學股票基本分析

  因為股票蝕得多, 最近終於去咗學股票分析, 現在跟郭樹鈿學最初級的圖表, 亦跟了羅浩楷學基本入門法, 郭樹鈿又真係講得好啱, 圖表呢, 學了也未必會贏錢, 但是唔識呢, 就肯定會輸錢, 經過這一個月的速成, 又真係覺得幾好玩喎.

  以前入股票, 最主要是羊群心態 個經紀話乜嘢No.好喎,有莊家, 咁就仆崩鼻咁入, 真係唔知頭唔知路, 你話以前個巿好就話啫, 而家係熊巿呀, 消息聽到都把鬼啦, 根本就係氹你地入局, 我就咪咁蠢, 平時精明到鬼咁, 但在投資巿場上, 正一大笨蛋呀, 蠢到加零一, 我只好成日咁安慰自己, 或者個天唔想我咁嘆, 所以要我冇錢, 仲要做嘢.

 我試過寫稿時, 有一次去炒黃豆, 只不過用咗五萬元, 竟然贏了八萬元, 即刻雄心萬丈, 打電話同姐妹的施盈盈講:[我不再寫稿, 咁好搵, 我要去做炒家了.]話口未完咪衰咗, 下次就輸番突, 哈, 証明賭仔係唔掂, 不過我賭性好重, 掂又好, 唔掂又好, 永遠就係賭呀賭, 不過上天又俾咗一樣嘢我, 即係輸咗不會死追, 因為追咗又試跌落去, 我手頭上有幾多輸咗就算, 不會同人家借, 所以仲有啖食, 如果借到通街債, 真係該煨了.

我都仲有少少人性.

 我唔係唔中意做嘢, 但鍾意幾時做就幾時做, 恐怕這亦是好多人的理想, 而家我每日早上七時十五分起牀, 跟住吃早餐, 沖涼, 唸經, 八點五就要出門口, 返到公司九點前, 最慘係搭地鐵, 上班時間, 果種迫法, 名符其實的沙甸魚, 幾乎每次都要攝位上車, 上咗之後, 真係背脊對心口, 郁都不能郁, 一直要捱到金鐘先至有得透氣.

 你話啦, 如果有啲錢, 又何必咁辛苦喎, 不過咁, 我總係對自己講, 係而家咁樣的環境, 有工返咪幾好, 好過人地想返都冇得返, 係冇, 做人真係要自娛一下, 否則好容易想到癲.而且返工仲有一樣好, 早睡早起, 我而家晚上十一點一定睡覺, 絕少搞到兩, 三點, 因為冇精神返工呀, 雖然我份工都係冇乜嘢做, 但都要精精神神, 不能經常烏眉瞌睡, 提不起勁.