999之旅 - Day 3

2007年12月29日 (晴)

尋瞓得真係好舒服，話咁快就到我地最後一日既行程：

酒店自助早餐 => 愛情玫瑰園 => 農藝坊 => 濠江鉅記 => 午飯 => 4D動感電影 => 燕窩蛋撻Hi-Tea下午茶 => 直航船返港

酒店自助早餐：尋晚好期待既自助早餐，今日終於都有得試吓，不過都係因為太攰，所以唔能夠一早起身去食﹗我地準備就緒就當然立刻去餐廳食早餐，淨番既時間唔多，心想唯有食快點啦﹗一落到去，我地當然去番尋晚間餐廳，點知原來唔係呢度，係一餐廳後面既一個地方，供旅行團既區域﹗果度同係酒店後門有空位地方擺桌椅食嘢差唔多，而且食物既種類都係好少，我想都係十隻手指數得晒…同我地想像既差十萬九千里咁遠，唯一興幸冇為此而早起﹗

愛情玫瑰園：食完早餐，我地就要由廣州返回中山，車程差唔多三個鐘，要中途到油站入油，可想而知有幾遠﹗不過都好，我地可以瞓一陣，瞓醒後，我地就來到今日我地第一個景點—愛情玫瑰園﹗本身以為真係好靚種滿玫瑰既地方，點知原來係紫馬嶺公園內既一個種咗玫瑰既小部份，可以講係公園既花槽咁上下，只不過d花係玫瑰﹗當然我地都要同呢d咁靚既玫瑰影張相啦﹗

農藝坊：睇完玫瑰，我地就去睇農作物，初時都以為只係睇吓d農作物，點知最後都係埋站，又話只係幫香港四間公司宣傳，最後都係又賣湯，又賣藥咁﹗

濠江鉅記：呢個係買手信既地方，唔駛多講，每次返大陸必到﹗咁我地都喺呢度買咗少少嘢食食吓﹗

午飯我地今次來到過氣溫泉酒店—仙沐園既酒樓﹗食呢個香江懷舊十八式，有十八味唔同既餸，但都係同之前兩日食過既大同小異，不過味道都算唔錯﹗

4D動感電影 + 燕窩蛋撻Hi-Tea下午茶：今次我地去到中山雅居樂俱樂部做呢兩項活動﹗先睇4D，嘩，好流﹗再去Hi-Tea，都係一樣，好流﹗我地仲要喺呢度逗留2個鐘，我地真係寧願中d上船返香港呢﹗由於我地唔去自費按摩，所以咁長時間，唯有打機同影相﹗同樣都自得其樂呢﹗ 

最後，我地都要離開呢度，坐船返香港﹗三日既旅程亦要劃上句號了﹗

後記：

唔知點解，每次跟團返大陸，我地都會有好多不滿，亦都會話冇下次，我記得上次我地都有講過，但今次我地都依然跟團，我相信下次我地依然會一樣﹗不過，呢d都係一個共同既經歷，好多年之後，我地都仍然會鬧住來講，講住來笑呢﹗繼419後有619，619後就出現了999，唔知下次又係幾多呢？呢個數目雖然象徵住旅行社既加幅，但可幸既同時亦象徵住我地消費能力增加，希望有一日，當我地既消費能力再增加到某一個地步時，我地可以唔駛再join呢d cheap團，做cheap客喇﹗