我想有兩個媽媽

唉!啲風雨真係好似好鍾意我哋咁,成日都跟住晒.

老闆因為驚颱風到,天氣會變得惡劣,

就嗱嗱聲改機票,星期六一早就飛咗返上海.

由於由我屋企去教堂度係無車直達既關係,所以每次去教堂,

落咗車之後要再行十幾分鐘先至可以到達教堂.

我噚日去教堂既時候,一落車就傾盆大雨.

因為要行十幾分鐘既關係,我到達教堂既時候,就由頭濕到落腳,連對鞋都入晒水.

Andrew少爺見到我全身濕晒,就係咁不停用手摸我嗰條,濕淋淋既牛仔褲.

佢仲好天真唔停咁講,真係好濕喎,點解會咁濕既.

我哋可愛既少爺仔,整台彌撒唔念經唔唱聖詩,只係跟住神父念經文.

(我覺得佢第日大個咗,真係好適合做神父.)

記得我第一次帶少爺仔去望彌撒,就係主日學既兒童彌撒.

佢見我同大表姐領聖體,以為我哋食嘢唔畀佢食.

佢就好大聲咁喺度嗌,我好肚餓呀,我真係好肚餓喎.

坐喺我隔籬個學生同我講~Miss Wong 個BB話佢好肚餓呀.

當時我答個學生~佢真係好餓,不過唔係肚餓,係心靈上既餓.

佢可能想耶穌基督降臨佢既身同心,當時班學生都一齊喺度笑.

嗰時我就曾經諗過,少爺仔長大咗可能會成為一位神父.

(其實我都好希望會有咁既一日.)

May住既屋苑要換污水渠,到時會整到個浴室啲磚又崩又爛.

所以May就順便搵人幫個浴室來個大裝修,咁當然就要重新買過晒好多潔具.

午飯後我哋去咗~一田~實惠~宜家傢俬,都買唔到想要既嘢.

所以我哋就去咗旺角,我哋係啲潔具公司左穿右插,到最後都係買唔齊.

喺我哋搭東鐵返屋企既時候,少爺仔又再發揮佢問題兒童既本色.

A~點解啲阿媽咁鍾意哦自己既仔女既,我媽咪都係成日哦我架.

K~咁係因為啲阿媽好錫自己既仔女囉.

A~點解好錫自己啲仔女就會成日哦佢哋.

K~因為係自己既仔女,啲阿媽先會留意佢哋既行為.

     當啲阿媽發覺自己既仔女做得唔啱既話,就會好肉緊咁話佢哋.

     (你做乜嘢咁咁咁架,你唔可以咁咁咁嗰喎,你要咁咁咁先得架嘛,

     知唔知道呀,下次記住喇唔好再係咁喇.)

     如果係人哋既仔女,佢哋一定唔會好似哦自己既仔女咁哦法.

     因為啲仔女唔係佢自己既,點衰點壞都唔關自己事.

A~妳即係話個個阿媽都係咁?

K~大多數喇,通常唔會成日哦啲仔女既阿媽,一係就係好忙無時間理啲仔女,

     一係就根本唔多關心自己啲仔女.

     所以佢哋根本就唔知自己啲仔女做過啲乜嘢,咁當然就唔會哦佢哋既仔女啦.

     其實有個成日哦自己既阿媽係好幸福,因為你做乜嘢佢都知道.

     即係話佢好留意你既一舉一動.你話唔鍾意你媽咪成日哦你,

     咁你係咪想你媽咪,好似嗰啲媽咪咁,當你無到當你好似透明咁唔理你呢?

A~梗係唔係啦!我想有兩個媽咪.

K~吓!點解你會想要兩個媽咪?

A~因為我想多要一個92磅既媽咪囉.

聽到少爺仔講呢句說話既時間,我個心真係好甜架.

因為原來我係少爺仔心目中咁有地位.

少爺仔~咁~我~就還下你心願啦,你洗禮既時候,我做你既代母吓!!!!!!!!!!!!

咁你咪可以有兩個媽咪囉.哈.........................哈.