好想好想同你分享

又到左冬天, 最憎冬天, 鬼死咁多節日, 節日一到, 又係想起你既時候.. 時間真係過得好快, 話咁快又過左兩年, 原來你已經離開左我地兩年, 眨下眼, 佢已經兩歲幾... 識行識走. 個樣好似你, 尤其係雙眼, 好靚, 好彩唔似我. 哈哈~ 每次望住佢雙眼, 又圓又大, 果條雙眼皮, 第一時間就會諗起你, 我好鐘意望住佢, 因為望住佢, 就好似見到你一樣, 佢好得意架! 唔止個樣得意, d行為呀..各樣都好可愛! 但同時佢都好曳.. 成日都似一隻馬騮咁.

佢既一切一切, 我都好想同你分享好想同你講.  有時想同人講下佢既成長, 一點一滴, 然後發現唔知可以同邊個講. 原來, 我身邊既所有人, 都比唔上一個你. 有時真係好想打電話俾你. 唉.

兩歲幾既佢, 已經識講好多野喇.. 而且係今年九月已經開始返學, 不過到今時今日, 返學仲係成日喊, haha~ 佢好叻仔, 學講野學得好快. 唔知佢幾時會問我你係邊呢? .我都唔知應該點講好..

我好少同佢出去, 因為一個人同佢出街, 都真係幾辛苦, 而且去到人多既地方, 見到人地三個人一齊, 往往就會有一種自卑感產生. 果種感覺令我好辛苦. 所以平時我都只係會同佢去下超市, 又或者公園. 希望你唔好怪我啦.

有時我會係遠處偷偷咁望你. 見到你, 成個感覺好唔一樣啊. 少左一份輕率, 多左一份穩重. 從遠處望住你, 還有她們, 知道你近況都幾好, 我都好開心.

最近我都開始返工喇. 雖然唔係咩高職, 但希望可以開始我人生新既一頁啦. 從遠處祝福我啦!