去咗馬騮山？﹗

2008年3月16日 (晴)

今日恩慈團outing，我地去城門水塘BBQ﹗因為要10點鐘集合，所以一大朝早我就起身準備﹗雖然只係比平時返教會早半個鐘，對我來講實在有點困難，事關我琴日返咗成日工，實在太攰，仲要燒嘢食…實在有點兒攞命，最重要係呢d關鍵時刻，我唔想曬黑呢﹗但恩慈團一班團友仔又出奇地興奮，見到呢個情況，不期然都增加咗我去既動力﹗

結果我都係遲到咗差唔多10分鐘先到﹗一去到我地就分頭去買嘢，由於費事行咁遠，我地都係喺教會附近買嘢，之後就一齊搭小巴出發﹗由於臨近清明節，有好多人在小巴站候車，見到咁多人，真的嚇了一跳，好彩大家等既車唔同，否則真係唔駛去都得﹗

終於都到逹城門水塘郊野公園，可能係假日，所以人都幾多，我地就當然行上燒烤區﹗一路行就發覺這裡好似有點兒不同，好似多咗d嘢，係馬騮﹗我記得之前來既時候都唔覺有馬騮，今日真係好多馬騮，一家大細，三五成群咁，樹上有，山邊有，就連馬路中心都有﹗心裡立即發問：乜我去咗金山郊野公園咩？

之前都聽聞而家d馬騮好叻，識得認膠袋，一路行就一路擔心會唔會被馬騮搶膠袋，慶幸我地係去華潤，唔係去百佳或惠康，但聽人講其實都係差唔多﹗

經過一輪戰戰競競的路程，終於到逹燒烤場，搵到燒烤爐﹗本來我地搵到個樹下既爐，因為實在怕曬，但後來有途人提醒留意樹上的馬騮，那我們就轉過另一個在欄杆邊的爐，以為會好d，點知當我們擺好晒嘢食，透緊爐既時候，慘案就發生了…有隻馬騮用迅雷不及掩耳的速度偷咗我地一包綿花糖﹗﹗﹗如果唔係有途人見到大叫，我地都留意唔到﹗一班團友仔都好嬲，因為佢地最想燒既綿花糖竟然俾馬騮偷咗﹗見住隻可惡既小偷馬騮坐在樹上，慢慢品嚐著美味既綿花糖，實在有點無奈，亦都奈佢唔何﹗為免以上既情況發生，我地都要輪流做看更，睇住d食物﹗一見到有馬騮蠢蠢欲動，團友仔們就發揮佢地既小宇宙，保衛食物，嚇走馬騮﹗但我就有點擔心佢地會俾馬騮襲擊呢，好彩都冇事發生﹗冇幾耐，附近傳來一聲慘叫，偷竊案又發生了﹗

今日雖然唔算太曬，但一路坐係度乾燒都幾緊要，好彩一班團友仔對我好好，知我怕曬，搵遮遮埋我，令我唔駛變炭，雖然我似終都係黑咗…回程時，由偉豪哥帶路，我地行落石蘺搭車，途中我地問IQ問題解悶，亦因為咁，就解決了下星期日既週會安排問題呢﹗