一提到性教育，我就好頭痕，最慘大小Ｂ都係男仔，有時佢地問嘅問題對於100%女人嘅我真係好難。
記得小Ｂ曾經指住我個「咪咪」，問我個度收埋左Ｄ咩，又問我個度係唔係肚腩，真係唔知好嬲定好笑。有一次我同佢地游完水，三個一齊沖涼，我一除衫，大小Ｂ一齊「嘩」一聲，然後小Ｂ問我點解有野「痴」住係心口。
今日小Ｂ繼續發揮佢嘅好奇心，佢指住「咪咪」問我：「媽咪，我可唔可以摸下佢？」
我點樣答佢好，我諗左陣，覺得都要滿足下佢，於是就答：「可以，不過你記住只可以摸媽咪嘅，其他女仔嘅你唔可以亂摸！」
「點解？」佢又問！
「媽咪係屬於你嘅，所以就可以，你會唔會俾其他人摸你雀雀？」佢好似明白左！
然後佢又問我，可唔可以瞓係上面，然後我又無奈咁答應佢。
後來胡生出現，我將案發經過話俾胡生知，胡生於是問小Ｂ：「你點解要摸媽咪？」
小Ｂ諗都唔諗：「因係媽咪好摸！」
至於大Ｂ，就更令人頭痛，我話：「你第日會同女仔拍拖，然後娶佢做老婆.....」
大Ｂ竟然講：「未必！......未必係女仔！」然後奸笑。佢好明顯想激我！
未來相信我要面對更加多呢Ｄ嘅問題........做人父母真係好艱難！！！！
胡太
