建國大業

呢排 yahoo blog 成日 short，中秋節出既 post 今日至見到，吹漲！國慶日睇既 "建國大業" 亦要攪到今日至寫！先要強調，我係愛國的，但黨嘛 ..... no 啦，睇呢套戲只係因為夠大堆頭，即管睇吓拍成點  ~

咁多明星，預咗係講多過做，戲中既會好似開極都有，國民黨要開，共產黨更加要開，連埋反蔣人士，民主組織，真係開會都開咗大部份時間，雖然都唔係話悶到瞓著，但唔係好睇囉！呢套戲當然係美化中共啦，已經無我諗咁誇，可能係因為呢套戲只係拍到建國為止，建國前中共真係講到好有理想既，但建國後相信令好多當時相咗佢地既人失望，而且佢地建國後既所作所為套戲亦無提到！戲中最誇最美化既就係有個廚房佬收到毛主席 "賜" 既煙唔捨得食，仲0係被炮彈空襲時因為醒起毛主席未食早餐折返廚房而成 "烈士"，我即時大叫 "呢啲咁叫憨居囉"   ~

另一方面，以前被稱為國賊既老蔣又唔算被踩到盡 (睇佢搵無乜奸相既張國立做老蔣就知)，相信因為依家國共 friend 番仲有民進黨呢粒共同眼中釘有關！最無厘頭都係夾硬屈老蔣都覺得國民黨既腐敗已經入到骨頭同國民黨係自己攞黎衰至會輸，連我中史咁屎都知老蔣到死嗰日都仲講緊反攻大陸，呢啲說話真係無可能出自佢口囉  ~

好彩套戲有 leon 同陳坤，陳坤演蔣經國好型，絕對型過真嗰個十萬九千倍！片中蔣經國事事秉公處理，思想開通，令我忽發奇想，如果當年係老蔣贏咗，佢都係傳位俾佢個仔，如果蔣經國都係唔會傳俾佢個仔，咁依家大陸咪會好似依家既台灣咁有民主 ？