澳門一日遊

星期六同老公, 奶奶, 阿妹去咗澳門玩, 但前一晚仲掛梗九, 八號風球, 所以未必去得成, 好彩出發前已經改咗三嘅風球, 我地去到中港碼頭等奶奶佢地時, 估唔到有咁多人等船去澳門, 我仲諗住打風邊到有人去架, 原來我嘅諗法係錯!!

我地經氹仔過關, 過關後就塔shuttle 去威尼斯人, 威尼斯人的確好大, 但我冇震撼嘅感覺, 我唔知係唔係之前睇過好多有關威尼斯人嘅相喇, 行咗個圈就去賭場, 我自己感覺就係個賭場好大好多張賭枱, 可能時間尚早唔係好多人, 由於我唔鐘意賭錢, 所以都係只係睇吓就算, 而平時頂多買吓六合彩嘅老公同奶奶突然變身做爛賭二, 我同阿妹一人煩一個, 佢地唔係好敢賭, 但最後老公都輸咗成千蚊, 奶奶輸三四百, 老公趁我地去廁所時玩老虎機贏咗一百蚊, 哼…贏就贏少少, 輸就輸多多.

之後塔的士去食豬扒包, 的士司機話咁早間野仲未開, 就介紹咗間茶餐廳俾我地, 仲話個豬扒包好掂, 點知我地被騙了...跟咗我地去咗大三巴影咗幾張相之後又咗去新舊萄同金沙, 去到金沙點都要坐低抖抖, 因為由大三巴開始去每個賭場都係行路去, 雖然唔係好遠, 但奶奶帶錯路, 搞到我地行到死死吓, 係金沙KFC坐唔到十五分鐘, 奶奶就要去玩, 我地經過老虎機區老公又要玩, 同樣贏就贏少少, 輸就輸多多嗰D, 到最後一局我手多咁咗一吓, 點知俾我贏咗五十幾蚊, 見唔駛輸仲有贏就即刻攞錢走人, 跟住係每個賭埸放底d之後去買咗幾盒杏仁餅就塔巴士去食飯, 間餐廳係阿妹係open rice 睇個comment幾好先楝, 不過我地就覺得麻麻地, 食完飯之後奶奶仲唔死心, 仲想去威尼斯人一轉, 去到我同老公, 奶奶同阿妹分頭行事, 我同老公玩咗陣老虎機覺得唔對路改去玩大小, 今次完全係我話事買大定小, 好好彩地贏返幾百蚊, 成日嚟計都係輸咗兩三百蚊, 咁都冇咁傷, 奶奶知我地有贏佢就好驚奇咁話” 真係架“, 到我地問奶奶玩成點, 奶奶就好失望咁話”冇玩過”, 今次唔係阿妹唔俾佢買, 而係奶奶話阿妹係後面有壓力…

看似好好味嘅豬扒包, 可惜好睇唔好食.

真奇怪大三巴個天明明就白蒙蒙

行過幾步就藍天白雲

等船其間奶奶話下次唔同我阿妹嚟澳門…話我地阻住哂…哈哈哈哈, 如果唔係我地可能唔至輸咁少架喇.