網誌分類：好戲在後頭 |
圖片
網誌日期：2009-11-05 22:36
經好友伴娘小姐同 kathy 既大力推介下，我前晚去睇了 "THIS IS IT"！從來都不是 MJ fans，0係我既成長中知得最多關於 MJ 既醜聞，整容，孌童，濫藥，揮霍乜都有！睇過佢一個0係佢個夢幻樂園大宅既訪問後更對佢毫無好感，訪問中佢不只表示鍾意 peter pan，佢仲話佢就係 peter pan，幾廿歲人仲 peter fan 真係幾恐佈，但睇了 "THIS IS IT" 後發現 MJ 竟然係一個會咬著珍寶珠睇 playback，睇到精彩鏡頭會忘形歡呼既大細路，咁其實佢會唔會真係好 peter pan 既呢？
仲有，原來 MJ 除咗唱歌跳舞勁之外 (佢真係可以同隊 band 練練吓歌都可以跳起上黎，終於明白咩係與生俱來的天賦)，仲要兼顧埋演唱會既音樂，燈光，煙花，甚至大型道具既視覺效果，每首歌的表演佢都精心設計，片中工作人員不斷強調所有野都要等 MJ command 同 signal，而 MJ 對一粒音亦一絲不拘，佢所顧及既就只係希望觀眾睇得舒服！MJ 何止係 KING OF POP，直頭係 KING OF ENTERTAINMENT！
以前我仲經常嘲笑 MJ 既整容樣，但其實佢個樣整到點都唔影響佢唱歌同跳舞，佢既歌依家聽番一啲都唔 out！而且我依家更加相信有好多人為咗要搵佢錢，而叫佢呢樣嗰樣，包括整容，其實 MJ 都好可憐架！
片中盡見 MJ 對重踏台板既興奮，呢次演唱會如果可以上演的話，難以想像會幾咁精彩絕倫，可惜 ...... anyway，令我好想即刻去買佢以前演唱會既 DVD 黎睇吓呢！
P.S. 睇完套戲之後勁鍾意 "they don't care about us"，日日夜夜都哼住，首歌真係型到無法形容！
kathy 2009-11-07 00:35
我以前對佢都毫無好感, 仲覺得佢變態添,直到佢死左之後, 先發現佢並唔係傳媒一路以來描述咁樣, 好多嘢都係歪曲晒, 包括你講果個訪問 living with michael jackson, 你知唔知呢個訪問其實MJ又比個記者Martin Bashir 跣呢?
呢個記者千方百計搭上搭, 希望MJ接受佢訪問, 好話說盡, 加上佢之前訪問過載妃, MJ都睇過, 於是信佢, 以為條友會幫佢洗脫過去傳媒將佢抹黑嘅形象, 點知....你都知個訪問出左嚟變成點啦, 仲搞到佢惹上第二宗孌童官司!
點解會話MJ比個記者跣?係因為個記者一路做訪問 ,mj自己都有cam man拍,個記者喺ＭＪ面前講嘅嘢,同個訪問出左嚟的係相反,mj之後攞番自己拍果段片，先證明到個記者幾賤，由此證明，ＭＪ身邊每個人，都只係想搵佢著數，ＭＪ實在太慘喇
（ＡＮＹＷＡＹ，ＭＪ自己拍果段片，明珠台都播過，好似叫做《洗冤錄》，有興趣不妨搵嚟睇番，不過，當時睇ＬＩＶＩＮＧ ＷＩＴＨ ＭＪ嘅人，肯定多過洗冤錄囉）
ＴＨＥＹ ＤＯＮ’Ｔ ＣＡＲＥ ＡＢＯＵＴ ＵＳ真係好正，我二妹都話一路睇一路想跟住ＭＪ揼心口