前一輪既排隊拎 form 交 form之後....

終於今日要去 interview 嗱....時間係上午9:15....

時間上明明可以夾得好好....點知出去搭車既時候就次次都係等唔到車....

等左成15分鐘有多都無.....豬媽個心都急埋....

一見有的士立即衝上去上車....

一上到的士我只係講左 "水邊圍村"....個司機叔叔已經知道我地要去邊....

原來佢個孫女都係果度讀緊....

一落車就係遠處見到 Daniel 同埋佢媽咪....不過無時間傾計嗱....

去到學校門口大約9:06a.m.無遲到....不過就已經立即要打仗.....

一上到一樓....一入房已經有4-5個小朋友分別同緊4-5個老師考緊試....

老師 : 早晨....坐吖....

軒B : 早晨....(好在識應....不過唔肯坐)

老師 : 坐底吖....我地一齊玩吖.....

軒B : (四圍望無比反應佢)

老師 : 坐啦....唔怕嫁....你睇我地一齊玩玩具吖....

軒B : (一聽到"玩具"兩個字) 好呀....

老師 : 乖嗱....你叫咩名呀?

軒B : 陳俊軒....

老師 : 呀....軒軒呀....你今年幾多歲呀?

軒B : 兩歲 (仲有埋手勢 "7" 字)

老師 : 兩歲嗱....好叻喎....軒軒呀....枱面有無蘋果呀?

軒B : (指住個蘋果) 蘋果呀....

老師 : 係喎蘋果喎....可唔可以拎比老師呀?  我想食喎....

軒B : (只係度望住佢無反應, 老師講左幾次都一樣無反應)

老師 : (轉第二樣問有無橙) 軒軒呀....有無橙呀?  老師想食橙呀....可唔可以拎比老師呀?

軒B : (指住個橙) 橙橙呀....(不過都係唔拎比佢)

老師 : (轉方法) 咁一係比媽咪吖....媽咪想食喎....好唔好呀?

軒B : 好呀....(立即拎左比我) 媽咪食呀....

(正當老師想問軒B有關於顏色既問題時....有位小朋友大叫....軒B個心立即飛走左)

老師 : 軒軒呀....呢個係咩顏色呀? (無反應)....哩個呢?  (都係無反應).....

軒B : (望住小朋友果邊....仲要比佢望到d野) 車車呀....(救命呀....做咩放車車係度啫)

老師 : 係喎有車車喎....我地去玩車車囉....好唔好呀? (唔係嘛)

軒B : (二話不說) 好呀 (仲要自己拖住個老師行過去)....車車呀....

(開始咩野都已經聽唔入耳嗱....)

老師 : 軒軒呀....呢架咩車來嫁?

軒B : 叔叔車車呀....(因為軒爸細佬係揸呢隻車)

老師 : 係呀....咁架車車係咩色呀? (豬媽個心立即離一離)

軒B : 黑色呀....黑色車車呀....(比軒B撞中左, 仲隨手拎起架車) 巴士呀 (不過講啱左....真係巴士)

老師 : 係喎....係巴士喎....咁巴士係咩色嫁......(豬媽個心又離一離)

軒B : 巴士車車呀....(點都答唔到顏色係咩)....

(老師見問極佢都唔識答咁就無再問....而且都已經到尾聲我地可以離開....點知軒B就係咁玩車玩到唔想走人....仲推開老師隻手添....唉....死得....攪左一輪之後軒B至肯返埋位....接過糖果 & 餅乾就準備走)

軒B : 多謝 (好在識講)

老師 : 乖嗱....BYE BYE

軒B : bye bye....(finished interview)

成個過程大約15分鐘到....但係時間就好似好長....好漫長....

係呢個過程入面....豬媽只可以做旁觀者唔可以出聲唔可以引導....

眼見軒B有機會出錯既時候都唔可以出聲叫停佢幫助佢....

個心當時好無助....亦好擔心....

一個咁細既小朋友就已經好似我地大人去IN一份工咁....太誇張....

好在既就係小朋友依家唔識得分 "緊張"....

如果唔係佢地既成長過程中一定會有黑點....

我清楚咁明白學校都係想精益求精....而且佢地有必要咁做....

如果唔係咁樣....試問幾百幾千份form咁多人點樣選擇吖....

只係依家既幼稚園已經唔再幼稚....

唔知地球需要既係一個點樣既小朋友呢?