勿讓情緒左右自己

  那天看了一本書,內容沒什麼, 但有兩句話卻讓我印象十分的深刻, 第一句係勸人不要以個人的情緒來面對事情, 另一就是不要抱怨太多.前一句話我看到後, 好比當頭棒喝, 立即將此話輸入自己的記憶體內, 以後萬一遇到有乜問題, 我會立即攞番出來, 告訴自己, 切勿以個人情緒來處理事情.

 有一個故事, 有青年人應徵了一份做礸油台的工作, 管工及經理只係叫他拿著個禮物盒爬高爬低, 給兩個人分別簽了名,總之就係咁輪流的支使他, 這個年青人愈想愈氣憤, 心想這兩個人根本就係有心整古他, 令他爬上爬落, 他愈想就愈嬲, 終於在人家再支使他時, 大聲抱怨發炮說;{你地點解咁樣支使我爬高爬低, 分明整古.}個經理就好可惜的說:[年青人, 我們不是想整古你, 因為在鑽油台工作通常都好危險, 我們只不過係試吓你爬高爬低是否應付得到啫,本來你都過咗第三關, 可以通過了, 可惜你又鬧情緒, 請原諒, 我們不能請你了.]

 我又記得, 有一次和一個算命先生傾開, 他就說:[薛家燕可以紅足卅年呀, ]我都唔信說, 有此可能咩, 他就說, 一個人紅要睇命水, 亦睇吓做人處世,記得家燕來找我的一天, 我因為有事出了去, 累她白白等了半天,到我回來後向她道歉, 她依然笑笑口話等吓冇問題, 就可見她的人幾寬容. 不以情緒左右自己, 肯定會成功的.

 我都覺得自己衰係衰乜嘢呢, 咪係情緒囉, 而家的後生仔亦都係衰呢樣, 太冇忍耐力,做少少嘢都煩, 又會耍脾氣, 一切以自己的情緒為依歸, 左右晒你的思想, 行動亦被影響晒, 其實情緖非常抽象, 摸又摸不到, 又無色又無味,但感受卻可以置人於死地, 譬如有人覺得生無可戀, 稔稔吓就真係會自殺, 又或是憎恨某個人, 又真係會報仇,

 其實再深入內觀一下, 就知道這些感受好飄忽, 一陣有一陣冇,如果你要捉住佢, 當真的一樣, 咁就會陷入漩渦中不能自拔, 千萬不要被它來操縱你, 一旦被它操縱, 尤其是恨的感覺, 咁你一世都不會快樂及開心,所以, 如果知道自己好容易被情緒操控, 要好清醒提自己, 有咁快甩咁快, 不要被它糾纏下去, 否則, 心魔就會害到你雞毛鴨血, 體無完膚呀.