網誌分類：好戲在後頭 |
圖片
網誌日期：2009-10-27 22:35
今年無記兩套台慶劇首播時攪足一晚，印象中之前未試過有劇集咁巴閉！身為電視迷既我當然有追啦，睇咗個幾禮拜，卒之忍唔住要寫一寫 
！
"大長今" 加 "金枝慾孽" 再加大量 "溏心" 式鬧交金句就成了一套 "宮心計"！OMG，前兩者乃係我其中兩套至愛電視劇，"宮心計" 點睇都無法唔比下去囉，剩係演員陣容都差好遠啦，人地一個長今，一個如妃已經殺晒，"宮心計" 只靠阿佘同楊怡，唉，本身米雪同關菊英兩位老薑都唔錯，但太 "溏心" 了，尤其佢地一講 "有生之年，我都要同你鬥到底" 呢類所謂金句，我真係有啲毛管凍囉 
！
不過，最大敗筆都係用鄭視帝，佢一如以往一個表情做到尾，仲要講到成個皇宮啲女都 冧佢，唔係吓嘛！反觀陳豪扮傻仔就扮得有板有眼，真係唔好話我偏幫，相信鄭視帝絕對唔能夠做呢個角色囉！另外，套戲將啲 budget 用晒0係啲戲服頭飾而唔番大陸外景拍亦係錯晒之舉，攪到我覺得乜個皇宮咁細，同 "金枝慾孽" 無得比之餘，又唔覺得啲咁誇既頭飾有乜咁靚！
好彩太皇太后做得夠氣勢，而宮廷鬥爭戲我都啱睇既，間中都有啲啱聽金句，但似乎要睇睇楊怡變奸後係咪真係做得咁好，"宮心計" 至可以論成敗！
"富貴門" 就靠一班回巢舊將擔戲，當中當然係羅嘉良最令人期待啦，一來佢好戲 (我仲好記得葉榮添 "咩都可以輸，信心唔可以輸" 架 
)，二來呢啲家族情仇戲開正佢嗰瓣，而到目前為止，套戲最好睇就係佢同馬國明兩兄弟，始終佢呢啲至叫做識做戲，而馬國明亦做得唔錯！
至於其他舊將，呂良偉啲戲係 ok 但磈面太硬膠 (明顯係 botox 後遺症)，袁詠儀比 "疑情別戀" 時既狀態好得多 (雜誌話佢都係打 botox)，戚美珍就無打 botox 盡現老態，好多人話佢演得生硬，但我對佢真係無期望，個人認為佢起碼好過陳玉蓮先 
！最大鑊就梗係家燕姐，點解無記好搵唔搵搵佢做呢？李司棋，甚至汪阿姐都一定好過佢啦，浮誇都算啦，前幾集連 dum 地都出埋就真係 ..... 頂 ~ 唔通佢以為仲做緊 "皆大歡喜" 咩？人物介紹話佢角色係大情大性喎，照我睇癲癲得得似啲囉 
！
仲有，一直對佢無乜好感既郭可盈亦瘦到似骷髏骨，真係令人好倒胃 ！
戲情就都係嗰啲啦，講真今時今日有乜可能唔驗 DNA 就認人做細佬架！但睇戲唔好駁戲啦，唯望其後戲份集中多啲0係羅嘉良度，咁就應該會好睇啲 
~
小麗 2009-11-08 13:47
PomPomPurin2009-11-11 23:07
無論劇本，製作或演員，"宮心計" 遠遠比唔上 "大長今" 啦 ~
kathy 2009-10-29 19:31
有營煮婦我睇過4-5集, 覺得唔太差, 不過唔想見到鍾景輝囉, 佢唔知點解老得好肉酸! 但套嘢都幾溫情同有d劇情架
我覺得呢類小品劇集,好睇過d恩怨情仇大製作, 因為果d大製作,絕大部分係超唔make sense! 我始終唔信香港地有咁白痴嘅banker! 至於我覺得袁靚靚似師奶,唔係指佢個身形,而係佢講嘢d語氣,真係超八婆超似師奶
PomPomPurin2009-10-30 11:26
kathy 2009-10-29 14:43
《三國》成十幾年前,當年算係好勁大製作,而家睇梗係節奏慢兼武打場面唔得啦!
我成日比我阿妹話我好激動, 我都知係激動咗, 不過真係覺得無記d劇超唔make sense, 反而拍下小品,搞笑果d仲好, 例如黃子華之前果套咁, 或者李司祺之前套有營煮婦,都好睇過呢d所謂大製作囉
咁當然無記都有好嘢ge,例如溏心風暴、金枝慾孽
PomPomPurin2009-10-29 16:13
唔係嘛，我唔覺意睇咗三兩集都覺得 "有營煮婦" 好無聊，完全唔知套劇想講乜，最好睇都係法拉剝衫
~
近年無記最最最好睇都係 "金枝慾孽" 同 "衝上雲霄" 架啦，除此以外都係黃子華嗰啲，如 "男親女愛"，"棟篤神探" 同早前既 "絕代商驕" ~
kathy 2009-10-28 10:35
富貴門真係好爛, 呂良偉一家人,話晒係banker, banker喎, 唔係溏心風暴d暴發戶喎, 點可能咁白痴呀,係都要搵個野仔返嚟分自己身家之餘, 仲要乜都唔驗就認人做細佬, 係咪痴Q左?? 果個袁靚靚成個師奶咁, 邊忽似BANKER??????仲要懶好笑成日同馬德鐘開會當眾打情罵悄, 好心啦!!究竟無線幾時先肯寫個MAKE SENSE 啲嘅劇本呀, 我真係頂唔順喇!!!
至於宮心計, 好過富貴門囉, 但都唔係好啦, 我先唔信關菊英班人, 可以當住太皇太后面前互相鬧交囉, 無記唔好咁白痴啦, 套嘢仲話會喺韓國播喎, 咪盞笑甩人地個下爬!!!
陳豪肯定好過鄭瓜穎, 但佢一扮傻就好似得得地咁, 成套嘢太溏心風暴FEEL喇!
睇無記D劇, 不如將時間睇下美國、日本、甚至大陸劇好過!!!而家連大陸劇都拍得認真過無記d劇十萬九千倍囉
PomPomPurin2009-10-29 10:52
嘩，乜咁激動，我晚晚追都無你咁好火喎！我又唔覺袁靚靚好師奶喎，佢已經無 "疑情別戀" 時咁肥，起碼無咗個雙下巴，點都好過戚美珍啲頸筋多過樹根同郭可盈塊面成個骷髏頭骨咁啦，講真俾佢地兩個近鏡真係幾驚嚇架！但袁靚靚同馬德鐘既互串亦係無甚火花既，有時直頭唔明佢地點解要嘈，個人認為好大可能係馬生啲戲屎，因為我不嬲都覺得佢得個殼！
至於美劇日劇大陸劑，我實在係無心機追字幕，日劇仲好啲，得十零集短啲，啲大陸劇動輒幾廿集，上次阿凱睇嗰套 "三國" 我唔覺意睇咗少少已經覺得好悶好惡頂，算啦，我都係鍾意睇無記師奶劇，只係啲劇越黎越唔掂啫，依家晚晚追咁多套，最好睇係 leon 既 "今生無悔"，有時真係經典台啲劇仲好睇囉，唉 ~
P.S. 得得地唔係傻架喎 ~